Turpanda sudin jesiti süzüwélin'ghan 3 yashliq balining ata-anisining lagérda ikenliki ashkarilandi

Muxbirimiz shöhret hoshur
2019-09-06
Élxet
Pikir
Share
Print
Terbiyelesh lagéridikilerge türmidiki mehbuslargha oxshash kiyim kiydürülgen bolup, yighin échiwatqan körünüsh.
Terbiyelesh lagéridikilerge türmidiki mehbuslargha oxshash kiyim kiydürülgen bolup, yighin échiwatqan körünüsh.
Social Media

On künning aldida ijtima'iy taratqularda jesiti sudin süzüwélin'ghan bir nareside balining sin uchuri tarqalghanidi. Muxbirimizning bu sin uchuridiki yip uchlirigha asasen élip barghan éniqlashliri dawamida, bu balining turpanning qaraghoja yéza astane kentidin ikenliki؛ ismining perhat yaki perux ikenliki aydinglashti we emdila 3 yashqa kirgen bu balining anisi atikem we dadisi turdigayitning her ikkisining nöwette lagérda ikenliki delillendi. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Hörmetlik radi'o anglighuchilar, tarqalghan widiyoluq uchurda déyilishi we körsitilishiche, yéshi 3-4 yash etrapidiki bir nareside bala qiriqmo namidiki bir kent yaki mehellidin östeng yaki ériqta éqip kelgen. Biz widiyoda gep qilghan ayalning shéwisige asasen, weqening turpanda yüz bergenlik éhtimalliqini perez qilduq. Téléfonimiz qobul qilghanlardin turpan sheher qarighuja yéziliq saqchi xadimi sudin jesiti süzüwélin'ghan balining astane kentidin ikenliki we ismining perhat ikenlikini bayan qildi. Emma u, bu balining yéshi we ata-anisining kimliki heqqidiki so'allirimizgha jawab bermidi. Astane kentidin téléfonimizni qobul qilghan xitay köchmenliridin biri, özining 10 yil awwal xénendin köchüp kelgenliki we Uyghurlar bilen bir mehellide olturidighanliqini bildürüsh bilen birlikte, bu kentte sudin jesiti süzüwélin'ghan balining ismining perux ikenliki we 3 yashlarda ikenlikini bayan qildi. Emma, u özining Uyghurlar bilen bek ariliship ketmeydighanliqini tilgha élip, uning ata-anisining ismi heqqide melumat bérelmidi. U yene bu mehellide yüzdin artuq kishining lagérda ikenlikini ashkarilighan bolsimu, emma, shu yüz nechche kishi ichide sudin süzüwélin'ghan balining ata-anisining bar yoqluqidin xewersizlikini éytti. Biz, bu ahale teminligen téléfon nomurigha asasen, alaqidar bir amanliq xadimidin melumat soriduq. Bu xadim؛ jesiti sudin süzüwélin'ghan balining anisining ismining atikem, dadisining ismining bolsa turdigayit ikenlikini ashkarilidi. Uning ashkarilishiche, atikem 3 yildin buyan, turdigayit bolsa bir yildin buyan yighiwélish lagérida tutup turulmaqta. Turdigayit we atikemning éniq qaysi lagérda ikenlikidin xewersizlikini éytqan bu xadim, ular lagérdiki mezgilide 3 yashliq perhat yaki peruxqa kimning qarawatqanliqi heqqide uchur bérelmidi. Melum bolushiche, turdigayit we atikem balisi sugha chüshüp qaza qilghandin kéyin, lagérdin bir qétim chiqish we uruq-tughqanliri bilen körüshüsh pursitige érishken. Éniqlashlirimizdin turdigayitning ilgiriki mesile tapshurush yighinlirida atalmish xataliqini iqrar qilghanliqi üchün lagérgha ekétilgenliki melum, emma uningdin ikki yil burun lagérgha ekétilgen atikemning néme üchün tutulghanliqi melum emes. Bayiqi xitay ahalining bayanliridin mezkur a'ilining 3 perzentlik ikenliki melum, emma qalghan ikki perzentining nediliki melum emes. 

Hörmetlik radi'o anglighuchilar, ötken yildin buyanqi ijtima'iy axbarattiki uchurlargha asasen élip barghan éniqlashlirimiz dawamida, xoten we qeshqerde rexmutulla shirbaqi we esma exmet qatarliq 4 neper nareside balining jesiti sudin süzüwélin'ghan we üstige qaynaqsu töküwélip ölgenliki we ularning ata-anisiningmu lagérda ikenliki delillen'genidi.

Toluq bet