Олимпик мунасивити билән маканлиридин көчүрүветилгән адәм сани сахта елан қилинмақта

2008-02-20
Елхәт
Пикир
Share
Принт

Бейҗиң һөкүмитиниң билдүрүшичә, бейҗиң олимпик мәйдани қурулуши мунасивити билән, туралғу маканлиридин айрилған адәм сани аран 14 миң икәнликини, буларниң 6034 аилиниң әзалиридин тәркип тапқанлиқини билдүрди.

Бейҗиң шәһәрлик қурулуш комитетиниң муавин мудири җаң җямиң чаршәнбә күни мухбирларни күтивелиш йиғинида, бу һәқтә ениқ санлиқ мәлумат бәргән болуп, у олимпик мәйданини ясаш җәрянида топлам 14 миң 901 адәмниң өйлиридин көчүрүлгәнликини, шуниңдәк бу кишиләрниң өз ихтиярлиқи билән көчүрүлгәнликини тәкитлигән. Бирақ, җаң ейтқан санлиқ мәлумат, бир қисим хәлқара тәшкилатлар тәрипидин тәминләнгән санлиқ мәлуматтин алаһидә дәриҗидә пәрқлинидиғанлиқи ашкариланмақта.

1 Милйон 250 миң кишиниң өй маканлиридин көчүрүлгәнлики мәлум

Хәлқара кишилик һоқуқ тәшкилатиға тәвә "туралғу өй ‏- земин һоқуқи вә мәҗбурий қоғлап чиқириш мәсилиси мәркизи" ниң ениқлишичә, хитайда олимпик мәйдани бәрпа қилиш үчүн елип берилған тәйярлиқ хизмити җәрянида 1 милйон 250 миң кишиниң өй маканлиридин көчүрүлгәнлики мәлум болған.

Олимпик тәнтәрбийә сарийини ясаш түпәйли өйлиридин көчүрүлгән адәм сани һәққидә елан қилинған бу икки санниң оттурисидики пәрқниң бу қәдәр чоң дәриҗидә пәрқлиниши, хитай һөкүмити пәқәт, олимпик мәйданини ясаш үчүн, шу мәйдан даирисигә тәвә җайдики көчүрүлгән аһалилар тоғрисидики саннила елан қилған болуп, бу сан олимпикни күтивелиш үчүн рәткә селиш, бейҗиң шәһириниң муһитини гүзәлләштүрүш үчүн, шәһәрлик һөкүмәт тәрипидин елип берилған қурулушта мәҗбурий һалда өйлири чеқиветилип көчүрүлгән адәм санини өз ичигә алмайдикән.

Көзәткүчиләр: олимпик мунасивити билән көчүрүлгән аһалиларниң санини сахта елан қилиш яман ақивәтләрни мәйданға кәлтүриду

Бу һәқтә мулаһизә йүргүзгән хитай мәсилилири буйичә тәтқиқатчи, түркийә һаҗәтәпә университетиниң профессори доктори әркин әкрәм әпәнди, хитай һөкүмитиниң олимпик мәйдани бәрпа қилиш шуниңдәк олимпик мурасими үчүн тәйярлиқ көрүш җәрянида елип берилған, аһалиларни өй ‏- земинлиридин көчүриветиш мәсилисидә санлиқ мәлуматни ениқ елан қилмай, сахта мәлумат елан қилишиниң олимпик мурасимиға хилап бир һәрикәт икәнликини, буниңдин хитайниң әзәлдин сахта учурларни елан қилиш арқилиқ хәлқарани алдап келиватқанлиқини биливалғили болидиғанлиқини көрситип өтти.

Әркин әкрәм әпәнди мәйданға келидиған биринчи хил ақивәт тоғрисида тохтулуп өтиду. Өй ‏- маканлиридин айрилған бейҗиң аһалиси, йәни 1 милйон 250 миң адәмниң һәммиси, өз разилиқи билән маканлирини тапшуруп бәргәнму, яки хитай һөкүмити нөвәттә иҗра қиливатқан өй - земинлиридин көчүрүшкә қошулмиған аһалиларға нисбәтән, буйруқ буйичә мәҗбурий һалда көчүрүш усули билән бесим ишлитиш арқилиқ көчүрүлгәнму? дегән мәсилә буйичә мулаһизә йүргүзгән әркин әкрәм әпәнди мәйданға кәлгән иккинчи хил ақивәт һәққидә тохтулуп өтиду. (Әқидә)

Пикирләр (0)
Share
Толуқ бәт