Rabiye xanimning oghli alimjan abduréhimning hayati tehdit astida

" ... Méni qutquzuwélinglar méni ular öltürüwétidighan oxshaydu ... " Bu, rabiye qadir xanimning oghli alimjan abduréhimning ürümchidiki 4 türmide qérindashlirigha qilghan nalisi. Xitay saqchiliri 5 aydin buyan a'ilisidikiler bilen körüshtürmigen alimjanni héyt harpisida körüshtürgen.
Muxbirimiz gülchéhre
2010-09-16
Élxet
Pikir
Share
Print
Süret, rabiye xanimning oghli alimjan abduréhimning türmidiki süretliridin biri.
Süret, rabiye xanimning oghli alimjan abduréhimning türmidiki süretliridin biri.
www.uyghuramerican.org Din élindi.

Uyghur milliy herikiti rehbiri rabiye qadir xanim, öz arzuluq oghlining qiyin qistaq hem tayaq zerbisidin ténining hem rohiy halitining échinarliq ehwalgha chüshüp qalghanliqini ürümchidiki baliliridin, roza héyt küni xewerlen'gen.

Alimjan abduréhim héyt harpisida ürümchidiki qérindashliri bilen körüshtürülgen. Qérindashliri qattiq qiyin qistaqqa élinip tonughusiz halette ajizlap ketken inisini körüp azablan'ghan.

Alimjan ulargha özining türmide qattiq tayaq yigenlikini héchkimning uninggha ige chiqmighanliqini, ténining hem jénining zor xewp ichide ikenlikini éytqan hemde, "méni adem désenglar tézraq türmidin qutuldurup chiqinglar,  bolmisa ölüp kétidighan oxshaymen dep ötün'gen."

Rabiye qadir xanim xitay türmisidin qutulup amérikigha kélip, resmi Uyghur milliy herikitige rehberlik qilghandin kéyin xitay hökümiti uning oghullirini türmige alghan idi. Yeni alimjan abduréhimni 2006 - yili baj oghrilash jinayiti bilen 7 yilliq qamaq jazasigha, ablikim abduréhimni xitayning bixeterlikige tehdit yetküzüsh we bölgünchilik jinayetliri bilen eyiblep uningdinmu uzaq qamaq jazasigha höküm qilghan idi.

Özini yalghuz baliliriningla emes pütün Uyghurlarning anisi dep tonighan bu pidakar ana, gerche héyt küni istansimizning ziyaritini qobul qilip pütün dunya musulmanlirigha we Uyghurlargha héytliq mubarek sözlirini qiliwatqinida bolsa öz oghlining échinarliq ehwalda ikenlikidin hetta hayatining tehdit astida ikenlikidin xewerdar idi. Emma u qayghusini yutup, ziyaritimiz jeryanida bizning bu ehwallarni héyt künide anglatmasliqimizni ötün'gen idi.

Bügün yeni 16 - séntebir küni merkizi washin'gtondiki xelq'ara Uyghur kishilik hoquq programmisi, pütün dunya jama'itini, xitay hökümitining alimjan abduréhimni qoyuwétishi toghriliq bésim ishlitishke chaqirip murajet élan qildi.

Murajette rabiye qadir xanimning oghli alimjan abduréhimning xitay türmiside qattiq qiyin qistaqqa élin'ghanliqi üchün, uning hayatining xewp astida ikenliki, rabiye qadir xanim hemde pütün Uyghurlarning xitay türmiside hayati xewp ichidiki alimjan we xitay türmisidiki barliq Uyghur tutqunlarning weziyitidin jiddiy endishide ikenliki tekitlen'gen.

Rabiye qadir xanimning amérikidiki baliliridin qizi ra'ile xanim ziyaritimizni qobul qilip, alimjan we xitay bésimida qalghan bashqa qérindashliridin intayin endishe qiliwatqanliqini, inisining weziyitining türmidiki barliq Uyghurlarning weziyitini eks ettürüp béridighanliqini bildürdi.
 
Biz rabiye qadir xanimni bügün qayta ziyaret qilip, oghli alimjanning ehwalidin xewer tapqandin kéyin némilerni oylawatqanliqi hem uni qutuldurush yolida qandaq heriket qollan'ghanliqi toghrisida ehwal igiliduq.

Yuqiridiki awaz ulinishidin, bu heqtiki melumatimizning tepsilatini anglaysiler.
Toluq bet