"Amérikining bashqurulidighan bomba - qalqan sistémisi rusiyining menpe'etige paydiliq"

2007-05-01
Élxet
Pikir
Share
Print

Amérika qoshma shtatlirining bashqurulidighan bomba - qalqan sistémisini sherqi yawropagha kéngeytish pilani rusiyining qarshiliqigha uchrighan idi.

30 - April, aq sarayda élip bériliwatqan amérika yawropa yuqri derijlik dölet erbabliri uchrishishning birinchi küni gérmaniye bash ministiri Angela Merkel amérika prézidénti jorj bushni bashquruldighan bomba - qalqan sisitémisi pilani jehette, rusiye bilen di'alog ornitishqa dewet qilghan.

Bush: "bomba - qalqan sistémisi rusiyining menpe'etige paydiliq"

Bu heqte, amérika prézidénti jorj bush amérikining mezkur pilani rusiyining menpe'etige paydiliq dep körsitip, bu jehette rusiyining hemkarliqini qolgha keltürüsh üchün tirishchanliq körsitidighanliqini bildürdi.

Soghuq munasiwetler urushining kéyinki mezgillirige kelgende, amérika qoshma shtatliri bashqurulidighan bomba - qalqan sistémisini tereqqi qildurushni kölemleshtürgen bolup, 1983- yili martta, prézidént ronald régan bu tetqiqat türige meblegh salidighanliqini ilan qilghan idi. Shuningdin bashlap amérikining bashqurulidighan bomba - qalqan sistémisi melum netijilerge érishken bolsimu, lékin körünerlik utuq qazinalmay kelgen idi.

Ghelbilik sinaq

Washin'gton waqit géziti 1- may teminligen uchurlardin ashkarilinishiche, ötken peyshenbe küni, 26-april, amérika déngiz armiyisi we bashqurulidighan bomba - qalqan sistémisi tetqiqat jem'iyiti, bashqurulidighan bomba - qalqan sistémisi jehette héchqachan körülüp baqmighan netijilerge érishken.

Melum bolushiche, amérikining tiz sür'etlik chong urush paraxoti USS Lake Erie, paraxot séstimisi we urush etriti oxshash waqitta bashqurulidighan bombilarni bayqash, iz qoghlash we hujum qilish iqtidarini namayen qilghan we bayqalghan nishanni ghelibilik tar‏ - mar qilghan.

Bashqurulidighan bomba - qalqan sistémisi tetqiqatigha mes'ul xadim R.A Brad Hicks Mundaq dédi: "bügünki sinaq, bashqurulidighan bomba - qalqan sistémisining heqiqiy ilastikliqi we alahide iqtidarini namayen qildi."

Amérika qoshma shtatliri mezkur sistémini yawropa ellirigiche kéngeytish pilanni otturigha qoyghan we chixsilwakiyige radar tekshürüsh sistémisi we polshigha 10 dane bashqurulidighan bombigha qarshi tosush sistémsi ornitish pilani heqqide uzundin béri muzakire qilip kéliwatqan bolup, amérika tashiqi ishlar ministirliqining bayanlirigha qarighanda, amérikining bashqurulidighan bomba - qalqan sistémisi eslihelirini yawropa döletlirige qurushidiki asasliq seweb bolsa, bashqa yawropa ellirini qoghdapla qalmay irandin kélidighan tehditke qarshi turush üchün iken.

Rusiyening qarshilighi

Emma, ötken hepte rusiye prézidénti wladimir potin amérikining mezkur pilanigha qarshi pikrini ipadilep, soghuq munasiwetler urushidin kiyin tüzülgen yawropagha herbi qoshun kirgüzüsh cheklimisi békitilgen muhim bir kélishimni tilgha élip tehdit salghan.

Hazir amérika buninggha qarita rusiyining maqulluqini qolgha keltürüsh üchün téximu zor tirishchanliq körsetmekte.

Bu heqte, amérika dölet ishlar bash katipi kandiliza rays, amérikining bashqurulidighan bomba - qalqan sistémisini sherqi yawropa ellirige orunlashturush pilani rusiyining istratégiyilik sistémisigha tehdit élip kilidu dése bek "külkilik" bolidighanliqini körsetti.

Amérika prézidénti jorj bush bashqurulidighan bomba - qalqan sistémisini sherqi yawropagha orunlashturush pilani jehette gérmaniye bash ministirining dewet qilishi arqisida rusiye prézidénti potin bilen körüshmekchi ikenlikini eskertip mundaq dédi: " u méning rusiye prézidénti potin bilen özümning mezkur pilanliri üstide téximu éniq pikir almashturushumning eqilge muwapiq ikenlikini körsetti, men uning pikrini tolimu orunluq dep bildim. Bizning qalqan sistémisini qurush muddi'ayimiz bolsa elwette, mustebit döletlerning gherbiy yawropa elliri we amérikigha düshmenlik qilishining aldini élish üchün. Roshenki rusiye buninggha nisbeten bashqiche qarashta boluwatidu".

Jorj bush yene, rusiyige dölet mudapi'e ministiri robért geytni rusiye prézidénti putin bilen körüshüshke ewetkenlikini hemde rusiyining bu pilan'gha qatnishishi choqum oylinishqa tigishlik ish ikenlikini, shundaqla, iranning bashqurulidighan bomba hujumlirigha taqabil turushta elwette rusiyige paydiliq ikenlikini, körsetti.

Emma moskwa amérikining bu pilanlirini eyiblidi we iranda yiraq musapiliq bashqurulidighan bomba yoq ikenlikini bildürdi. (Jüme)

Pikirler (0)
Share
Toluq bet