Benezir butto dadisi zulfiqar eli buttoning yénigha depne qilindi

2007-12-28
Élxet
Pikir
Share
Print

Tünügün süyqestke uchrap qaza qilghan pakistanning sabiq bash ministiri benezir butto bügün öz yurti garhi xuda béhishtiki dadisi zulfiqar eli buttoning yénigha depne qilindi. Butto xanimning méyiti sélin'ghan tawut üstige uning partiyisi - xelq partiyisining bayriqi yépilghan idi.

Benezir xanimning méyit namizini uzitishqa nechche ming hazidar qatnashti

Butto xanim pakistanda 2008- yili 8- yanwar élip bérilidighan parlamént saylimi üchün rawalpindi ölkiside pa'aliyet élip bériwatqanda süyqestke uchrighan bolup, pakistan prézidénti uning ölümi üchün üch kün dölet matimi tutushni bildürgen we buttoning ölümi üchün ghezepke kelgen ammini özini tutuwélishqa we sebre qilishqa chaqirghan bolsimu, emma butto xanining qollighuchiliri butto xanimgha musherrep qest qildi dep tonughachqa pakistanda herxil shekildiki qan tökülüsh jüme künigiche dawam etti. Netijide ammiwi qatnash toxtitildi we bazarlar taqaldi.

Benezir xanimning méyit namizini uzitishqa uning yoldishi, üch balisi yétip kelgen bolup, ulargha nechche ming hazidar jor bolghan bolghachqa qarimaqqa pütün pakistan matemge chömgendek qilatti.

Benezir buttoning qestke uchrishigha qarita dunyaning herqaysi jaylirida eyibleshler meydan'gha keldi

Dunyaning herqaysi jaylirida, washin'gtondin déhlighiche, londondin kabulghiche benezir buttoning qestke uchrishigha qarita eyibleshler terep-tereptin tökülüshke bashlidi.

Birleshken döletler teshkilati bixeterlik kéngishi bilet tashlap, mezkur qatilliqni qattiq eyiblidi hemde bashqa döletlerni qatilliqqa sewebchi kishilerni adalet soti aldigha élip kélishte ortaq hemkarlishishqa chaqirdi.

Benezir buttoning öz xelqni démokratiyige érishtürüsh üchün töligen bedilige yuqiri baha bergen en'gliye bash weziri gordon brawn: "butto démokratiyini qolgha keltürüsh üchün hemme némisini dogha tikti. Mana u hazir ashu démokratiyidin qorqudighan toxu yürekler teripidin öltürüldi" dédi.

Hindistan bash ministiri manmaxan sin'g: "bu zémin démokratiye üchün ter tökküchi we öz dölitige tinchliq élip kelgüchidin ayrildi"

Hindistan bash ministiri manmaxan sin'g, buttoning ornini her qandaq bir pakistanliqning basalmaydighanliqini bildürdi we: "bu zémin démokratiye üchün ter tökküchi we öz dölitige tinchliq élip kelgüchidin ayrildi" dédi.

Birleshme agéntliqida benezir buttoning hayatigha béghishlap yézilghan " buttoning ensiz hayatining tragédiyilik xatimisi" namliq maqalide u, wetenperwer we jesur ayal dep otturigha qoyuldi. Maqalide yene, gherb dunyasigha nisbeten benezir butto pakistanning obrazi, ayallar hoquqining yolbashchisi we zamanimizda bir musulman döletni yéteklesh ghayisidin waz kechmigen tunji ayal dep teriplendi.

Mushu hepte seyshenbe küni benezir butto bilen islam'abadta körüshken afghanistan prézidénti hamid karzay, butto xanining ölümidin özining qattiq ich aghriqi tartqanliqini bildürüp: "bu jesur singlimiz mushu rayon üchün özini ata qildi" dédi.

