Атеизм вә униң сәпсәтиси

Атеизм - "йоқ" луқ пикри үстигә қурулған вә яратқучиниң барлиқини инкар қилишни асаси тема қилған, пүтүн динларни, шундақла ахирәт алимини инкар қилидиған пәлсәпиви еқимдур. Атеизмчилар дунядики һәммә нәрсиниң өзлүкидин пәйда болғанлиқини вә яратқучиниң йоқлуқини дәва қилғучилардур.
Ихтиярий мухбиримиз өмәрҗан
2010-12-22
Елхәт
Пикир
Share
Принт

Ислам дунясида бирдәк етирап қилинған бүйүк алим доктор йүсүп әл қәрдави атеизмни тонуштуруп мундақ дәп язиду: "атеизм яратқучини инкар қилиштин ибарәт һазирқи мәниси билән қәдимдә мәвҗут әмәс иди. «Атеизм» сөзи пәқәт һәқ динниң тәлиматлириға әгәшмигәнләр яки көп илаһлиқ батил динларға етиқад қилидиғанлар вә қиямәт күнини инкар қилидиған аз сандики шәхсләр үчүнла қоллинилған иди. Қуран кәриминиң җасийә сүрисидики: [қиямәт күнини инкар қилғучилар:" һаят дегән пәқәт дунядики һаятимиздур, өлүмиз вә тирилимиз (йәни туғулимиз), пәқәт заманниң өтүши билән йоқ болимиз " дәйду. Улар бу хусуста һечқандақ мәлуматқа игә әмәс, улар пәқәт гуман биләнла сөзләйду] дегән айәт бу мәнини ипадиләш билән биргә аллаһни вә қиямәт күнини инкар қилғучиларниң һечқандақ илмий асасқа игә әмәслики вә пәқәт гуман, хиял вә хата тәсәввурғила тайинидиғанлиқини баян қилған. Дәрвәқә, атеизмчиларниң илмий асасқа йөләнмигән бу пучәк пәлсәписи узунға бармиди. явропаниң физика, биологийә вә башқа тәбиий пән илимлири бүгүнки күндикидәк тәрәққий қилмиған, қараңғулуқ әсирлиридә хели базар тепип қалған бу сәпсәтә еқими алланиң барлиқини илмий асаста испатлиған илим - пән алдида пут тирәп туралмиди вә һаман сәһнидин чүшкән иди. Заманимизда илим - пән саһәсидә тәрәққий қилған явропа әллири илим - пәнниң аллаһға башлайдиған йетәкчилики арқисида қайтидин иманға келип өзлирини оңшивалған вә атеизмчиларниң бу пучәк пәлсәписини аллибурун чөрүп ташлиған мушу әсирдә, атеизм пәлсәписи вә еқими илим - пәндин несивә алалмиған үчинчи дуня әллириниң бәзисидә хәлқни һәқиқәтләрдин қаймуқтуруш арқилиқ идарә қилиш үчүнла қоллинилмақта."

Доктор йүсүп әл қәрдави йәнә мундақ дәп язиду: "тәврат, инҗил вә қуран кәримидә «атеизм» сөзиниң һазирқи мәнисидә ишлитилгәнликини тапқили болмайду. Чүнки қәдимдә аллаһ тааланиң барлиқиға инкар қилидиған җәмийәт яки атеизм пәлсәпә еқими йоқ иди. Қуран кәрим айәтлиридә кәлгән «әл илһад» (атеизм) сөзи һазирқи мәнидики аллаһни инкар қилиш мәнисидә кәлгән әмәс. Чүнки шу вақиттики куффар әрәбләр вә көп илаһларға етиқад қилғучиларниң һечқайсиси аллаһ тааланиң барлиқини инкар қилмайтти вә өзлири чоқунған нәрсилирини өзлирини аллаһқа йеқинлаштурғучи васитиләр яки кичик илаһлар дәп атайтти. Аллаһ таала буни билдүрүп пәйғәмбәр әләйһиссаламға: әгәр сән улардин: 'асманларни вә земинни ким яратти, күнни вә айни ким бәндиләрниң мәнпәити үчүн бойсундурди?' дәп сорисаң, улар чоқум: 'аллаһ' дәп җаваб бериду, улар қандақму (алланиң ибадитидин) баш тартиду!" дегән.

Һазирқи мәнидики атеизм еқими явропада черкавларниң һакимийити заваллиққа йүзләнгәндин кейин, 17- әсирниң ахири мәйданға чиққан болуп, 19- әсирниң башлирида рәсмий раваҗ тапқан иди. Бу вақитлар карл маркс билән чарлз дарвинлар яшиған вақитлар иди. Атеизм пикри тәдриҗий һалда тәрәққий қилип кейинчә германийилик пәйласоп шубинһавир (1788-1860) тәрипидин рәсмий пәлсәпә түсини алған вә «дин - инсанлар тәрипидин иҗад қилинған нәрсә. Инсанлар өзлири үчүн мәҗһул болған тәбиәт һадисилирини шәрһләш үчүн динни иҗад қилған. Буниңдин мәқсәт кишиләрниң турмушини рәткә селиш иди» дегән нәзәрийә елан қилинишқа башлиған. Карл маркс «дин - әпйүн» дегән сәпсәтини оттуриға қойған. Шуниңға охшаш атеизм пәлсәписигә чақиридиғанлар һәр хил сәпсәтилирини оттуриға чиқириш арқилиқ хәлқни диндин ваз кечишкә қайил қилишқа тиришқан.»

Толуқ бәт