Ниҗат абдуреһим: 'тәқдирим ениқ әмәс, әмма басқан қәдимимгә пушайминим йоқ'

Нөвәттә шветсарийидә панаһлиқ тиләп туруватқан вә икки қетим чеградин чиқирилиш хәвпидин қутулуп қалған сабиқ сақчи ниҗат абдуреһим, өз тәқдириниң һелиһәм ениқсиз икәнликини, шундақтиму, басқан қәдимигә йәни, хизмитидин истепа бәргәнлики, чәтәлгә чиқип сиясий панаһлиқ тилигәнлики қатарлиқ һаятидики бурулуш характерлик қәдәмлиригә пушайман қилмайдиғанлиқини билдүрди.
Мухбиримиз шоһрәт һошур
2010-10-04
Елхәт
Пикир
Share
Принт
Сүрәт, сабиқ хитай алаһидә сақчиси ниҗат абдуреһимниң йавропада мәлум паналиқ тиләш мәркизидики көрүнүши.
Сүрәт, сабиқ хитай алаһидә сақчиси ниҗат абдуреһимниң йавропада мәлум паналиқ тиләш мәркизидики көрүнүши.
http://news.boxun.com Дин елинди.


Йеқинқи 15 йил мабәйнидә, уйғур районида көп қетимлап қаттиқ зәрбә бериш һәрикәтлири елип берилди. "5 ‏- Феврал" вә "5 ‏- июл" вәқәлиридә икки қетим қаттиқ бастуруш давам қилди.

Мәлум болушичә, мана бу һәрикәтләр давамида наһәқчиликләргә чидимиған бир қисим уйғур сақчилар вәзиписидин истепа бәргән болса, бәзилири вәзипә иҗра қилиш давамида, өз миллитигә қарита һесдашлиқини йошуралмай қалған әһвалда вәзиписидин елип ташланған. Әмма буларниң ичидә чәтәлгә қечип чиқип вәзийәтни дуняға паш қилиш пурситигә еришәлигәнләр вә яки бундақ қилишқа тәвәккүл қилалиғанларниң сани бәк аз. Мана булардин бири, ниҗат абдуреһимдур.

Ниҗат абдуреһим, чәтәлгә чиққандин кейин, өзи шаһит болған бир қисим ечинишлиқ вәқәләрни, б д т ниң алақидар органлириға мәлум қилған. Униң билдүрүшичә, һазир у хәтәрдин қутулуп кәткини йоқ, әмма басқан, қәдимигә пушайман әмәс; әксичә, миллитиниң дәрдини азрақ болсиму дуняға паш қиливалғини үчүн мәмнун. У бу хил паш қилишлар көпәйгәнсери, хитайға хәлқара бесимниң күчийидиғанлиқи, буниң нәтиҗисидә һеч болмиғанда, зулумғу учриғучилар санида төвәнләш болидиғанлиқиға үмид билән қаримақта.

Ниҗат абдуреһимниң билдүрүшичә, у хизмитидин истепа бәргән күни бәзи достлири уни "әхмәқ" дәп мазақ қилған. Безиләр уни истепасини яндурувелишқа үндигән. Әмма униң аилиси, униң сақчидин чекингәнлик қараридин мәмнун болған.

5 ‏- Июл вәқәсигә охшаш зор вәқәләр, бәзи уйғур сақчиларни хизмитидин ваз кечишкә үндигән, йәнә бәзләрни орун вә мәртивә җәһәттин йәниму илгириләшкә қизиқтурған вә бу хил интилиштикиләргә пурсәт яритип бәргән.

Бу һәқтә кейинки программилиримизда мәлумат беримиз.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Толуқ бәт