Әнқәрәдики хитай әлчиханиси алдида намайиш

2007-10-01
Елхәт
Пикир
Share
Принт

Ankare-Namayish1-200.jpg
2007 - Йили 10 - айниң 1 - күни, әнқәрә хитай баш әлчиханисиниң алдидики намайиш. RFA Photo/Erkin Tarim

Хитай коммунистлириниң уйғур диярини бесивалғанлиқиниң 58-йиллиқи мунасивити билән хитайниң әнқәрәдә турушлуқ баш әлчиханисиниң алдида намайиш өткүзүлди. Шәрқий түркистан мәдәнийәт вә һәмкарлиқ җәмийити әнқәрә шөбиси мәсули хәйруллаһ әфәндигил әпәндиниң уюштуруши билән өткүзүлгән бу намайишқа, түркийиниң әң чоң аммиви тәшкилатлиридин бири болған түркийә кадирлар уюшмисиниң баш секритари фаһрәттин йоқуш әпәнди, түркийә маарипчилар уюшмисиниң мәсули шуайип әпәнди қатарлиқ кишиләр башчилиқида көп санда киши қатнашти. Булардин башқа бәзи сияси партийә мәсуллири вә әнқәрәдә яшаватқан уйғурларму бар.

Бу намайишқа қатнашқан кишиләр қолида түрк байриқи билән ай юлтузлуқ көк байрақни көтүргән һалда һәммә бирдәк, " ишғалчи хитайлар шәрқий түркистандин йоқал! бигунаһ инсанлар бу йәрдә, инсан һәқлири қәйәрдә ? террорист хитайлар шәрқий түркистандин чиқип кәт!" дегәнгә охшаш шуарларни товлашти.

Ankare-Namayish2-200.jpg
2007 - Йили 10 - айниң 1 - күни, әнқәрә хитай баш әчиханисиниң алдидики намайишқа қатнашқан уйғур вә турк қериндашлар. RFA Photo/Erkin Tarim

Кейин шәрқий түркистан мәдәнийәт вә һәмкарлиқ җәмийити әнқәрә шөбиси башлиқи хәйруллаһ әфәндигил әпәнди, мәтбуат баяннамисини оқуп өтти.

Бу намайиш җәрянида түркийә кадирлар уюшмиси баш секритари фаһрәттин йоқуш әпәнди, шәрқий түркистан мустәқиллиққа еришкичә давамлиқ хитай әлчиханисиниң алдида намайиш қилидиғанлиқини ейтип мундақ деди: "һәр йил бир қанчә қетим намайиш қилиш үчүн бу йәргә келиватимиз. Бу иш ахирлишиши керәк, дуня җамаәтчилики буни көрүши керәк. Биз шәрқий түркистанлиқлар әркинликигә еришкичә давамлиқ бу йәргә келип намайиш қилимиз. Уйғур түрклири һәргизму өзлирини ялғуз һес қилмисун , 70 милйон түрк хәлқи уйғурларниң йенида давамлиқ уларни қоллап қуввәтләйду. Пүтүн дуня хәлқи уйғурларни қоллап қуввәтлисә у йәрдә чоқум мустәқил шәрқий түркистан дөлити қурулиду. Биз давамлиқ уйғурларни қоллап қуввәтләймиз." (Әркин тарим)

Пикирләр (0)
Share
Толуқ бәт