Қорғас наһийиси қаттиқ кәлкүн апитигә учриди

2005-06-15
Елхәт
Пикир
Share
Принт

Бу йил баһар башлиниши билән уйғур елидә, болупму тәңри теғиниң шималий етәклиридә кәлкүн апәтлири пәвқуладдә көп көрүлмәктә. Бу кәлкүн апәтлирини асасән қаттиқ ямғур пәйда қилған.

50 Йилдин буянқи еғир апәт

13- Ийонда, илиниң қорғас наһийисиниң алмилиқ һәм лусигоң базарлири қаттиқ ямғур кәлтүрүп чиқарған кәлкүн апитигә учриди. Апәт районидин игә болған әң йеңи учурларға асасланғанда, бу кәлкүн апитидә һазирға қәдәр төт адәм өлгән, төт адәм яриланған йәнә 15 яшлардики бир қиз йоқап кәткән.

Йәрликләрниң билдүрүшичә, бу 50 йилдин буян йүз бәргән әң еғир кәлкүн апити болуп, лусигоңниң биринчи һәм сәккизинчи кәнтлиридә апәт һәммидин еғир болған.

Или области хәвәр торида берилгән мәлуматта көрситилишичә, қорғасниң алмилиқ, лусигоң қатарлиқ алтә кәнтидә җәмий 200 аилиликниң өйи өрүлгән.10 Милйон юән қиммитидики су иншаат қурулушлири еғир вәйранчилиққа учриған,30 миң мо терилғу йәрләрни асасән су басқан. Һазирғичә тәхминләнгән иқтисадий зиян 50 милйон юәндин ашидикән. Кәлкүндә деһқан- чарвечиларниң қанчилик мал- варанлириниң өлгәнлики һәққидә техи санлиқ мәлумат чиқирилмиған.

Қорғас наһийә базиридики бир киши кәлкүн апитиниң, наһийә базириға анчә тәсири болмиған болсиму әмма, алмилиқ һәм лусигоң базарлири кәлкүн еғизи болғачқа һәр йили мушундақ апәтләр йүз берип туридиғанлиқини билдүрди.

Биз йәнә, гозигув йәни алмилиққа телефон қилип, апәттики амминиң әһвалини соридуқ. Бир қазақ аял бу кәлкүн апитидә өзиниң өйигиму су киргәнлики, қошнисиниң өйиниң өрүлгәнлики, нурғун чарвичиларниң маллириниң еқип кәткәнлики қатарлиқ әһвалларни сөзләп келип "бу мән туғулуп 48 яшқа киргичә көргән әң еғир бир апәт болди" дәп билдүрди.

Еғир иқтисадий зиян

Биз кәлкүн апити һәммидин еғир болған лосигоң базарлиқ һөкүмәткә телефон қилдуқ. Кечилик көзәттә туриватқан бир қазақ хадим, лусигоңда 8- кәнтниң әһвалиниң бәкрәк еғирлиқини әмма һөкүмәтниң ярдәмлириниң техи йетип кәлмигәнликини билдүрди.

Бу кишиниң билдүрүшичә, апәттә 15 яшларда бир қиз йоқап кәткән, кәнттики амма һазирға қәдәр униң из дерикини алалмиған икән.

Истатистикилиқ мәлуматларға асасланғанда, бу йил бешидин һазирға қәдәр уйғур елидә кәлкүн сәвәбидин өлгән адәмләр сани йигирмигә йәткән. Келип чиққан бивастә иқтисадий зиян йүз милйон юәндинму ешип кәткән.

Мушу айниң -1 һәм -2 күнлири алтай шәһәр ичи һәм алтә наһийидә ямғур сәвәбидин бирақла кәлкүн келип, нурғун иқтисадий зиян кәлтүргән иди. Бу икки һәптә ичидә, арқидинла қорғастиму зор кәлкүн апити йүз бәрди.

Биз алтайда кәлкүн апити йүз бәргән пәйттә, уйғур ели метирологийә идарисидин игилигән ахбаратимизға асасән, йеқин арида уйғур елиниң шималида қаттиқ ямғур йеғип, техиму зор кәлкүн апәтлириниң йүз бериш еһтималлиқи һәққидә хәвәр бәргән идуқ.

Уйғур елидики кәлкүндин мудапиәлиниш тармақлиридин игилишимизчә, бу йил уйғур ели илгирики йилларға қариғанда еғир болған тәбиий апәтләргә йүзләнмәктә икән. (Гүлчеһрә)

Пикирләр (0)
Share
Толуқ бәт