Xitay, dölet bayrimi mezgilide qattiq bixeterlik tedbirliri almaqta

Xitay dölet bayrimi mezgilide, murasimni saq - salamet ötküzüwélish üchün bixeterlik tedbirlirini kücheytmekte. Béyjing sheherlik hökümet dölet bayrimi mezgilide qattiq bixeterlik tedbirliri alghan bolup, béyjing da'iriliri hazir béyjingning özigila 6000 din artuq saqchi orunlashturush bilen birlikte yene 800 ming etrapida kishini bayram künliride kochilarda bixeterlik qoghdashqa orunlashturghan.
Muxbirimiz mihriban
2009-09-29
Élxet
Pikir
Share
Print
Sürette, 27 - séntebir, béyjing kochilirida xitay puqralirining somkilirini axturuwatqan körünüsh.
Sürette, 27 - séntebir, béyjing kochilirida xitay puqralirining somkilirini axturuwatqan körünüsh.
AFP Photo

Xitayning shinxu'a agéntliqi 28 - séntebir küni, béyjing sheherlik saqchi idarisining dölet bayrimi mezgilidiki qatnash bixeterlik tedbirlirini élan qildi. 26 Maddidin terkip tapqan bu uqturushta, 9 - ayning 28 - küni kéche sa'et 22 din 1 - öktebir küni kéchilik birleshme köngül échish yighini axirlashqiche, tiyanenmén meydani, gugong xan sariyi, jenubiy chang'en yoli, xelq medeniyet sariyi, jungshen baghchisi qatarliq tebriklesh pa'aliyiti ötküzülidighan jaylargha yighin'gha qatnishish ijazetnamisi alghan kishiler hem mashinilardin bashqa herqandaq adem we mashinilarning kirishi cheklen'gen. 1 - Öktebir künidiki tebriklesh pa'aliyiti ayaqlashqandin kéyin taki 8 - öktebir künigiche gugong xan sariyi sayahetchilerge échilmaydighan bolup, bu rayon'ghimu ijazetnamisi bar kishiler we mashinilarla kireleydiken.

29 - Séntebirdin 1 - öktebirgiche jungshen baghchisi, xelq medeniyet sariyi, mawzédung xatire sariyi, döletlik muzéyxana, qatarliqlar sayahetchilerge échilmaydiken, tiyenenmén meydani etrapidiki barliq soda saraylirida soda toxtaydiken. Tebriklesh pa'aliyiti mezgilide, herqandaq yük mashinisining béyjing shehirige kirishi cheklinidiken,béyjing shehiride qatnaydighan kocha aptobusliriningmu tebriklesh pa'aliyiti bolidighan rayonlarda qatnishi cheklinidiken,1 - öktebir küni yighin axirlashquche bolghan ariliqta yer asti poyiz yolining 1 - liniyiside qatnash toxtaydiken, 2 -, 5 - 10 - qatnash liniyiliri yönilishini özgertidiken, peqetla 4 - liniyila yéngidin belgiligen yönilish boyiche mangidiken.

Shinxu'a agéntliqining béyjingdin bergen xewiride yene: "dölet bayrimi mezgilide, bir milyon 400 ming kishidin terkip tapqan "puqralar amanliq saqlash etriti"ning saqchilargha masliship, béyjing shehirining amanliqini qoghdaydighanliqini, 15 - séntebir küni kéche sa'et 0 din 8 - öktebir küni sa'et 0 giche bolghan ariliqta, béyjing shehirining hökümet memuri idariliri jaylashqan rayonida, her qandaq halettiki uchush meshghulatliri cheklinidighanliqi, puqralarning xet toshughuchi kepterliri hem leglek uchurushigha yol qoyulmaydighanliqi, her xil uchar jisimlar modélliri satidighan dukanlarningmu uchush cheklen'gen mezgilde, uchar jisimlar modélliri sétiwalghuchilarning kimlikini tizimlap ularning isimlikini jama'et xewpsizlik idarilirige yollap bérishi kérekliki, bu mezgilde ötküzülgen toy murasimi we her xil tebriklesh pa'aliyetliride hawagha shar qoyup bérishning cheklinidighanliqini xewer qildi.

