Хитай, дөләт байрими мәзгилидә қаттиқ бихәтәрлик тәдбирлири алмақта

Хитай дөләт байрими мәзгилидә, мурасимни сақ - саламәт өткүзүвелиш үчүн бихәтәрлик тәдбирлирини күчәйтмәктә. Бейҗиң шәһәрлик һөкүмәт дөләт байрими мәзгилидә қаттиқ бихәтәрлик тәдбирлири алған болуп, бейҗиң даирилири һазир бейҗиңниң өзигила 6000 дин артуқ сақчи орунлаштуруш билән бирликтә йәнә 800 миң әтрапида кишини байрам күнлиридә кочиларда бихәтәрлик қоғдашқа орунлаштурған.
Мухбиримиз миһрибан
2009-09-29
Елхәт
Пикир
Share
Принт
Сүрәттә, 27 - сентәбир, бейҗиң кочилирида хитай пуқралириниң сомкилирини ахтуруватқан көрүнүш.
Сүрәттә, 27 - сентәбир, бейҗиң кочилирида хитай пуқралириниң сомкилирини ахтуруватқан көрүнүш.
AFP Photo

Хитайниң шинхуа агентлиқи 28 - сентәбир күни, бейҗиң шәһәрлик сақчи идарисиниң дөләт байрими мәзгилидики қатнаш бихәтәрлик тәдбирлирини елан қилди. 26 Маддидин тәркип тапқан бу уқтурушта, 9 - айниң 28 - күни кечә саәт 22 дин 1 - өктәбир күни кечилик бирләшмә көңүл ечиш йиғини ахирлашқичә, тиянәнмен мәйдани, гугоң хан сарийи, җәнубий чаңән йоли, хәлқ мәдәнийәт сарийи, җуңшән бағчиси қатарлиқ тәбрикләш паалийити өткүзүлидиған җайларға йиғинға қатнишиш иҗазәтнамиси алған кишиләр һәм машинилардин башқа һәрқандақ адәм вә машиниларниң кириши чәкләнгән. 1 - Өктәбир күнидики тәбрикләш паалийити аяқлашқандин кейин таки 8 - өктәбир күнигичә гугоң хан сарийи саяһәтчиләргә ечилмайдиған болуп, бу районғиму иҗазәтнамиси бар кишиләр вә машиниларла кирәләйдикән.

29 - Сентәбирдин 1 - өктәбиргичә җуңшән бағчиси, хәлқ мәдәнийәт сарийи, мавзедуң хатирә сарийи, дөләтлик музейхана, қатарлиқлар саяһәтчиләргә ечилмайдикән, тийәнәнмен мәйдани әтрапидики барлиқ сода сарайлирида сода тохтайдикән. Тәбрикләш паалийити мәзгилидә, һәрқандақ йүк машинисиниң бейҗиң шәһиригә кириши чәклинидикән,бейҗиң шәһиридә қатнайдиған коча аптобуслириниңму тәбрикләш паалийити болидиған районларда қатниши чәклинидикән,1 - өктәбир күни йиғин ахирлашқучә болған арилиқта йәр асти пойиз йолиниң 1 - линийисидә қатнаш тохтайдикән, 2 -, 5 - 10 - қатнаш линийилири йөнилишини өзгәртидикән, пәқәтла 4 - линийила йеңидин бәлгилигән йөнилиш бойичә маңидикән.

Шинхуа агентлиқиниң бейҗиңдин бәргән хәвиридә йәнә: "дөләт байрими мәзгилидә, бир милйон 400 миң кишидин тәркип тапқан "пуқралар аманлиқ сақлаш әтрити"ниң сақчиларға маслишип, бейҗиң шәһириниң аманлиқини қоғдайдиғанлиқини, 15 - сентәбир күни кечә саәт 0 дин 8 - өктәбир күни саәт 0 гичә болған арилиқта, бейҗиң шәһириниң һөкүмәт мәмури идарилири җайлашқан районида, һәр қандақ һаләттики учуш мәшғулатлири чәклинидиғанлиқи, пуқраларниң хәт тошуғучи кәптәрлири һәм ләгләк учурушиға йол қоюлмайдиғанлиқи, һәр хил учар җисимлар моделлири сатидиған дуканларниңму учуш чәкләнгән мәзгилдә, учар җисимлар моделлири сетивалғучиларниң кимликини тизимлап уларниң исимликини җамаәт хәвпсизлик идарилиригә йоллап бериши керәклики, бу мәзгилдә өткүзүлгән той мурасими вә һәр хил тәбрикләш паалийәтлиридә һаваға шар қоюп беришниң чәклинидиғанлиқини хәвәр қилди.

