Канада 2011 - йилидин кейин афғанистандин әскәр чекиндүрмәкчи

Канада мәтбуатлиридин мәлум болушичә, йеқинда канадада ечилған санаәтләшкән 8 дөләт ташқи ишлар министирлири йиғиниға қатнишиш үчүн канадаға кәлгән америка ташқи ишлар министири һилларий клинтон ханим канада тәрәптин, 2011 - йилидин кейинму афғанистанда әскәр турғузуш тәклипидә болған болсиму, әмма канада тәрәпниң пүтүнләй рәт қилишиға учриған.
Мухбиримиз гүлшән абдуқадир
2010-04-05
Елхәт
Пикир
Share
Принт
Сүрәттә, канада баш министири стефен харпер сөздә.
Сүрәттә, канада баш министири стефен харпер сөздә.
AFP Photo

Канада баш министири стәвен харперниң баянатчиси димитри соудас ниң канада мәтбуат саһәсигә бәргән мәлуматиға асасланғанда, оттава 2011 - йилидин кейин афғанистанда вәзипә өтәватқан әскәрлирини тамамән чекиндүрүп чиқидикән , әмма афғанистанни қайтидин қуруш вә гүлләндүрүш ишлириға асаси күчини қаритиш мәйданида өзгириш болмайдикән.

Һилларий килинтонниң канада с б с телевизийисиниң сияси ишлар программисиға бәргән, америка тәрәпниң канаданиң афғанистанда давамлиқ һалда әскири тәсир күчини сақлап қелишини халайдиғанлиқи һәққидики сөһбәт программисидин кейин, канада ташқи ишлар министири лаврәнс канон мәтбуат саһәсигә баянат берип, канаданиң 2011 - йилидин кейин афғанистандин пүтүнләй әскәр чекиндүрүп чиқидиғанлиқини вә бу қарарниң америка ‏ - канада мунасивәтлиригә һечқандақ көләңгә чүшүрмәйдиғанлиқини билдүргән.

Америка ташқи ишлар министири һилларий клинтон ханим бу мәсилә һәққидә баш министир стәвән һарпер билән 20 минут әтрапида сөһбәтләшкән болуп, клинтон ханим һарпердин канаданиң 2011 йилидин кейин афғанистанда әскәр турғузмиған тәқдирдиму, әскири мәшиқ вә арқа сәп мулазимити қатарлиқ җәһәтләрдә давамлиқ қелип америкиға ярдәмдә болушни тәләп қилғанлиқи мәлум. Һилларий йәнә, канада әскәрлирини махтиған болуп уларниң афғанистанда маслишип ишләш роһиға юқири баһа бәргән.

Канаданиң һазир афғанистанниң қәндиһар вилайитидә 2900 әскириниң вәзипә өтәватқанлиқи мәлум болуп, канададики көплигән сияси партийиләр, 2011 - йилидин кейин канаданиң афғанистанда изчил әскәр турғузушиниң һечқандақ әһмийити йоқ дәп қарайдикән.

Анализчилар һилларий ханимниң канада тәрәптин бундақ бир тәләптә болуштики мәхситини афғанистан мәсилиси һәққидә муназирә пәйда қилиш үчүн дәп қаримақта икән.

Йеқинда канада парламентиму афғанистанниң җәнубиға җайлашқан қәндиһар вилайитигә әвәтилгән канада әскәрлириниң вәзипә өтәш муддитиниң 2011 - йилида ахирлишидиғанлиқи һәққидә қарар мақуллиған.

Америкида йүз бәргән 9 - сентәбир террорлуқ вәқәсидин кейин, канада америка билән бир сәптә туруп афғанистанға әскәр әвәткән тунҗи дөләт болуп, һазирға қәдәр канаданиң афғанистанда 141 әскири вә бир дипломати өлгәнлики мәлум. Канада йәнә америкиниң иранға әскәр әвәтиш тәлипиниму рәт қилған.

Чәтәл мәтбуатлири болупму нюйорк вақти қатарлиқ гезитләр, афғанистан мәсилиси билән шималий муз окянниң екологийиси мәсилисини канада баш министири стәвин һарперниң алдидики икки чоң синақ дәп мулаһизә қилип кәлгән болуп, мулаһизичиләрниң билдүрүшичә, канада қандақтур уруш қалаймиқанчилиқлири ичидики күчлүк дөләт әмәс, бәлки тинчлиқ ичидики санаәтләшкән күчлүк дөләт болушни арзу қилидикән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)
Share
Толуқ бәт