Nur sultan nezerbayéfning köy'oghli raxet aliyif we uning ikki yardemchisi eyiblendi

2007-05-23
Élxet
Pikir
Share
Print

Qazaqistan ichki ishlar ministirliqi charshenbe küni qazaqistan prézidénti nur sultan nezerbayéfning köy'oghli raxet aliyif we uning ikki yardemchisini qazaqistan nurbank bankisining sabiq ikki xadimining görege élinish weqesi'i bilen chétishliq dep eyiblep, ular heqqide jinayi délo turghuzdi.

Weqening jeryanliri

Qazaqistan ichki ishlar ministiri baghdad xoja'exmetof, qazaqistanning awstiriyidiki bash elchisi bolghan raxet aliyif we ikki yardemchisini 18‏- we 19‏- yanwar künliri görüge élin'ghan qazaqistanning nurbank banksining sabiq ikki xadimining göröge élinish weqesige chétishliq dep eyibligen.

Qazaqsitan ichki ishlar ministiri xoja'exmetof charshenbe küni astanada muxbirlargha bergen bayanatida, qazaqistan prézidénti nursultan nezerbayifning mezkur görüge élinish weqesi heqqide toluq tekshürüsh élip bérilishi toghrisida qazaqistan ichki ishlar minsitiri we bash teptishige buyruq bergenlikini bildürdi.

Franisye agéntliqining xewer qilishiche, görüge élin'ghan ikki kishining biri bolghan abilmajin gélimof tépilghan bolup, u iqtsadiy jinayet bilen eyiblinip sotqa tartilghan, lékin joldash timraliyif hazirghiche iz-déreksiz ghayib iken.

Xewerde éytilishiche, gélimof sotta, qollirigha koyza sélin'ghan halda eliyif we uning qoghdighuchiliri teripidin tutup turulghanliqini we mal -mülüklirini eliyifgha ötküzüp bérish üchün mejbur qilin'ghanliqini bildürgen.

Eliyif ötken hepte gélimofning sotta éytqanlirini ret qilip, buning bir siyasiy oyun ikenlikini bayan qilghan idi.

Nur sultan nezerbayifning qizi darigha nezerbayifning yoldishi bolghan eliyif, qazaqistandiki siyasiy we iqtsadiy jehettin nopuzluq ademlerning béri hésablinidu. U, qazaqistan ichki bixeterlik idarisining mu'awin re'isi bolup wezipe ötigen shundaqla uning qazaqistan nurbank bankisi qatarliq nurghunlighan shirketler bilen shirikliki bar.

Siyasi arqa körünüshler

Siyasiy mulahizchilerning bildürüshiche, bundin burun eliyif bilen nursultan nezer bayif otturisida, nezerbayifdin kéyin, uning ornini kim alidighanliqi toghrisida jiddiy talash-tartish yüz bergen iken. Ularning éytishiche, bezi kishilerning yardimi bilen nezerbayif we eliyif kélishken we 2002‏- yili eliyif qazaqistanning awistiriyidiki bash elchisi wezipisige teyinlinip, awistiriyige ewetilgen.

Lékin eliyif 2005‏- yili qazaqistan'gha qaytip kélip, qazaqistan mu'awin tashqi ishlar ministiri wezipisini öteshke bashlighan. Emma yanwar éyida nurbank bankisining ikki xadimining görüge élinish weqesidin kéyin, qayta qazaqistanning bash elchisi wezipisige teyinlinip, awistiriyige ewetilgen idi.

Bezi qazaqistan hökümet xadimliri we siyasiy mulahizichiler, eliyifning qazaqsitan parlaméntining nur sultan nezerbayifni qazaqistanning ömür buyi prézidénti qilip békitkenlikidin we parlaméntning bu qararining prézidént teripidin qobul qilin'ghanliqidin kéyin, jinayet bilen eyiblinip qazaqistanning siyasiy sehnisidin yiraqlashturulghanliqini eskertip, buning qazaqistanda hakimiyet üchün dawamlishiwatqan siyasiy küresh bilen munasiwetlik bolushi mumkinliqini bildürmekte.

Bezi siyasiy analizchilar, néme bolushidin qet'iynezer, qazaqistanning siyasiy meydanidiki bundaq heriketlerning chet'el sodigerlirining qazaqistan'gha meblegh sélish arzusigha selbiy tesir yetküzidighanliqini tekitlimekte. (Ömer qanat)

Pikirler (0)
Share
Toluq bet