Хитай дөләт байрими мәзгилидә пүтүн мәмликәт миқясида бихәтәрлик тәдбирлирини күчәйткән болуп, уйғур елидиму дөләт байриминиң бихәтәрликини қоғдаш баһаниси билән,бихәтәрлик тәдбирлири күчәйтилгән. Әркин асия радио истансисиниң уйғур бөлүмимизгә радио аңлиғучилиримиздин кәлгән инкаслардин мәлум болушичә, хитайниң дөләт байрими мәзгилидә, үрүмчи шәһиридә қаттиқ бихәтәрлик тәдбирлири елинған болуп, үрүмчигә уйғур аптоном райониниң җәнубий һәм шималидин келидиған йолучилар аптобуслириниң байрам мәзгилидә үрүмчигә киргүзүлмәйдиғанлиқи уқтуруш қилинған. Уйғурлар мәркәзлик олтурақлашқан районларға, кечилири қораллиқ сақчилар көпәйтилгән.

Хитайниң дөләт байрими мәзгилидә бихәтәрлик тәдбирлирини күчәйткәнлики һәққидә чәтәл агентлиқлиридиму хәвәрләр бериливатқан болуп, б б с агентлиқиниң хәвәр қилишичә, бейҗиң шәһәрлик һөкүмәт дөләт байрими мәзгилидә 22 - сентәбирдин 8 - сентәбиргичә болған арилиқта әрздарларниң бейҗиң шәһиригә киришини чәклигән, бошүн тор бетиниң хәвиригә қариғанда 22 - сентәбир күни кечидин башлап, бейҗиң шәһиридики барлиқ әрздарлар бир кечидила үн - түнсиз ғайип болған, бейҗиң шәһәр аһалиси мухбирға уларниң маҗиалу түрмиси, яки мусапирлар мәркизигә елип кетилгән икән. Әрздарлар илгири турған җайлар тазилинип бу җайда кишини шүркәндүргидәк җимҗитлиқ һөкүм сүрмәктә икән.

Хитайниң дөләт байрими мәзгилидә, бейҗиң шәһириниң ғәрбий шәһәр райониға, ениқлиқ дәриҗиси 1080 п дәриҗилик тил камера орнитилған болуп, 360 градус пирқирап сүрәткә алидиған бу синалғу апаратида бирла вақитта 2 милйон парчә сүрәт тартқили болидикән, бу аппарат бейҗиң пуқралири тәрипидин "сақчиларниң миң көзи" дәп аталған. Франсийә агентлиқиниң мухбири, хитайниң дөләт байрими мәзгилидики бихәтәрлик тәдбирлири һәққидә тохтилип, нөвәттә бейҗиң шәһәр вәзийити кишигә "асманда тор йәрдә қапқан" болуштәк вәзийәтни әслитиду деди. Хитайниң дөләт байрими мәзгилидә, бейҗиң айродромиму дөләт байрими мәзгилидики 11 маддилиқ чәкләш тәдбири алған болуп, 1 - өктәбир әтигән 9:30 дин кечә саәт 12:30 ғичә болған арилиқта бейҗиң пайтәхт айродроми, нәнвән айродроми қатарлиқлар тақилидикән.

Хитай һөкүмити 1 - өктәбир күни түрлүк тәбрикләш паалийәтлири өткүзүп, қаттиқ бихәтәрлик тәдбирлири елип бериватқан мәзгилдә, чәтәлләрдики демократик тәшкилатлар хитай коммунист һөкүмитиниң 60 йиллиқ һөкүмранлиқи һәққидә илмий муһакимә йиғинлири өткүзүш, намайиш қилиш қатарлиқ паалийәтләрни елип беришни пиланлиған.

Чәтәлләрдики хитай демократчилири өткән һәптиниң шәнбә күни хоңкоңда "хитай коммунист һакимийитиниң 60 йили" намлиқ илмий муһакимә йиғини өткүзүп хитай компартийисиниң бир партийилик һаким мутләқлиқ түзүмини, хитайда сақлиниватқан мәсилиләрни тәнқидлиди һәм 1 - өктәбир күни хитайға қарши намайиш өткүзидиғанлиқини уқтурди. Дуня уйғур қурултийи 1 - өктәбир күнини уйғурлар үчүн "матәм күни" дәп елан қилип, бу күни чәтәлләрдики уйғурлар арисида һәрқандақ тәбрикләш паалийәтлири һәм той - төкүнләрниң болмайдиғанлиқини уқтуруш билән биллә дуняниң һәрқайси җайлирида хитайға қарши наразилиқ намайишлирини уюштурмақта.
Пикирләр (0)
Share
Толуқ бәт