Hindi'istan bixeterlik qisimliri qoralliq mawchilar ni jiddiy tazilashqa bashlidi

2007-10-26
Élxet
Pikir
Share
Print

'Asiya waqit géziti' de 10 ‏- ayning 25 ‏- küni musteqil yazghuchi jéysén motlagning hindistanning heyder'abadtin yollighan doklatini élan qildi.

Hindistanda 'mawchilar' ning zorawanliq heriketliri özlüksiz dawam qilmaqta

Musteqil yazghuchi jéysinning doklatida bayan qilinishiche, 40 yildin buyan hindistanda 'mawchilar'ning zorawanliq heriketliri özlüksiz dawam qilmaqta. Ular az dégende 535 qétim qoralliq hujum qozghidi. Hindistanda buyil 1 ‏- aydin 9 ‏- ayghiche qoralliq 'mawchilar' teripidin öltürülgen adem sani 384, buning ichide chatisgra shtatida öltürülgen adem sani 298, antara shtatida öltürülgen adem sani 59. Yazghuchi bu sanliq melumatni mexsus qoralliq heriketler ehwalini közitiwatqan yéngi déhlidiki asiya kishilik hoquq merkizidin igiligen.

Musteqil yazghuchi jéysinning doklatida bayan qilinishiche, 'hindistan kommunistik partiyisi'ni kishiler adette qisqartip 'mawchilar' dep ataydu. Bu 'mawchilar' bolsa buningdin 40 yil ilgiri gherbiy bin'galning nashalbari sheherchiside yüz bergen kommunistlar qozghilingini xatirilesh üchün, hazir özlirini 'nashalitlar' dep ataydu.

Antara shtatida mawchilar éghir meghlubiyetke uchrighan

Mawchilarni tetqiq qiliwatqan mutexessis shri nawas réddi ependining éytishiche, yéqinda , hindistanning antara shtatidiki mawchilar hindi'istan saqchilirining jiddiy tazilash herikiti arqiliq éghir meghlubiyetke uchrighan. ‏-‏ Dep bayan qilinidu musteqil yazghuchi jéysinning doklatida, ‏-‏ 'mawchilar' hindistanning merkizi rayonliridin bir qeder yéraq bolghan chattisgra shtatigha chégridash ormanliqlargha kétip, yushurun heriket élip bérishqa bashlighandin kéyinmu, ularning bir nechche muhim yétekchiliri shu jaylardiki hökümet teshkilligen 'owchilar' teripidin tazilan'ghan.

Hökümetning yer -zémin siyasiti chuqum xelqqe paydiliq bolushi kérek

Doklatta bayan qilinishiche, bu qétim antara shtati hindi'istan hökümiti élip barghan 'mawchilar'ni jiddiy tazilash herikitini muhim tejribe -sawaqlar bilen teminligen. Uningda bayan qilinishiche, 1960 ‏- yillirida, hindistanning antara shtatida 'mawchilar'ning keng kölemlik 'inqilabiy herikiti' yüz bergen idi.

Eyni waqitta qoralliq mawchilar bu shtatta qozghighan térilghu yerlerni déhqanlargha teqsim qilip béridighan 'yer islahati' herikiti bir qisim déhqanlarning qollishigha ige bolghan idi. Buning tesiri yaxshi tazilanmighanliqtin, bu yil hindi'istan bixeterlik qisimliri waran'ga rayonida qozghighan herbiy herikette 'mawchilar'ning somanna isimlik bir yétekchisini étip tashlighanda, mehelle xelqi buninggha 'biguna ademni öltürgenlik' dep qarshi chiqqan idi.

Shuningdin kéyin antara shtatning bir ministiri shu jaygha barghanda, uning 3 neper xizmetchisi minagha dessep xeterge yoluqqan. Yazghuchining bayan qilishiche, eger hökümetning yer -zémin siyasiti xelqqe paydiliq bolmisa, kommunistlarni qattiq qolluq bilen basturush arqiliq mesilini hel qilghili bolmaytti. Xuddi mawchi sha'ir ra'o warawa éytqandek, 'nashalitlar' haman yene tirilip qopudu.

Jargand, bihar shitatlirida mawchilarni owlaydighan 2000 din artuq zerbidar bar

Doklatta bayan qilinishiche, 'mawchilar' hindistanning yéraq jaylardiki ormanliqlirida özi xan - beg boluwalghan. Ismini ashkarilashni xalimighan bir axbarat xadimining yazghuchigha éytip bérishiche, hindistan saqchiliri köp yillardin buyan qoralliq 'mawchilar'ning yushurun hujumigha uchrap kelmekte.

Hökümetning hazirqi tedbiri ünümlük bolmaqta. Hazir 'mawchilar' heriket qiliwatqan jargand, bihar shtatliri da'iriside 2000 din artuq zerbidarlar bar. Bu zerbidarlar 'owchilar' dep atilidu. Bu 'owchilar' ormanliqlarda heriket élip bérish jehette mexsus herbiy telim alghan tejribilik jengchiler. Ular 1990 ‏- yilidin kéyin 20 nechche qétim wezipe ötigen. Ularning pa'aliyiti arqiliq, qorallan'ghan 'mawchilar'ning buningdin üch yil ilgiriki 1000 adimidin hazir aran 400 i qaldi.

Ziyankeshlikke uchrighan déhqanlar we ayallar qoralliq 'mawchilar'ning jinayitini ispatlimaqta

Doklatta bayan qilinishiche, buyil 7 ‏- ayda hindistanning chattisgra, bihar shitatlirida heriket qiliwatqan 'mawchilar' yerlik déhqanlarni tériqchiliq qilmasliq shekli bilen hökümetke qarshi turushqa mejburlighan. Ulargha boy sunmighan déhqanlarni jazalighan. Saqchilarning éniqlishiche, 'mawchilar' bu jaylarda déhqanlargha éghir parakendichilik salghan. Ular 11 neper déhqanni étip tashlap, pütün mülkini bulap ketken. Ayallargha kolléktip basqunchiliq qildighan weqe da'im yüz bérip turghan. Hazir ziyankeshlikke uchrighan déhqanlar we ayallar qoralliq 'mawchilar'ning jinayitini ashkara ispatlimaqta.

Musteqil yazghuchi jéysén motlagning hindistanning heyder'abadtin yollighan doklatida bayan qilinishiche, yéqindin buyan hindi'istan bixeterlik qisimliri qoralliq 'mawchilar' ni tazilash herikitini jiddiy élip barmaqta. (Weli)

Pikirler (0)
Share
Toluq bet