Бейҗиңдики чаңән кочисида 1989‏ - йилидин кейин йүз бәргән тунҗи намайиш

2‏ - Айниң 22‏ - күни бейҗиңдики чаңән кочисида сәнәтчиләр намайиш қилди, бу, 1989‏ - йилидики тйәнәнмен вәқәсидин кейин бу кочида йүз бәргән тунҗи қетимлиқ намайиш болуп һесаблиниду. Намайиш йүз бәргәндин кейин сақчилар йетип келип, 'дөләт пуқралириға һоқуқ ' , 'қара гуруһларни қаттиқ җазалаш' дәп йезилған лозункиларни көтүргән намайишчиларни қара ‏ - қоюқ уруп кәткән.
Мухбиримиз вәли
2010-02-23
Елхәт
Пикир
Share
Принт
Сүрәт, бейҗиңдики чаңән кочисида 1989‏ - йилидин кейин йүз бәргән тунҗи намайиш билән 2009‏ - йил 5‏ - ийул күни, үрүмчидики намайиштин кейинки хитай хәвәрлириниң селиштурма сүрити.
Сүрәт, бейҗиңдики чаңән кочисида 1989‏ - йилидин кейин йүз бәргән тунҗи намайиш билән 2009‏ - йил 5‏ - ийул күни, үрүмчидики намайиштин кейинки хитай хәвәрлириниң селиштурма сүрити.
RFA Photo

Хитай һөкүмити бу намайишниң характери тоғрисида техичә һечнемә демиди. Һазир чәтәлләрдә бу һәқтә муназирә болуватиду.
 
Нюйорк таймис гезитиниң язғучиси андру җакобсниң бейҗиңдин хәвәр қилишичә, бейҗиңдики тйәнәнмен мәйданида 1989‏ - йили намайиш йүз бәргәндин кейин, хитай һөкүмити намайиш қилиши мумкин дәп қаралған һәр қандақ кишини киргүзмәй келиватқан чаңән кочисида, 2 ‏ - айниң 22 ‏ - күни сәнәтчиләр намайиш қилди. 20 Дин артуқ сәнәтчи тйәнәнмен мәйданиға киридиған чаңән кочисида 'дөләт пуқралириға һоқуқ ' , 'қара гуруһларни қаттиқ җазалаш' дәп йезилған чоң лозункиларни көтүрүп маңди.
Сүрәт, 2010 - йили 2‏ - айниң 22‏ - күни, бейҗиңдики чаңән кочисида хитайдики бир қисим сәнәтчиләр  елип барған намайиштин бир көрүнүш.
Сүрәт, 2010 - йили 2‏ - айниң 22‏ - күни, бейҗиңдики чаңән кочисида хитайдики бир қисим сәнәтчиләр елип барған намайиштин бир көрүнүш. RFA Photo

Фото маһири ву йүренниң ейтишичә, бу намайиш кәч саәт 4 тә башланғандин кейин, сақчилар йетип келип, һечнемә демәйла намайишчиларни қара - қоюқ уруп кәткән. Намайишчилар бир - бирләп тарқилип, саәт 5 тә пүтүнләй ғайип болған.

Кечидә 'сәнәт мәһәллиси' гә бесип киргән ниқаблиқ қарақчилар сақчилар йетип кәлгән һаман ғайип болған

Бу намайиш болуватқанда нәқ мәйданни көргән бир кишиниң радиомизға сөзләп беришичә, 22‏ - чесла йерим кечидин кейин, 100 дин артуқ ниқабланған қарақчи, өй чақидиған киран қатарлиқ аптомобиллар билән келип, бейҗиңниң чавяң районидики 'сәнәт мәһәллиси' дәп атилидиған бир қорода туридиған сәнәтчиләрни урушқа башлиған. Бу ниқабланған қарақчилар 110 дәп атилидиған тез қутқузуш сақчилири йетип кәлгән һаман бирдинла ғайип болған.

Намайишчилар чаңән кочисида 'дөләт пуқралириға һоқуқ ' , 'қара гуруһларни қаттиқ җазалаш' дәп йезилған чоң лозункиларни көтүрүп маңған

'Сәнәт мәһәллиси'дә кечидә зиянкәшликкә учриған гүзәл сәнәт хадимлири қәтий ирадигә келип, охшимиған йөнүлүш арқилиқ чаңән кочисиға келип, уяқ -буяққа меңип йүргәндин кейин, бирақла лозункилирини чиқирип намайиш қилишқа башлиған. Намайишқа қатнашқа адәмләр ичидә кечидә яриландурулған 8 кишиму бар иди. Униң бири сатоши ивама исимлик японийилик рәссам .

