Bush -putin söhbetliri

2007-07-03
Élxet
Pikir
Share
Print

Rusiye prézidénti wladimir putin bilen amérika prézidénti jorj bush düshenbe küni kénnébunkporttiki sabiq prézidént chong bushning turalghu jayida söhbetleshkendin kéyin muxbirlarning so'allirigha jawab berdi. Ular bashqurulidighan bombidin mudapi'e körüsh sistémisi mesiliside éniq pikir birlikini ipade qilmighan bolsimu, lékin putin yéngi tekliplerni otturigha qoyghan shuningdek amérika-rusiye munasiwetlirining istratégiyilik hemkarliqtin ibaret pütünley yéngiche bolushini xalaydighanliqini bildürgen.

Mudapi'e pilanida éniq pikir birliki ipade qilinmidi

Rusiye prézidénti wladimir putin amérikining atlantik okyan boyigha jaylashqan meyin shtatidiki sabiq prézidént , chong bushning turalghusigha yétip kelgen künning etisi yeni düshenbe küni prézidént bush bilen söhbetliship, turalghu jayning sirtidiki déngiz boyida muxbirlargha pikir bayan qildi.

Xelq'ara jemiyetning diqqitini jelp qilghan mezkur uchrishishning netijiliri axiri metbu'atlargha ashkara boldi.

Uzundin buyan ikki dölet arisida ixtilap peyda qilip kéliwatqan amérikining chéxiye we polshada bashqurulidighan bombidin mudapi'e körüsh sistémisi ornitish pilani mesilisi prézidént putin bilen prézidént bushning ashkara söhbitidiki asasliq téma boldi. Wladimir putin yéngi teshebbus otturigha qoyup, moskwada mudapi'e sistémisigha munasiwetlik uchur almashturush merkizi qurush hemde rusiyining jenubiy qismida bashqurulidighan bombidin mudapi'e körüsh boyiche ortaq sistéma qurush pikrini ilgiri sürdi.

Putin chéx bilen polshada mezkur sistémini ornitishning zörüriyiti yoqluqini, rusiyining pilanining shimaliy atlantik okyan ehdi teshkilati we yawropa döletlirinimu buninggha qatnashturush ikenlikini eskertti. Emma, prézidént bush bu mesilige jawaben, polsha we chéxiyiningmu amérikining bashqurulidighan bombidin mudapi'e körüsh sistémisi pilanining kem bolsa bolmaydighan terkibi qisimi ikenlikini tekitlesh bilen birge putinning sözlirini pütünley inkar qiliwetmey, bu mesilide yarishish mumkinlikini ümid qilidighanliqini tekitlidi hemde putinning qarashlirining semimiy we yéngiliq xaraktérigha ige ikenlikini mu'eyyenleshtürdi.

Iranning yadro pilani mesiliside ortaqliq shekillen'gen

Biraq, mulahizichiler talash-tartish xaraktérliq mesililer üstide téz arida kélishim hasil qilghili bolmaydighanliqini perez qilishqan bolup, chünki, söhbet jeryanida prézidént bushning rusiyige yol qoyushi we yaki yéngi teklipliri ipade qilmighan. Putinningmu amérika üchün paydiliq bolghan mentiqilerge yol qoymaydighanliqi bilin'gen.

Emma, mudapi'e sistémisi mesiliside bular arisida biraqla ortaqliq körülmigen bolsimu, lékin iranning yadro pilani mesilisidiki pozitsiyiliride birdeklik terepler ipade qilin'ghan. Ular birleshken döletler teshkilati bixeterlik kéngishi bilen hemkarliship, iranning uran tawlash heriketlirini toxtitishni ilgirilitidighanliqini bildürüshken.

Putin rusiye bilen amérikining yéngi basquchqa kirishini xalaydu

Wladimir putin rusiye-amérika munasiwetlirining hazirqi haliti we istiqbali heqqide toxtilip, ikki döletning burunqi sabiq sowét ittipaqi dewridikige oxshash reqib emes belki, dost ikenliki, rusiye -amérika munasiwetlirini istratégiyilik hemkarliqtin ibaret bolghan "pütünley yéngi basquchqa" kötürüsh mumkinlikini bildürgen.

Xewerlerdin qarighanda, amérikidiki hoquq qoghdash orunliri prézidént bushtin wladimir putin bilen bolghan uchrishishta rusiyining démokratiyidin chékinip kétiwatqanliqini otturigha qoyushni telep qilghan. Wladimir putin rusiyining démokratiye mesilisi heqqide toxtilip," biz özara bir-birimizni anglashqa teyyarmiz, birdin bir nuqta shuki, eger bu , bir döletning ichki ishlirigha arilishish wasitisigha aylandurulsa, uni qobul qilghili bolmaydu" dégen.

Rusiye-amérika munasiwetliri

Rusiye-amérika munasiwetliri közetküchilirining qarishiche, mezkur ikki döletning munasiwetliri yéqinqi bir yil ichide nahayiti soghuq bir haletke kélip qalghan bolup, hetta prézidént putin amérikining siyasitini qattiq eyibligen.

Bundaq eyibleshlerdiki asasiy seweb amérikining sabiq sowét ittipaqi dewride uning tesir da'iriside bolghan sherqiy yawropada bashqurulidighan bombidin mudapi'e körüsh sistémisi pilani bolup, rusiye buni özi üchün tehtid dep qarighan, uningdin bashqa yene natoning sherqqe kéngiyip, bir qisim sherqiy yawropa döletlirini özige qoshushi hemde amérikining ottura asiya we kawkaziyide tesir küchini peyda qilishi, gruziye, ukra'iniyidiki démokratik özgirishlerni qollash bilen rusiyini démokratik chékinish bilen eyiblishi rusiye rehberlirining amérikidin narazi bolush xahishini kücheytiwetken idi.

Prézidént putinning bu qétim chong bushning öyide méhman bolup, gheyri resmi rewishte söhbetlishishi ikki dölet munasiwetlirining ene shundaq soghuqlashqan peytige toghra kelgen bolup, köpinche közetküchiler bu uchrishishning moskwa-washin'gton munasiwetlirige illiq keypiyat béghishlishigha ishench bilen qarimaqta.

Bush bilen putin bu qétim keng kushade sözleshken bolup, muxbirlarning so'allirigha nahayiti erkin , özara hörmet qilishqan we yaxshi keypiyatta jawab bergen. Ular köngleklik bolup, kastiyom -burulka kiymigen, galistuk taqimighan. Bu, ularning uchrishishning gheyri resmi ikenlikini körsitidighan alametler bolup hésablinidiken. Söhbettin kéyin ikki prézidént béliq tutqili ketken.(Ümidwar)

Pikirler (0)
Share
Toluq bet