'Америкида сиясәтчиләргә болған ишәнч төвәнлимәктә'

Америкидики әң чоң гезит "вашингтон почтиси гезити" дә америка хәлқиниң, америка сиясәтчилиридин нарази икәнлики тоғрисидики мақалиләр көпләп елан қилинмақта. Хәлқниң һөкүмәткә болған наразилиқини иккиләнмәстин ашкарилашниң, һөкүмәтниң сияситини тоғра йөнүлүшкә башлашта муһим рол ойнайдиғанлиқини билдүргән америкидики нурий түркәл әпәнди, хитайда сиясәтчиләр үстидин шикайәт қилишниң имканийәтсиз икәнликини оттуриға қойди.
Мухбиримиз әқидә
2010-02-25
Елхәт
Пикир
Share
Принт

Вашингтон почтиси гезитидә елан қилинған "америкида сиясәтчиләргә болған ишәнч төвәнлимәктә" дегән мақалидә, америкидики сиясәтчиләргә нисбәтән, хәлқиниң ишәнчисиниң күнсери пәсийип кетиватқанлиқи болупму, дөләт мәҗлисидики вәкилләрниң, хәлқ үчүн әмәлий бир хизмәт ишләп берәлмәйватқанлиқи һәққидики тәнқидләр баян қилинған.

Мақалидә, хәлқниң америкидики икки муһим сиясий күч - җумһурийәтчи партийә билән демократик партийә үстидин ашкара нарази икәнлики, сиясәтчиләрни пәқәт сайлам өзигә қизиқтуруп келиватқанлиқи шуниңдәк уларниң хәлқ үчүн баш қатурмайватқанлиқи тилға елинған.

Буниң билән тәң, йәнә бир қисим парламент вәкиллириниң қайта елип берилидиған сайламға қатнашмаслиққа мәҗбурлиниватқанлиқи тоғрисидики мәсилиләрму мақалидә көрситилгән болуп, индиана шитатидики дөләт мәҗлиси вәкили еван бай әпәнди мундақ дегән: "мениң мәқситим, мени вәкили қилип сайлиған хәлқим үчүн хизмәт қилиш, мән пүтүн өмрүмни әнә шу мәқсәтни ишқа ашурушқа беғишлиғанмән, амма мән дөләт мәҗлисидә йәнә давамлиқ туралмаймән, чүнки дөләт мәҗлиси һазир һич бир ишни әмәлгә ашуралмайдиған бир җайға айлинип қалди."

Дөләт мәҗлиси вәкили иван байниң сайламға қатнашмаслиқ қарари һәққидә өз қаришини оттуриға қойған америкидики актип уйғур паалийәтчи адвокат нурй түркәл әпәнди, америкидики партийиләр оттурисида йүз бериватқан пикир ихтилаплириниң нормал бир әһвал икәнликини билдүрди.

Мақалидә йәнә америка хәлқиниң, җумһурийәтчиләр билән демократлар оттурисидики зиддийәттин зириккәнлики тәкитлинип, барак обаманиң " вашингтондики гуруһларниң бир - бирини йоқитиш һәләкчилики билән болуп, дөләтниң тарихта көрүлүп бақмиған кризистин қутулуп чиқиш мәсилисгә көңүл бөлмәйватқанлиқи, ишсизлиққа охшаш хәтәрлик мәсилиләрни һәл қилишниң нөвәттики әң муһим вәзипә икәнлики " һәққидики сөзигә алаһидә орун берилгән.

Буниң әксичә демократ партийини "обама вә демократчиларниң көзи қарғу, қулиқи гас" дәп тәнқид қилған дөләт мәҗлиси әзаси том прайисниң "америка вәзийитини яхшилаш үчүн, җумһурийәтчиләрниң мәйданға наһайити яхши тәклипләр билән чүшкәнлики, бирақ уларниң мәзкур пикиригә қарита һечким һечқандақ ипадә билдүрмигәнлики" һәққидики сөзлири баян қилинип, сиясәтчи мет даллекниң" : нөвәттә бир мәсилини һәл қилиш үчүн қанунчиларниң өз ‏- ара бирликкә келиши толиму қейинлашти " дегән сөзи вә қануншунас боб едгарниң " бизниң сиясәтчилиримиз бәкму партийәваз болуп кәтти, бурун демократлар билән җумһурийәтчиләр һәмкарлишип биргә хизмәт қилатти, һазир икки тәрәп оттурисида талаш - тартиштин башқа иш йоқ" дегән сөзлири мақалидә йәр алған.

Қануншунас боб едгар йәнә, 1970 ‏- вә 1980 ‏-‏- йиллардики америка вәзийити һәққидә тохтилип ": гәрчә у дәврләрдә охшаш болмиған партийиләр арисида пәрқләр болсиму, партийиләр сайлам аяқлиши билән тәң, өз - ара бирликкә келип хизмәт елип баратти, болупму хәлқ алдида бәргән вәдисигә әмәл қилип, хәлқ үчүн хизмәт көрситишни алдинқи орунға қоятти " дәп көрсәткән.

Адвокат нурий әпәнди, қандақ болушидин қәтий нәзәр, америкида узун йиллардин буян мукәммәл давамлишип келиватқан сиясий системиниң мәвҗут икәнликини, һөкүмәт ичидики һәр қайси қатламлар оттурисида баравәр асаста һоқуқ имтиязлириға игә болуштәк демократик түзүмниң йолға қоюлуватқанлиқини билдүрди.

Нурий түркәл әпәнди сөзиниң ахирида америкидики бу хил мукәммәл сиясий түзүлминиң хитайда йолға қоюлушиниң әсла мумкин әмәсликини көрситип өтти.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Толуқ бәт