Хитай һөкүмити норвегийигә қаратқан саяһәтчилик ишлирини тохтатти

2010-Йили нобел тинчлиқ мукапати хитай өктичиси лю шавбоға берилгәндин кейин, хитай билән норвегийә оттурисида сиясий сүркилиш башланған иди.
Ихтиярий мухбиримиз айгүл йүсүп
2012-07-23
Елхәт
Пикир
Share
Принт
Норвегийә саяһәт райони. (Мунасивәтлик мақалидин елинған)
Норвегийә саяһәт райони. (Мунасивәтлик мақалидин елинған)
www.abcnyheter.no

Шу йилдин башлап хитай һөкүмити өзиниң дуня сода тәшкилатиға әзалиқ салаһийитигә хилап һалда норвегийигә сода-тиҗарәт җәһәттә бир қатар чәклимиләрни қоюшни башлиған. Нөвәттә норвегийиниң деңиз вә қуруқлуқтики язлиқ саяһәтчилики таза қизийдиған саяһәт пәслидә хитай һөкүмити йәнә хитай пуқралириниң деңиз саяһәт пиланини әмәлдин қалдурғандин башқа, норвегийиниң саяһәтчилик ширкәтлириниң хитайға қарита қилған саяһәт еланлириниму чәклигән.

Хитайдики саяһәт ширкәтлириниң һәммиси һөкүмәт тәвәликидә болуп, хитайдики барғансери ронақ тепиватқан саяһәт базири явропаға болған коллектип саяһәтчилик ишлири билән күчлиниватқан болғачқа, 2010-йили хитай һөкүмити саяһәтчиләрниң норвегийигә саяһәт қилишини вақитлиқ чәклигән болсиму, лекин норвегийини саяһәт қилидиған дөләтләр тизимлики қатаридин чиқирип ташлимиған иди.

Лекин, һазир норвегийә явропани айлинип саяһәт қилидиған дөләтләр тизимликидин чиқириветилгән болуп, хитайниң дөләтлик саяһәт идариси саяһәт өмәклириниң саяһәт пиланини өзгәртивәткән. Илгири японийә асия дөләтлири бойичә явропаға қарита саяһәтчилик ишлирини қанат яйдурған дөләтниң әң алди болған болса, һазир хитай өзиниң барғансери бейиватқан бай пуқралири билән явропа саяһәтчиликини әң тез тәрәққий қилдуруватқан дөләтләрниң бири болуп қалған.

Норвегийә хитай һөкүмити тәрипидин явропани айлинип саяһәт қилидиған дөләтләр тизимликидин чиқирип ташланғандин кейин, норвегийиниң чәтәлликләрни башқуруш идариси норвегийиниң бейҗиңда турушлуқ әлчиси билән алақилишип, бу чәкләш буйруқи һәққидә ениқ җавабқа еришмәкчи болған.

Норвегийә билән хитай һәр икки тәрәп дуня сода тәшкилати келишимигә әза дөләтләрдин болуп, хәлқаралиқ сода келишими хитайниң норвегийигә йүргүзмәкчи болған нөвәттики қарарини чәкләйду. Дуня сода тәшкилати өзигә әза болған, сода ембаргосиға учриған дөләтләрниң наразилиқини тапшуруп алиду вә униңға қарайду.

Мәзкур хәвәргә қарита, норвегийидики тор бәт зиярәтчилиридин бирәйлән өз қарашлирини мундақ язған: хитай һөкүмитиниң икки дөләт арисидики дипломатик мунасивәтни вә бизниң ширкәтлиримизниң хитай билән болған сода алақисини бикар қилиши немә дегән күлкилик-һә? мениңчә болғанда, уларға өз усули билән җаваб қайтуруш керәк. Данийидики көплигән сиясәтчиләр хитайдәк мәдәнийәтсиз дөләтниң дипломатлири билән учришишни халимайду. Норвегийиму худди данийидәк қилиши керәк иди. Бизниң асаслиқ тиҗарәт базиримиз явропа, скандинавийидики дөләтләр вә америка болуши керәк.

Йәнә бир норвег тордаш ғәрб иқтисадиниң өсүши һәққидә тәһлил йүргүзүп мундақ язған:
Әгәрдә хитай ғәрбтики дөләтләр тәрипидин коллектип һалда байқут қилинған болса, буниң норвегийиниң нөвәттики вәзийәттин қутулушиға ярдими болатти. Кейинки он йилда ғәрб иқтисадиниң гүлләп яшнишиға хитайдин ғәрб базарлириға бөсүп киргән әрзан баһалиқ товарларға истемалчиларниң еһтияҗиниң көрүнәрлик ашқанлиқи сәвәб болған.

Бу йил норвегийиниң чоң типтики деңиз саяһәтчилик парахотлири, ширкәтлири 7 миң нәпәр хитай саяһәтчиниң келишини тәхмин қилған болсиму, лекин хитай һөкүмити чәкләш қарарини техиму рошәнләштүргән һәмдә бу йил язда деңиз саяһити қилидиған 500 нәпәр саяһәтчиниң норвегийә билән қилған саяһәт тохтамнамиси вә саяһәт пиланини пүтүнләй әмәлдин қалдурған.

Нөвәттә, норвегийә һөкүмити хитай базирини ечишниң чарә-тәдбирлири һәққидә издәнгәндин башқа, норвегийигә қаритилған сода-тиҗарәт җәһәттики байқут қилишниң вақитлиқ болуп қелишини үмид қилмақта икән.

Пикирләр (0)
Share
Толуқ бәт