'Amérikida siyasetchilerge bolghan ishench töwenlimekte'

Amérikidiki eng chong gézit "washin'gton pochtisi géziti" de amérika xelqining, amérika siyasetchiliridin narazi ikenliki toghrisidiki maqaliler köplep élan qilinmaqta. Xelqning hökümetke bolghan naraziliqini ikkilenmestin ashkarilashning, hökümetning siyasitini toghra yönülüshke bashlashta muhim rol oynaydighanliqini bildürgen amérikidiki nuriy türkel ependi, xitayda siyasetchiler üstidin shikayet qilishning imkaniyetsiz ikenlikini otturigha qoydi.
Muxbirimiz eqide
2010-02-25
Élxet
Pikir
Share
Print

Washin'gton pochtisi gézitide élan qilin'ghan "amérikida siyasetchilerge bolghan ishench töwenlimekte" dégen maqalide, amérikidiki siyasetchilerge nisbeten, xelqining ishenchisining künséri pesiyip kétiwatqanliqi bolupmu, dölet mejlisidiki wekillerning, xelq üchün emeliy bir xizmet ishlep bérelmeywatqanliqi heqqidiki tenqidler bayan qilin'ghan.

Maqalide, xelqning amérikidiki ikki muhim siyasiy küch - jumhuriyetchi partiye bilen démokratik partiye üstidin ashkara narazi ikenliki, siyasetchilerni peqet saylam özige qiziqturup kéliwatqanliqi shuningdek ularning xelq üchün bash qaturmaywatqanliqi tilgha élin'ghan.

Buning bilen teng, yene bir qisim parlamént wekillirining qayta élip bérilidighan saylamgha qatnashmasliqqa mejburliniwatqanliqi toghrisidiki mesililermu maqalide körsitilgen bolup, indi'ana shitatidiki dölet mejlisi wekili éwan bay ependi mundaq dégen: "méning meqsitim, méni wekili qilip saylighan xelqim üchün xizmet qilish, men pütün ömrümni ene shu meqsetni ishqa ashurushqa béghishlighanmen, amma men dölet mejliside yene dawamliq turalmaymen, chünki dölet mejlisi hazir hich bir ishni emelge ashuralmaydighan bir jaygha aylinip qaldi."

Dölet mejlisi wekili iwan bayning saylamgha qatnashmasliq qarari heqqide öz qarishini otturigha qoyghan amérikidiki aktip Uyghur pa'aliyetchi adwokat nury türkel ependi, amérikidiki partiyiler otturisida yüz bériwatqan pikir ixtilaplirining normal bir ehwal ikenlikini bildürdi.

Maqalide yene amérika xelqining, jumhuriyetchiler bilen démokratlar otturisidiki ziddiyettin zirikkenliki tekitlinip, barak obamaning " washin'gtondiki guruhlarning bir - birini yoqitish helekchiliki bilen bolup, döletning tarixta körülüp baqmighan krizistin qutulup chiqish mesilisge köngül bölmeywatqanliqi, ishsizliqqa oxshash xeterlik mesililerni hel qilishning nöwettiki eng muhim wezipe ikenliki " heqqidiki sözige alahide orun bérilgen.

Buning eksiche démokrat partiyini "obama we démokratchilarning közi qarghu, quliqi gas" dep tenqid qilghan dölet mejlisi ezasi tom prayisning "amérika weziyitini yaxshilash üchün, jumhuriyetchilerning meydan'gha nahayiti yaxshi teklipler bilen chüshkenliki, biraq ularning mezkur pikirige qarita héchkim héchqandaq ipade bildürmigenliki" heqqidiki sözliri bayan qilinip, siyasetchi mét dallékning" : nöwette bir mesilini hel qilish üchün qanunchilarning öz ‏- ara birlikke kélishi tolimu qéyinlashti " dégen sözi we qanunshunas bob édgarning " bizning siyasetchilirimiz bekmu partiyewaz bolup ketti, burun démokratlar bilen jumhuriyetchiler hemkarliship birge xizmet qilatti, hazir ikki terep otturisida talash - tartishtin bashqa ish yoq" dégen sözliri maqalide yer alghan.

Qanunshunas bob édgar yene, 1970 ‏- we 1980 ‏-‏- yillardiki amérika weziyiti heqqide toxtilip ": gerche u dewrlerde oxshash bolmighan partiyiler arisida perqler bolsimu, partiyiler saylam ayaqlishi bilen teng, öz - ara birlikke kélip xizmet élip baratti, bolupmu xelq aldida bergen wedisige emel qilip, xelq üchün xizmet körsitishni aldinqi orun'gha qoyatti " dep körsetken.

Adwokat nuriy ependi, qandaq bolushidin qet'iy nezer, amérikida uzun yillardin buyan mukemmel dawamliship kéliwatqan siyasiy sistémining mewjut ikenlikini, hökümet ichidiki her qaysi qatlamlar otturisida barawer asasta hoquq imtiyazlirigha ige bolushtek démokratik tüzümning yolgha qoyuluwatqanliqini bildürdi.

Nuriy türkel ependi sözining axirida amérikidiki bu xil mukemmel siyasiy tüzülmining xitayda yolgha qoyulushining esla mumkin emeslikini körsitip ötti.

Yuqiridiki awaz ulinishidin, bu heqtiki melumatimizning tepsilatini anglaysiler.

Toluq bet