Beshte kapaletlik qilghuchi kadirlar ayköl yézisida néme ish qilidu?

2006-01-03
Élxet
Pikir
Share
Print
CHINA_XINJIANG_KORANIC_S_47.jpg
Oqughuchilar, ürümchidiki islam inistitutidiki xitay dölet bayriqi ésilghan bir sinipta telim almaqta. Xitay hökümiti Uyghur élide idé'ologiye terbiyisini barghanséri kücheytmekte. AFP

Xitay hökümet da'iriliri, Uyghur élide her türlük siyasiy teshwiqat öginishlirini kücheytkendin sirt, yézilargha kadir ewetishtek usullar arqiliq, Uyghurlar topliship olturaqlashqan jaylarning siyasiy, ijtima'iy muqimliqini saqlash üchün heriket qilmaqta.

Heqiqi meqset

Yéqinda aqsudiki ayköl yézisigha "beshte kapaletlendürgüchi kadirlar "namida 85 neper kadir alahide wezipige qoyulghan. Ayköl yézisi aqsu shehirige qarashliq 35 ming Uyghur nopusigha ige chong yézining biri bolup, beshte kapaletlendürüsh wezipisini alghan kadirlar,yézidiki déhqanlarning a'iliside yétip ‏- qopup wezipisini öteydiken.

Aqsu tor bétidiki uchurda, beshte kapaletlendürgüchi kadirlarning wezipisi, kapaletke alghan déhqanlarning öyide turup, kündilik turmush we ishlepchiqirish jeryanida déhqanlarning siyasiy idiyisini tazilap roshenleshtürüsh,pen téxnika jehettin yéteklesh, béyish yoligha yéteklesh, partiye, hökümetning siyasetlirini yetküzüsh hemde déhqanlarning pikirlirini igilesh dep körsitilgen.

Xitay hökümitining beshte kapaletlendürüsh kadirlirini déhqanlarning öyigiche ewetishning ehmiyiti, shundaqla Uyghur déhqanlirining öz a'ilisige kelgen bu chaqirilmighan méhmanlargha qandaq qaraydighanliqi qatarliq mesililer bizni qiziqturdi. Mezkur so'allargha jawab tépish meqsitide aqsu ayköl yézisigha téléfon qilghinimizda, yéziliq hökümettiki bireylenning sözidin, xitay hökümitining déhqanlarning a'ililirige beshte kapaletlendürüsh kadirlirini ewetishtiki meqsiti éniqlandi.

Ayköl yéziliq hökümetning bir xadimi, beshte kapaletlendürüsh kadirlirining asasliq wezipisi heqqide toxtilip, ularning asasliqi muqimliqni tutush, qanunsiz diniy heriketlernining aldini élish üchün ewetilgenlikini éytti.

Déhqanlarning inkasi

Biz yene bu yézidiki déhqanlardin a'ilisige wezipe bilen kelgen bu alahide méhmanlarni qarshi alidighan, almaydighanliqini soriduq. Ziyaritimizni qobul qilghan bir déhqan "yardemge kelgen" kadirlarning déhqanlargha heqiqi yardem qilalmaydighanliqini, ularning yaxshi namgha érishish üchün kelgenlikini, déhqanlarning kirimi 2000 yüendin ashidu, dégen teshwiqatlarning yalgha ikenlikini otturigha qoydi.

Xitay hökümiti teshwiqatida,"yézilargha chüshürgen kadirlar, barghan jaylirida déhqanlarning déhqanchiliq téxnikilirini igilep, béyishigha, kirimining ösüshige alahide yardemde bolghachqa, déhqanlar, bu kadirlardin bek minnetdar bolmaqta "dep körsetken bolsa, ziyaritimizni qobul qilghan déhqanlar eksiche inkas qayturdi.

Uyghur élining bashqa yerlik hökümet tor betliridin ige bolushimizche, beshte kapaletlendürgüchi namidiki kadirlar, nöwette Uyghurlar köprek olturaqlashqan yézilarning hemmiside dégüdek orunliship bolghan bolup, ularning tüp wezipisi déhqanlar éytqandek, Uyghur yézilirining siyasiy muqimliqini saqlash bolmaqta iken. Déhqanlarning inkasigha qarighanda, bu alahide wezipe bilen chüshken kadirlar, kün boyi déhqanlarning herikiti we idiyilirini közitip turghandin bashqa, a'iliside yétip ‏- qopup yürgechke déhqanlargha rohiy hem iqtisadiy jehetlerdin artuqche bésim élip kélip, ularni bizar qilmaqta iken. (Gülchéhre)

Pikirler (0)
Share
Toluq bet