Xitaydiki eqliy mülük hoquqi mesilisi heqqide guwahliq bérish yighini ötküzüldi

2006-06-12
Élxet
Pikir
Share
Print

Yéqinda, amérika parlamént binasida ötküzülgen xitaydiki eqliy mülük hoquqi mesilisi heqqidiki ispat bérish yighinigha amérika parlamént ezasi Diana Wotson, Carl Levin, Tom Coburn qatarliqlar qatnashqan bolup, mezkur yighinda xitaydiki eqliy mülük hoquqining emeliylishish ehwali shundaqla neshr hoquqi oghrilan'ghan saxta mehsulatlarning amérika bazirigha éqip kirish arqiliq mezkur döletke zor ziyan élip kéliwatqanliqi otturigha qoyulghan.

Xitay hökümiti yéterlik tedbir qollanmidi

Amérika parlamént binasida xitaydiki eqliy mülük hoquqi mesilisi heqqide échilghan bu yighinning échilish murasimida, amérika -xitay iqtisadiy we bixeterlik muhakime komitéti re'isi Larry Wortzel ependi mexsus söz qildi. U sözide "gerche xitay eqliy mülükni qoghdash mesiliside bir qisim qanun - nizamnamilerni békitken bolsimu, békitilgen qanun belgilimiliri yenila éniq bolmighan, uning üstige emeliyleshturushte, merkizi hökümet héchqachan yéterlik chare ‏- tedbirlerni qollanmidi " dep körsetti. U yene "merkiziy hökümet saxta mal ishlepchiqirish herikiti bilen munasiwetlik bolghan yerlik hökümet orunlirigha yéterlik bésim ishletmidi, peqet ishlepchiqirilghan saxta mallar merkizi hökümetning menpe'etige ziyan yetküzgendila andin zuwan süridu, mesilen, merkizi hökümet 2008 ‏- yili échilidighan olimpik yighinining belgisi chüshürülgen mehsulatlargha alahide köngül bölüp uni qoghdash buyruqini chüshürdi" dédi.

Diana Wotson: Xitay eng chong eqliy mülük oghrisi

Mezkur yighinda birinchi bolup sözge chiqqan parlamént ezasi Diana Wotson xanim eqliy mülük hoquqini qoghdash mesilisining intayin muhim ikenlikini tekitlep mundaq dédi :

"Eqliy mülük hoquqini qoghdash mesilisi amérikining hazirqi we kelgüsi iqtisadining saghlam heriketlinishi bilen zich munasiwetlik bolghan bir ish. 2006 ‏- Yilliq prézidént doklatida körsitilishiche, amérikining eqliy kapitali amérikidiki barliq shirketlerning mal - mülkining 3 tin biridin artuqini igileydu. Hazir dunya sodisining 7 % i eqliy mülükning oghrilinishi arqiliq kélip chiqqan. Xitay bolsa eng chong eqliy mülük oghrisi bolup hésablinidu. Chünki xitaydiki her türlük mallar arisida, 15% ‏- 20% kiche bolghan mehsulatlarning hemmisi saxta mal bolup hésablinidu. Bu xil saxta mehsulatlar amérika bazirigha toxtimay éqip kirmekte. Amérika köchmenler tamojna qanunini béjirish orunlirining sanliq melumatida körsitilishiche, amérika chégrisida olja élin'ghan neshr hoquqi oghrilan'ghan türlük saxta mallarning 70% i xitaydin kirgen ".

Xitay dorap yasashta eng aldida

Amérika parlamént binasida ötküzülgen bu guwahliq bérish yighinida, parlamént ezasi Carl Levin xitayning neshr hoquqini oghrilash qilmishining amérika iqtisadigha zor tesir yetküziwatqanliqini tekitlep, amérika mashina saymanlirining xitayda éghir derijide dorap yasiliwatqanliqini ashkarilidi:

"Men amérika mashina saymanlirining xitayda xalighanche dorap yasiliwatqanliqi heqqide toxtalmaqchimen. Bu xil ehwal hazir xitayda barghanséri ewj élip iqtisad we ammiwiy bixeterlikke zor tesir yetküzmekte. Hazir amérikining mashina ishlepchiqirish saheside, kishilerning eng köngül bölidighini xitayning amérikini dorap ishlepchiqiriliwatqan saxta mashina saymanliri bolup hésablinidu. Hazir amérika mashina saymanliri her qaysi döletlerde dorap yasiliwatqanliqtin, amérikidiki mashina saymanlirini yasash shirketliri yiligha 12 milyard amérika dolliri ziyan tartmaqta. Buning ichide ishlepchiqirilghan saxta saymanlarning 75% tige xitay mes'ul bolushi kérek. Mesilen, aptomobillarning shamaldin saqlinish eyniki, aldi -keyni chiriqi, chaqi hetta bixeterlik belwighi qatarliq her bir zapchaslirining hemmisi dégidek dorap yasalghan. Yeni xitay pütün bir aptomobilni dorap yasap chiqti désekmu bolidu ".

Tom Coburn: Xitay eqliy mülük hoquqini qoghdashta quruq gep qilishqa amraq

Mezkur yighin'gha qatnashqan parlamént ezasi Tom Coburn ependi "xitay eqliy mülük hoquqini qoghdashta, quruq gep qilishqa amraq, ularning bu heqte qilghan quruq sözi emeliy herikettin nechche hesse köp bolup kétiwatidu " dep tekitlep, mundaq dédi:

"Biz ishlepchiqirish küchi tennerqi jehette xitayning aldigha ötelmeymiz, xam matériyal tennerqi jehettimu xitayning aldigha ötelmeymiz. Eger biz özimizning eqliy mülük jehettiki üstünlükimizni qoghdap qlalmisaq, iqtisadimiz zor ziyan'gha uchraydu. Eqliy mülük hoquqini qoghdash jehette, xitay quruq gep qilghandin bashqa héchqandaq emeliy ipade körsetkini yoq. Men buningdin ikki ay burun xitaygha bérip bir qanche soda bazarlirini aylandim. Soda saraylirining ishiki aldida " mezkur sada sariyida saxta mallar sétilmaydu" dep yézilghan. Lékin kirip qarisam, köpligen mehsulatlirining hemmisi yawrupa we amérikini dorap yasighan mallar bolup, ularning bahasi xelq'ara bazardiki bahaning 3 tin birige, hetta 5 tin birige teng kilidiken ".

Amérika parlamént binasida ötküzülgen bu guwahliq bérish yighinigha qatnashqan parlamént ezaliri hemmisi birlikte dégidek "amérika eqliy mülük hoquqini qoghdash jehette, choqum xitaygha taqabil turidighan qattiq chare‏ - tedbirlerni qollinishi kérek" dep bildürdi. (Méhriban)

Pikirler (0)
Share
Toluq bet