Чәт әлләрдики уйғурлар пәрзәнтлириниң ана тил өгинишигә әһмийәт бәрмәктә

2007-08-15
Елхәт
Пикир
Share
Принт

Чәт әлләрдә яшаватқан уйғурларниң балилири узун йиллардин буян, өзлири турушлуқ дөләтләрниң маарип системиси бойичә тәрбийилинип, яхши нәтиҗиләргә еришип, даңлиқ алий мәктәпләргә қобул қилинмақта. Әмма, уйғур ата ‏- анилар балилириниң нәтиҗилиридин қанаәтлиниш билән чәклинип қалмай, уларниң ана тил өгинишигиму наһайити әһмийәт бәрмәктә.

Балиларниң әң кичики 3 яшта

Мәйли қайси дөләттә болмисун, уйғурларниң балиларға уйғур тили өгитиш үчүн мәктәпләрни ачқанлиқини, һеч болмиса балиларни бир ариға җәм қилип, өйләрдә уйғур тили дәрси бериливатқанлиқини аңлап турисиз. Америкиниң лос - анҗилис шәһиридики яш зиялийлар халисанә тәшкиллинип, уйғур балилириға ана тил дәрси өтүшни өзигә вәзипә қилған болуп, кишини тәсирләндүридиғини шуки ана тил өгиниватқан балиларниң әң кичики 3 яшта икән.

Америкиниң лос - анҗилис шәһиридики яш уйғур зиялийлири, бу шәһәрдә яшаватқан уйғур пәрзәнтләрниң ана тил өгиниш қийинчилиқини һәл қилиш үчүн, балиларни бир ариға җәм қилип, уйғур тили өгәтмәктә.

Һәптидә бир күн балилар үчүн

Хизмәт вә өгиниш вәзипилириниң еғирлиқи шуниңдәк вақитниң қислиқиға қаримай, балиларға уйғур тили өгитиш үчүн тәшкилләнгән меһрай , зәмирә, қурбанҗан вә нурнисалар һәптидә бир күнни аҗритип дәрс өткәндин сирт, дәрс өтидиған синип болмаслиқтәк қийинчилиқларни болса, өз өйлирини синип қилип ишлитиш арқилиқ йәңгән.

Болупму кишини һаяҗанландуридиғини шуки, ана тил өгиниватқан балиларниң әң кичики 3 яшта болуп, инглиз тили йәслилиридики уйғур балиларни нәзәрдә тутқан оқутқучилар кичик яштики уйғур пәрзәнтлиригиму, ана тили өгитиш керәкликини тонуп йәткән.

Оқутқучилар , кичик яштики балиларға қизиқарлиқ оюнлар, тепишмақ һекайиләр сөзләш арқилиқ уларниң тил өгинишигә қолайлиқ шараит һазирлиған.

яш зиялий зәмирә ханим, өз өйини балиларға дәрсхана қилип һазирлап, балиларға өзигә лайиқ қизиқарлиқ усуллар билән уйғур тили өгәтмәктә .

Йәнә бир оқутқучи меһрай ханим болса, балиларға ана тил өгитишниң әһмийитиниң зорлуқини тәкитлиди. (Әқидә)

Пикирләр (0)
Share
Толуқ бәт