Xitay dölet bayrimi mezgilide pütün memliket miqyasida bixeterlik tedbirlirini kücheytken bolup, Uyghur élidimu dölet bayrimining bixeterlikini qoghdash bahanisi bilen,bixeterlik tedbirliri kücheytilgen. Erkin asiya radi'o istansisining Uyghur bölümimizge radi'o anglighuchilirimizdin kelgen inkaslardin melum bolushiche, xitayning dölet bayrimi mezgilide, ürümchi shehiride qattiq bixeterlik tedbirliri élin'ghan bolup, ürümchige Uyghur aptonom rayonining jenubiy hem shimalidin kélidighan yoluchilar aptobuslirining bayram mezgilide ürümchige kirgüzülmeydighanliqi uqturush qilin'ghan. Uyghurlar merkezlik olturaqlashqan rayonlargha, kéchiliri qoralliq saqchilar köpeytilgen.

Xitayning dölet bayrimi mezgilide bixeterlik tedbirlirini kücheytkenliki heqqide chet'el agéntliqliridimu xewerler bériliwatqan bolup, b b s agéntliqining xewer qilishiche, béyjing sheherlik hökümet dölet bayrimi mezgilide 22 - séntebirdin 8 - séntebirgiche bolghan ariliqta erzdarlarning béyjing shehirige kirishini chekligen, boshün tor bétining xewirige qarighanda 22 - séntebir küni kéchidin bashlap, béyjing shehiridiki barliq erzdarlar bir kéchidila ün - tünsiz ghayip bolghan, béyjing sheher ahalisi muxbirgha ularning maji'alu türmisi, yaki musapirlar merkizige élip kétilgen iken. Erzdarlar ilgiri turghan jaylar tazilinip bu jayda kishini shürkendürgidek jimjitliq höküm sürmekte iken.

Xitayning dölet bayrimi mezgilide, béyjing shehirining gherbiy sheher rayonigha, éniqliq derijisi 1080 p derijilik til kaméra ornitilghan bolup, 360 gradus pirqirap süretke alidighan bu sin'alghu aparatida birla waqitta 2 milyon parche süret tartqili bolidiken, bu apparat béyjing puqraliri teripidin "saqchilarning ming közi" dep atalghan. Fransiye agéntliqining muxbiri, xitayning dölet bayrimi mezgilidiki bixeterlik tedbirliri heqqide toxtilip, nöwette béyjing sheher weziyiti kishige "asmanda tor yerde qapqan" bolushtek weziyetni eslitidu dédi. Xitayning dölet bayrimi mezgilide, béyjing ayrodromimu dölet bayrimi mezgilidiki 11 maddiliq cheklesh tedbiri alghan bolup, 1 - öktebir etigen 9:30 din kéche sa'et 12:30 ghiche bolghan ariliqta béyjing paytext ayrodromi, nenwen ayrodromi qatarliqlar taqilidiken.

Xitay hökümiti 1 - öktebir küni türlük tebriklesh pa'aliyetliri ötküzüp, qattiq bixeterlik tedbirliri élip bériwatqan mezgilde, chet'ellerdiki démokratik teshkilatlar xitay kommunist hökümitining 60 yilliq hökümranliqi heqqide ilmiy muhakime yighinliri ötküzüsh, namayish qilish qatarliq pa'aliyetlerni élip bérishni pilanlighan.

Chet'ellerdiki xitay démokratchiliri ötken heptining shenbe küni xongkongda "xitay kommunist hakimiyitining 60 yili" namliq ilmiy muhakime yighini ötküzüp xitay kompartiyisining bir partiyilik hakim mutleqliq tüzümini, xitayda saqliniwatqan mesililerni tenqidlidi hem 1 - öktebir küni xitaygha qarshi namayish ötküzidighanliqini uqturdi. Dunya Uyghur qurultiyi 1 - öktebir künini Uyghurlar üchün "matem küni" dep élan qilip, bu küni chet'ellerdiki Uyghurlar arisida herqandaq tebriklesh pa'aliyetliri hem toy - tökünlerning bolmaydighanliqini uqturush bilen bille dunyaning herqaysi jaylirida xitaygha qarshi naraziliq namayishlirini uyushturmaqta.
Toluq bet