Бу намайиш һәққидә нәқ мәйдандин тартилған фото сүрәтләрни бейҗиңдики мәшһур рәссам, һәйкәлтираш әй вейвей қатарлиқ кишиләр интернет арқилиқ 'бошүн тор гезити' гә вә әркин асия радиосиға йоллап берип елан қилди. Шуниңдин кейин, хитайниң 'йәр шари вақит гезити'му инглизчә нусхисида бу вәқә тоғрисида бир қисқа хәвәр елан қилди. Әмма хитай һөкүмити бу намайишниң характери тоғрисида техичә һечнемә демиди.

Бу намайиш хитайда йәнә бир қетим тарих яратти

Америкидики колумбийә университетини зиярәт қиливатқан мутәхәссис җав йәнниң бу һәқтә 'бошүн тор гезити'дә елан қилған мулаһизисидә ейтилишичә, 2‏ - айниң 22‏ - күни бейҗиңдики чаңән кочисида елип берилған бу намайиш, коммунист хитай 1989‏ - йилидин буян әң қаттиқ муһасиригә елип туруватқан җайда йүз бәргән бир чоң җасарәт, бир мәрданилик вә күчлүк аваз. Гәрчә адәм сани көп болмисиму, бу намайиш хитайда йәнә бир қетим тарих яратти. Бу намайиш һазир хәлққә зор илһам болуватиду, хитайниң юқири қатламлирида муназирә қозғаватиду.

Апторниң қаришичә, бу вәқә арқилиқ биринчидин, чавяң районидики сәнәтчиләр мәһәллисигә бесип кирип сәнәтчиләрни уруп яриландурған 100 дин артуқ қарақчи билән сақчиларниң әслидә бир гуруһ икәнлики испатланди. Иккинчидин, хитай һөкүмити һәр йили икки чоң йиғин ечилиш алдида турған мушундақ бир вақитта вәқә чиқирип, бир қисим хәлқни 'дөләтни ағдурмақчи' дәп чоң бастуруш үчүн баһанә тепишқа урунғанда, хәлқниң бу намайиши уларға пурсәт туғдуруп бәрмиди, бәлки уларниң һелә - микирлирини ашкарилиди. Уларни мат қилди. Үчинчидин, чаңән кочисида йүз бәргән бу намайиш хитайлар қилған намайиши болғанлиқи үчүн, хитай һөкүмити буниңға лхасада яки үрүмчидә йүз бәргән намайишқа қариғанда наһайити чоң пәрқлиқ муамилә қилди, бу хитай һөкүмитиниң чоң милләтчи икәнликини йәнә бир қетим испатлиди.

Бир уйғур бүгүн бизгә үрүмчи кәчлик гезитидә бесилған бир хәвәрни фотоға елип йоллап бәрди


Сүрәт, үрүмчи кәчлик гезитигә бесилған хәвәр. 2009‏-Йил 9‏-июл күни кечидә нәйзилик милтиқ вә сим қамча билән қоралланған хитай сақчилири 190 дин артуқ уйғурни намайиш «гумандари» дәп тутқан вә бағлап қоюп қаттиқ кәмситкән.
Сүрәт, үрүмчи кәчлик гезитигә бесилған хәвәр. 2009‏-Йил 9‏-июл күни кечидә нәйзилик милтиқ вә сим қамча билән қоралланған хитай сақчилири 190 дин артуқ уйғурни намайиш «гумандари» дәп тутқан вә бағлап қоюп қаттиқ кәмситкән. RFA Photo


Бүгүн 'бошун тор гезити'дә елан қилинған бу намайиш һәққидики фото сүрәтләрни көргән вә америкидики колумбийә университетида туруватқан мутәхәссис җав йәнниң мақалисини оқуған бир уйғур бизгә, үрүмчи кәчлик гезитидә 2009‏ - йил 9‏ - июл күни бесилған бир хәвәрни фотоға елип йоллап бәрди. Униң ейтишичә, хитай һөкүмити 9‏ - июл күни кечидә 190 дин артуқ уйғурни 'гумандар' дәп тутқан. Қолида нәйзилик милтиқ вә сим қамча тутқан хитайлар уларни бағлап қоюп қаттиқ кәмситкән.

Бу көрүнүш, худди җав йән әпәнди ейтқандәк, хитай коммунист һөкүмитиниң бир чоң милләтчи һөкүмәт икәнликини испатлайду. Уйғурларға қаритилған бундақ чоң милләтчилик һазирму давам қилмақта.
 
Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикирләр (0)
Share
Толуқ бәт