Иман билән иҗтимаий әмәлийәтниң бирлики

Мусулманларниң әхлақ қурулуши билән мәнивий мәдәнийлики чин иман үстигә қурулған. Мусулманлар сүпәтләнмәкчи болған гүзәл әхлақ уларниң иманиниң нәтиҗиси вә гәвдилинишидур.
Мухбиримиз өмәрҗан тохти
2009-05-28
Елхәт
Пикир
Share
Принт

Әхлақ еңи кәмләр, вәдигә вапа қилмиғанлар, һәққаний нийәттә болмиғанларда иманму болмайду. Шуңа мусулманлиқ инсанларниң әдәп - әхлақи билән мәниви мәдәнийликиниң идийиви асасиға айлиниду. Шуниң үчүн мусулманлар әхлақлиқ болуши шәрт.

Ана вәтәннниң охшаш болмиған билимгаһлирида оқушини пүттүргәндин кейин, мәккә мукәррәмә шәһиридә илмий хизмәтләр билән шуғуллиниватқан абдулла һаҗим иман вә униң җәмийәттики роли һәққидики сөһбитимизни қобул қилған иди.

Абдулла һаҗим билән сөһбәт

Абдулла һаҗим мундақ деди:" ислам идийисиниң қаришичә, мөминләр яманлиқтин йирақ болуши, өзиниң әмәлий иш - һәрикити арқилиқ кишиләрниң мал - мүлки вә нам ‏ - шөһритигә капаләт беридиған болуши лазим. Мусулманлар өзиниң сөзи, күч - қуввити арқилиқ кишиләрни аман турмушқа игә қилидиғанлардин болуши тәләп қилиниду. Манабу, мусулманлардин мурәккәб иҗтимаий әмәлийәт давамида үзлүксиз тиришип, өзиниң әхлақий тәрбийилинишини мукәммәлләштүрүшини, чин иманини алдинқи шәрт қилиш асасида иҗтимаий әмәлийәт билән актип шуғуллинишни тәләп қилиду. Чүнки мусулманлар үчүн башқиларни яхши ишларға тәшәббус қилиш вә яман ишлардин агаһландуруш пәрз болуп, мусулманлар бу пәрзни сөзи биләнла әмәс, бәлки әмәлий һәрикити билән ада қилиду".

Мусулманларниң имани иҗтимаийлиқ қиммәткә игә

Абдулла һаҗим йәнә мундақ деди:" мусулманларниң имани җәмийәт үчүн хизмәт қилиш нишаниға вә алдинқи шәртигә игә. Буни очуқрақ қилип ейтқанда, мусулманлар җәмийәткә чөкиду вә җәмийәткә төһпә қошушни алдинқи пиланда қойиду. Әгәр иманла болуп, иҗтимаий әмәлийәт болмиса, мундақ иман қуруқ иман болуп қелип, өзиниң түп қиммитини йоқитиду. Әгәр әмәлийәтла болуп, ениқ иман болмиса, у қариғучиларчә әмәлийәт болуп, җәмийәт үчүн һәқиқий түрдә хизмәт қилалмайду. Мусулманлар иман билән иҗтимаий әмәлийәтни бирликкә кәлтүргән җәмийәт қурғучилардин болуши, имани чин, иқтидарлиқ, истили тоғра ,мәниви мәдәнийлик үлгилиридин болуши керәк. Қуран кәримдә:" иман ейтқан, яхши әмәлләрни қилған, бир - биригә һәқни тәвсийә қилишқан, бир - биригә сәврни тәвсийә қилишқан кишиләрдин башқа һәммә адәм чоқум зиян ичидидур " дейилгән.

Әхлақниң күчи қанунниңкидин зор

Демәк,җәмийәт аманлиқини, кишиләрниң һузурини вә хатирҗәмликини сақлаш үчүн қанунлар йетәрлик әмәс. Қанун җәмийәт әзалириниң йүрикидин вә виҗданидин чиқиши лазим.

Қанун көрмәйдиған нурғун ишлар бар болуп, уларни һәқиқий мәнидики мусулманларниң виҗдани көриду, қанун җәмийәттә йәрләштүрәлмигән ишларни әхлақ йәрләштүрәләйду, қанун тосалмиған яман ишлардин әхлақ тосалайду.
 


Пикирләр (0)
Share
Толуқ бәт