Kanada hökümiti diktator bin alining jemetlirining kanadada qarshi élinmaydighanliqini bildürdi

Kanada hökümiti tunisning aghdurulghan diktatori bin alining ayalining akisi milyardér bélhassén trabélsining kanadadiki menggülük olturaqlishish salahiyitini bikar qilghanliqini we uning kanadadiki mal-mülkini tonglitish üchün heriket qiliwatqanliqini bildürdi.
Ixtiyariy muxbirimiz kamil tursun
2011-01-31
Élxet
Pikir
Share
Print
2010-Yili 28-yanwar, kanada bash ministiri Stephen Harper.
2010-Yili 28-yanwar, kanada bash ministiri Stephen Harper.
en.wikipedia.org

Tunisni qattiq qolluq bilen idare qilghan diktator bin aliy, xelqning bir hepte dawam qilghan isyanidin kéyin 14 -yanwar küni se'udi erebistanigha qachqan we buning bilen tunista uning 23 yilliq diktatoriliq hakimiyitige xatime bérilgenidi.

Buningdin bir qanche kün ilgiri, kanada bash ministiri Stephen Harper diktator bin aliy jemetining kanadada qarshi élinmaydighan kishiler ikenlikini eskertip: "kanada xelq'ara jem'iyet bilen hemkarliship, tunisning burunqi diktator hakimiyitining ezalirini bir terep qilidu. Kanada bin aliy jemetining chégradin kirishini we ularning kanadada yashishini qarshi almaydu" dégenidi.

Diktator bin alining ayalining akisi bolghan trabélsi we a'ilisidiki 6 kishi 20-yanwar küni, shexsi ayroplanigha olturup, kanadaning montré'al shehirige qéchip kelgenidi. Tunisning eng chong béyi hésablinidighan milyardér bélhassén trabélsining kanadada zor miqdarda mal-mülki barliqi ilgiri sürülmekte.
Trabélsi qéyni akisining prézidéntliq hoquqidin paydilinip, tunisning axbarat wasitiliri, banka we awi'atsiye qatarliq sahelirini monopol qiliwalghan bolup, uning pul aqlash jinayetliri bilen shughullan'ghanliqimu tilgha élinmaqta...

Yéngidin qurulghan tunis hökümiti 26-yanwar küni, trabélsi a'ilisining pütün mal-mülkining parixorluq we qanunsiz yollardin kelgenliki we bu mal-dunyani chet'elge qanunsiz yötkigenlikini ilgiri sürüp, kanada da'iriliridin uning kanadadiki mal-mülkini tonglitishni telep qilghanidi. Kanada hökümiti tunis hökümitining telipige bina'en, aldi bilen trabélsining kanadada menggülük olturaqlishish salahiyitini bikar qildi.

Kanada hökümitining izahlishiche, trabélsi kanadada menggü olturaqlishish salahiyitige ige bolsimu, lékin u 5 yil ichide héchbolmighanda 2 yil kanadada yashimighan. Kanada qanuni boyiche, menggülük olturaqlishish salahiyitige érishken kishi, 5 yil ichide az dégende ikki yil kanadada qélishi kérek. Bolmisa uning bu salahiyiti aptomatik bikar qilinidu.

Kanada tashqi ishlar ministiri Lawrence Cannon trabélsining mal-mülkini tonglitish üchün uning hésab nomurlirini tekshürüwatqanliqini, munasiwetlik organlarning trabélsining montré'aldiki adwokati bilen alaqe qiliwatqanliqini tekitlep: "ular kanadada siyasiy panahliq tilidi. Biz öz waqtidila bu kishilerning kanadada qarshi élinmaydighanliqini bildürgeniduq. Hemmige melumki, kanada qanun döliti. Biz ularni qanun boyiche bir terep qilimiz." Dédi.

Trabélsi a'ilisidikiler siyasiy panahliq tileshtin ilgiri, ministir lawrenche kannon, kanadaning trabélsining mal-dunyasini tonglitishtin bashqa, yene uni tunis da'irilirige ötküzüp bérishni oylishiwatqanliqini bildürgenidi. Trabélsi a'ilisining kanadada siyasiy panahliq tilishi bilen kanada hökümitining uni chégradin qoghlap chiqirish pilani waqtinche sogha chilashti.

Kanada qanunigha asaslan'ghanda, kanada sot mehkimisining trabélsining siyasiy panahliq telipini tekshürüp, axirqi höküm chiqirishigha birqanche yil kétidu. Bin alining qizi we uning yoldishimu kanadada yashaydu, ularningmu kanadada zor miqdarda mal-mülükke ige ikenliki we trabélsi a'ilisining bolsa kanada heshemetlik qoruqliri we xususi ayropilan istansisi barliqi ilgiri sürülmekte.

Diktator bin aliy jemeti 20 nechche yil tunis dölitining iqtisadi jan tomurlirini qolgha kirgüzüwélip, döletni mafiya sheklide bashqurup kelgenidi. Tunista bin aliy hakimiyitining xelqning isyani bilen ghulap chüshüshi, misir we bashqa diktator döletlerdiki xelqlerge ilham bergen bolsa,dunyadiki barliq diktatorlarni chöchütti. Xitay bolsa tunis we misir xelqning hakimiyetke qarshi isyanlirini xewer qilishqa qattiq cheklime qoydi.

Toluq bet