Rabiye xanim ‏5 - iyul weqesini xelq'ara jem'iyetning musteqil tekshürüp éniqlishini telep qildi

Xelq'ara kechürüm teshkilati bügün ürümchi weqesi toghrisida bir doklat élan qilip, xitaygha küchlük so'al qoydi. Dunya Uyghur qurultiyining re'isi rabiye qadir xanim xelq'ara kechürüm teshkilatining doklatini qizghin qollidi we xelq'ara teshkilatning ürümchi weqesini musteqil tekshürüp éniqlishini qaytidin telep qildi.
Muxbirimiz weli
2010-07-02
Élxet
Pikir
Share
Print
Rabiye xanim, ürümchide yüz bergen 5 ‏- iyul namayishi qanliq basturulghandin kéyin, amérika döletlik axbarat kulubida, 2009 - yili 20 - iyul, 2 - qétim muxbirlar kütüwélish yighini chaqirip,  5 ‏- iyul namayishining qanliq basturulghanliqi we xitayning metbuatlardin némini yoshuruwatqanliqini toghrisida melumat berdi we muxbirlarning suallirigha jawap berdi.
Rabiye xanim, ürümchide yüz bergen 5 ‏- iyul namayishi qanliq basturulghandin kéyin, amérika döletlik axbarat kulubida, 2009 - yili 20 - iyul, 2 - qétim muxbirlar kütüwélish yighini chaqirip, 5 ‏- iyul namayishining qanliq basturulghanliqi we xitayning metbuatlardin némini yoshuruwatqanliqini toghrisida melumat berdi we muxbirlarning suallirigha jawap berdi.
RFA Photo

Bash orgini londondiki xelq'ara kechürüm teshkilati bügün, beshinchi iyul weqesi toghrisida mexsus doklat élan qilip, xitay hökümiti bir yildin buyan pütün dunyani jawabsiz qaldurghan so'allargha, emdi choqum jawab bérishi kéreklikini körsetti.

Xelq'ara kechürüm teshkilati bügün ürümchi weqesi toghrisida élan qilghan 35 betlik doklat, Uyghurlarning bu rayondiki kimliki, ürümchi shehiride turuwatqan ahalilerning ehwali, milliy kemsitishke uchrash, Uyghurlarning 'teng-barawerlik', 'adaletlik ' dep shu'ar towlap namayishqa chiqishi, namayishning qoralliq basturulushi, köchmen xitaylarning qozghighan hujumliri, hökümet teripidin cheklen'gen uchurlar, namayish qilghan Uyghurlarning sotlinishi, omumi baha, xitay hökümitige so'al... Qatarliq köp baplargha bölüp yézilghan.

Xelq'ara kechürüm teshkilatining bu doklatida, xitay hökümiti bultur 7 ‏- ayning 5 ‏- küni Uyghurlar ötküzgen namayishni basturghandin buyan, ta hazirgha qeder pütün dunyani jawabsiz qaldurghan so'allargha emdi choqum jawab bérishi kérekliki körsitilgen. Xelq'ara kechürüm teshkilatining bu doklat arqiliq xitay hökümitidin sorighan so'alliri 5‏ - iyul weqesi sewebidin qanche adem tutuldi? weqede qanche adem öldi? kimni kim öltürdi? qandaq öltürdi? néme üchün? uni xitay hökümiti qandaq bir terep qildi? némige asasen?... Dégen so'allardin ibaret.

Dunya Uyghur qurultiyining re'isi rabiye qadir xanim bügün xelq'ara kechürüm teshkilati Uyghurlar heqqide élan qilghan bu doklatni qizghin qollidi.

Dunya Uyghur qurultiyining re'isi rabiye qadir xanimning bayan qilishiche, xelq'ara kechürüm teshkilatining bu doklatida xitaydin soralghan bu so'allar, dunya Uyghur qurultiyi bir yildin buyan xitaydin sorap kéliwatqan so'allar, xitay buninggha jawab bérelmidi. Emma, bu so'allar xelq'arada étibarsiz qalmidi. Bu so'allarni bügün xelq'ara kechürüm teshkilati yene bir qétim dunyagha kötürüp chiqti.

Dunya Uyghur qurultiyining re'isi rabiye qadir xanimmu, xuddi xelq'ara kechürüm teshkilatigha oxshashla, pütün dunyadiki her qaysi döletlerdin, bultur ürümchide yüz bergen 5‏ - iyul weqesini musteqil tekshürüp éniqlashni telep qildi.

Yuqiridiki awaz ulinishidin, bu heqtiki melumatimizning tepsilatini anglaysiler.

Toluq bet