Канада һөкүмити диктатор бин алиниң җәмәтлириниң канадада қарши елинмайдиғанлиқини билдүрди

Канада һөкүмити тунисниң ағдурулған диктатори бин алиниң аялиниң акиси милярдер белһассен трабелсиниң канададики мәңгүлүк олтурақлишиш салаһийитини бикар қилғанлиқини вә униң канададики мал-мүлкини тоңлитиш үчүн һәрикәт қиливатқанлиқини билдүрди.
Ихтиярий мухбиримиз камил турсун
2011-01-31
Елхәт
Пикир
Share
Принт
2010-Йили 28-январ, канада баш министири Stephen Harper.
2010-Йили 28-январ, канада баш министири Stephen Harper.
en.wikipedia.org

Тунисни қаттиқ қоллуқ билән идарә қилған диктатор бин алий, хәлқниң бир һәптә давам қилған исянидин кейин 14 -январ күни сәуди әрәбистаниға қачқан вә буниң билән туниста униң 23 йиллиқ диктаторилиқ һакимийитигә хатимә берилгәниди.

Буниңдин бир қанчә күн илгири, канада баш министири Stephen Harper диктатор бин алий җәмәтиниң канадада қарши елинмайдиған кишиләр икәнликини әскәртип: "канада хәлқара җәмийәт билән һәмкарлишип, тунисниң бурунқи диктатор һакимийитиниң әзалирини бир тәрәп қилиду. Канада бин алий җәмәтиниң чеградин киришини вә уларниң канадада яшишини қарши алмайду" дегәниди.

Диктатор бин алиниң аялиниң акиси болған трабелси вә аилисидики 6 киши 20-январ күни, шәхси айропланиға олтуруп, канаданиң монтреал шәһиригә қечип кәлгәниди. Тунисниң әң чоң бейи һесаблинидиған милярдер белһассен трабелсиниң канадада зор миқдарда мал-мүлки барлиқи илгири сүрүлмәктә.
Трабелси қейни акисиниң президентлиқ һоқуқидин пайдилинип, тунисниң ахбарат васитилири, банка вә авиатсийә қатарлиқ саһәлирини монопол қиливалған болуп, униң пул ақлаш җинайәтлири билән шуғулланғанлиқиму тилға елинмақта...

Йеңидин қурулған тунис һөкүмити 26-январ күни, трабелси аилисиниң пүтүн мал-мүлкиниң парихорлуқ вә қанунсиз йоллардин кәлгәнлики вә бу мал-дуняни чәтәлгә қанунсиз йөткигәнликини илгири сүрүп, канада даирилиридин униң канададики мал-мүлкини тоңлитишни тәләп қилғаниди. Канада һөкүмити тунис һөкүмитиниң тәлипигә бинаән, алди билән трабелсиниң канадада мәңгүлүк олтурақлишиш салаһийитини бикар қилди.

Канада һөкүмитиниң изаһлишичә, трабелси канадада мәңгү олтурақлишиш салаһийитигә игә болсиму, лекин у 5 йил ичидә һечболмиғанда 2 йил канадада яшимиған. Канада қануни бойичә, мәңгүлүк олтурақлишиш салаһийитигә еришкән киши, 5 йил ичидә аз дегәндә икки йил канадада қелиши керәк. Болмиса униң бу салаһийити аптоматик бикар қилиниду.

Канада ташқи ишлар министири Lawrence Cannon трабелсиниң мал-мүлкини тоңлитиш үчүн униң һесаб номурлирини тәкшүрүватқанлиқини, мунасивәтлик органларниң трабелсиниң монтреалдики адвокати билән алақә қиливатқанлиқини тәкитләп: "улар канадада сиясий панаһлиқ тилиди. Биз өз вақтидила бу кишиләрниң канадада қарши елинмайдиғанлиқини билдүргәнидуқ. Һәммигә мәлумки, канада қанун дөлити. Биз уларни қанун бойичә бир тәрәп қилимиз." Деди.

Трабелси аилисидикиләр сиясий панаһлиқ тиләштин илгири, министир лаврәнчә каннон, канаданиң трабелсиниң мал-дунясини тоңлитиштин башқа, йәнә уни тунис даирилиригә өткүзүп беришни ойлишиватқанлиқини билдүргәниди. Трабелси аилисиниң канадада сиясий панаһлиқ тилиши билән канада һөкүмитиниң уни чеградин қоғлап чиқириш пилани вақтинчә соға чилашти.

Канада қануниға асасланғанда, канада сот мәһкимисиниң трабелсиниң сиясий панаһлиқ тәлипини тәкшүрүп, ахирқи һөкүм чиқиришиға бирқанчә йил кетиду. Бин алиниң қизи вә униң йолдишиму канадада яшайду, уларниңму канадада зор миқдарда мал-мүлүккә игә икәнлики вә трабелси аилисиниң болса канада һәшәмәтлик қоруқлири вә хусуси айропилан истансиси барлиқи илгири сүрүлмәктә.

Диктатор бин алий җәмәти 20 нәччә йил тунис дөлитиниң иқтисади җан томурлирини қолға киргүзүвелип, дөләтни мафия шәклидә башқуруп кәлгәниди. Туниста бин алий һакимийитиниң хәлқниң исяни билән ғулап чүшүши, мисир вә башқа диктатор дөләтләрдики хәлқләргә илһам бәргән болса,дунядики барлиқ диктаторларни чөчүтти. Хитай болса тунис вә мисир хәлқниң һакимийәткә қарши исянлирини хәвәр қилишқа қаттиқ чәклимә қойди.

Толуқ бәт