Erzdar abduréhim mollek aka yer mesilisi bilen 12 ‏-qétim yene béyjingda

Aqsu wilayitining onsu nahiye qizil déhqanchiliq meydanidin burun béyjinggha 11 qétim erz qilip kelgen 84 yashliq erzdar abduréhim mollek aka, 4 ayning aldida béyjingdin tutup kétilgen we yurtigha barghanda, yéngi meydan bashliqi uning yer mesilisini hel qilip béridighanliqi heqqide wede bergen we uningdin erz qilishtin toxtashni telep qilghan idi.
Muxbirimiz shöhret hoshur
2010-12-30
Élxet
Pikir
Share
Print
Süret, abduréhim bowayning béyjingdiki "erzdarlar" turidighan köwrük astida boshün tori muxbiri 18 - awghust  tartqan süriti.
Süret, abduréhim bowayning béyjingdiki "erzdarlar" turidighan köwrük astida boshün tori muxbiri 18 - awghust tartqan süriti.
http://news.boxun.com Din élindi.

Yéngi meydan bashliqi uning yer mesilisini bir terep qilish jeryanida, peqet uning 4 oghlining jayliq yéri we 70 mo térilghu yérini hel qilip bergen. Eslide abduréhim akining qolidin tartiwélin'ghan yerning omumi kölimi 220 mo bolup, abduréhim aka mesilining bu xil hel bolushidin razi bolmighan. U qolidin ketken yérini toluq qayturuwélish meqsitide ötken hepte béyjinggha 12-qétim seper qilip, erzini qaytidin bashlighan.

Abduréhim aka boz yer échip térilghu yer kölimini 220 mogha yetküzüsh jeryanida, 20 yilgha yéqin waqit serp qilghan. Bankidin köp miqdarda qerz élip, desmaye salghan. 1998 ‏-Yili uning térilghu yerliri qolidin tartiwélinip, gensudin kelgen xitay köchmenlirige bériwétilgende, u 5 oghli bilen birlikte jay-makansiz we yersiz qalghan. U uningdin kéyinki hayatini erz ishliri bilen ötküzüp yene köpligen qerzlerge boghulghan. Biz abduréhim aka bilen bir ayning aldida sözleshkinimizde, 220 mo yéri toluq qoligha qaytip kelmey turup, özi we perzentlirining weyranchiliqtin qutulalmaydighanliqini bildürgen.

Abduréhim aka 12 ‏-qétimliq erz sepiri üchün yolgha chiqqanda, yerlik da'iriler uni yolidin tosushqa yene urunup baqqan, emma u, yerlik da'irilerning aldash we qaymuqturushlirini bayqiwélip, yolidin yanmighan we ötken hepte béyjinggha yétip kelgen.

Abduréhim akining béyjingda uninggha hemrah bolup turuwatqan oghlining bildürüshiche, meydan bashliqi xen jyaménning zorawanliqliri ularning a'ilisini iqtisadiy jehettin weyranchiliqqa uchritipla qalmay, abduréhim akini rohiy jehettinmu qattiq azablighan. Gerche, xen jyamén wezipisidin élip tashlan'ghan bolsimu, abduréhim aka xen jyaméndin tartqan azab we xorluqlirini téxiche ésidin chiqiralmighan.

Toluq bet