Hindistandiki tibet yashliri yurtigha qaytish üchün uzun seperge atlandi

2008-03-10
Élxet
Pikir
Share
Print

B b s ning bayan qilishiche, bügün 3 ‏- ayning 10 ‏- küni, muhajirettiki tibet yashliridin 100 din artuq kishi hindistanning taghliq shehiri dramsaladin yurtqa qaytish üchün uzun seper bashlidi. Ular himalaya taghliridin piyade halqip ötüp, birnechche yüz kilométir yol bésip tibetke bérip erkin turmush köchürüshni oylaydu we özlirining bu arzuyi 2008 ‏- yilliq béyjing olimpik musabiqisida emelge éshishni arzu qilidu.

Tibet yashliri yurtigha qaytish üchün uzun seperge atlan'ghan

Tibet yashlirining yurtigha qaytish üchün uzun seperge atlan'ghan waqti del 1959 ‏- yili tibetlerning kommunist ishghaliyitige qarshi partlighan qozghilingi meghlup bolup, dalay hökümiti öz dölitidin qoghlinip chetـ'elge kétishke bashlighan kün'ge toghra keldi. Ular özining bu herikiti arqiliq, dunyada téximu köp kishini tibetlerning siyasiy muddi'asidin xewerdar qilishni meqset qilidu. Emma bu qétim yurtqa qaytish üchün uzun seperge atlan'ghan tibet yashliri himalaya taghliridiki qaysi yollar bilen chégridin yushurun ötüp tibetke kiridighanliqini we bu jeryanda qandaq tedbir qollinidighanliqini ashkarilashni xalimaydu.

Xewerde bayan qilinishiche, tibet yashliri yurtigha qaytish sepirini bashlashtin burun, tibetning dini dahisi dalay lama béyjing olimpik musabiqisini qollaydighanliqini, dunyaning bundaq bir yaxshi pursettin paydilinip xitay hökümitige, tibet xelqining pikir bayan qilish hoquqini we milly teng ‏- barawerlik hoquqini qoghdash üchün bésim ishlitishini telep qilghan idi.

Yurtqa qaytidighan tibet yashliri xitayning héchqandaq shertini qobul qilmaydu

Muhajirettiki tibet yashlar teshkilatining hindistanning tagh shehiri daramsaladiki bash orginining bayanatchisi sérin ependi ziyaritimizni qobul qilip élan qilghan bayanatida, tibet yashlar teshkilati buningdin bir nechche yil burun taki tibette erkinlik yolgha qoyulmighiche, xitayda ötküzilidighan olimpik musabiqisigha qarshi turidighanliqini jakarlighan idi. Biz hazirmu shu gépimizde turimiz, hazir yurtimizgha qaytish üchün uzun seper bashliduq, biz xitay hökümitining héchqandaq shertini qobul qilmaymiz, buningdin kélip chiqidighan her qandaq aqiwetke teyyarliq qilip qoyduq, dédi.

Muhajirettiki tibetler népaldiki xitay elchixanisi aldida namayish qildi

B b s ning xewer qilishiche, bügün tibet yashliri uzun seperge atliniwatqanda, népaldiki tibetlerdin mingdek adem xitayning népaldiki bash elchixanisi aldida namayish qildi, namayishta xitay hökümitining tibetlerni öz yurtida yashash erkinlikidin mehrum qaldurghanliqigha naraziliq ipadilidi. Namayishchilar bilen népal saqchiliri otturisida toqunush yüz berdi.

Jang chingli ikki chong yighinda 'dalaylama olimpikke buzghunchiliq qiliwatidu' dep eyiplidi

Xewerde éytilishiche yene, xitayning tibetke belgiligen bash emeldari jang chingli béyjingda échiliwatqan memliketlik xelq qurultéyi yighinida 'hazir pütün dunya 2008 ‏ - yilliq béyjing olimpik musabiqisini qollawatsa, dalay lama buzghunchiliq qiliwatidu, tehdit séliwatidu' dése, xitay hökümiti tibetlerdin talliwalghan emeldar shamba pingso 'hökümitimiz olimpikning bixeterlikini qoghdash üchün toluq teyyarliq qilip qoydi' dep jakarlighan.

Tibet musapirliri olimpiya shehiride 'tibet erkinlik mesh'ili' yaqti

Amérika awazi radi'osining xewer qilishiche, bügün grétsiyidiki tibet musapirliri dunya olimpik musabiqisi eng burun bashlan'ghan olimpiya shehiride 'tibet erkinlik mesh'ili'ni yaqti. Ular bu mesh'elni 50 sheherdin ötküzüp, eng axirida bu yil 8 ‏- ayning 8 ‏- küni tibetning chégrisigha élip baridiken.

Lasada 300 rahip musteqilliq shu'ari towlap namayish qildi

Erkin asiya radi'osi tibet bölümining igilishiche, bügün chüshtin burun tibetning lasa shehirige yéqin jaydiki jébang ibadetxanisidin 300 din artuq rahip we rahibe sheherge kirip 'tibetke musteqilliq' dep ünlük shu'ar towlap namayish qildi. Xitayning tibettiki saqchiliri, qoralliq saqchi qisimliri namayishchilarni tosuwaldi. Ikki terep toqunushti. Xitay da'iriliri 10 nechche rahibni tutup ketti. Namayishchilar saqchi aptomobillirini köydürdi. Bu weqe kéngeymekte. (Weli)

Pikirler (0)
Share
Toluq bet