Butto xanim: " eger ölüp ketsem musherrep mes'ul"

S n n ning ashkarilishiche, tunji qétimliq hujumda hayat qalghan butto xanim s n n diki uzun yilliq dosti mark se'igelge yazghan xétide, musherrepning uni qoghdashqa yéterlik bixeterlik tedbirlirini almighanliqini eger ölüp ketse musherrepning mes'ul ikenlikini otturigha qoyghan.

B b s da körsitishiche, butto xanimning méyitini uzatquchilarning köpinchisi butto xanimni musherrep öltürdi dep qaraydiken. Melum bolushiche, bügün pütün pakistan miqyasida nurghun jaylarda namayishlar bolup ötken. Sindh ölkiside bir yoluchilar poyizigha ot qoyuwétilgen we karachida élip bérilghan namayish jeryanida saqchilar namayishchilargha oq chiqirip bir nechche ademni öltürgen.

Bu xildiki namayish multan we punjab ölkiliridimu élip bérilghan bolup, bezi mutexessisler pakistanda yene herbiy halet yürgüzüsh zörür dep qarishiwatqan bolsimu, emma nyu-york waqit gézitide körsitilishiche, pakistanda turushluq saylam teshkillesh ornidiki tehlilchi ijaz gilani eger musherrep namayishlarni bésiqturush üchün yene herbiy halet yürgüzse téximu qattiq qarshiliqqa uchrishi mumkinlikini otturigha qoyushmaqta.

El qa'ide teshkilati butto xanimni özlirining öltürgenlikini jakarlidi

Asiya waqit gézitige asaslan'ghanda, hazirche el qa'ide teshkilati komandiri mustafa aba alyazid butto xanimni özlirining öltürgenlikini ten alghan bolsimu, emma amérika bixeterlik organliri we fédératsiye tekshürüsh idarisi el qa'idining bu bayanati ustidin tekshürüsh élip baridighanliqini bildürgen.

Benezir buttoning hayatigha bir nezer

Butto xanim 1953 ‏- yili tughulghan bolup, 1988 ‏- yili 35 yéshida pakistanning bash ministirliq wezipisini tapshurup alghan, emma wezipige olturup bir yérim yildin köprek waqit ötkendin kiyin para élish jinayiti bilen eyiblinip eyni waqittiki pakistan prézidénti ghulam isaqxan teripidin wezipisidin élip tashlan'ghan.

U 1993- yili pakistan'gha ikkinchi qétim bash ministir bolup saylan'ghan bolsimu, lékin 1996- yili oxshash gunah artilip wezipisidin qaldurulghan we 1998- yilidin bashlap dubey shehiride sürgünde yashawatqan idi. U bu yil 18- öktebir wetini pakistan'gha qaytip kélip parlamént saylimigha qatnishish üchün pa'aliyet élip bériwatqan bolup ikki aygha yetmigen waqit ichide pakistanning nurghun jaylirida nutuq sözlep xelqning himayisige érishken idi.

Benezir butto xanim pakistan'gha qaytqandin buyan ikki qétim hujumgha uchrighan bolup, aldinqi qétimliq hujumda saq qalghan bolsimu, emma kéyinki qétimliq hujumda hayatidin ayrilghan.

Melum bolushiche, butto xanim özini öltürüwélish xaraktérlik hujumda zexmige uchrimay hayat qalghan bolsimu, emma mezkur qatil özini qoshup partlitishtin ilgiri butto xanimgha atqan oq uning boynigha we kökrikige tekken.

Nawaz shérif ependi saylamni bayqut qildi

2008- Yili 8- awghust pakistanda parlamént saylimi élip bérilidu, mezkur saylamgha qatnishish üchün pa'aliyet élip bériwatqan namratlarning birsi bolghan butto xanim qestke uchrighan we yene bir namzat hemde sabiq bash ministir nawaz shérif ependi bu saylamni bayqut qilghanliqini jakarlighan bolsimu, emma pakistan hökümiti saylamning öz waqtida élip bérilidighanliqini ilgiri sürmekte. (Jüme)

Pikirler (0)
Share
Toluq bet