Хитай дөләт бихәтәрлик органлиридики оғурлуқчә аңлаш

Хитайниң дөләт бихәтәрлик министирлиқиниң бир муавин министири, бихәтәрлик идариси хадимлириниң чәтәлләр билән бивастә алақиси бар пуқраларниң телифон, интернет алақилирини аңлиған вә көзәткәндин сирт, алаһидә әһвал астида хитайниң юқири дәриҗилик әмәлдарлириниң телефон алақилириниму аңлайдиғанлиқини ашкарилиған.
Мухбиримиз миһрибан
2009-12-28
Елхәт
Пикир
Share
Принт

Бошун тор бетиниң 27 - декабирдики хәвиридә дейилишичә, хитай дөләт бихәтәрлик министирлиқиниң әмәлдари бу гәпни, өткән һәптә бейҗиңдики мәркизи партийә мәктипидә ечилған өлкә дәриҗилик әмәлдарларни қисқа муддәтлик тәрбийиләш корсида лексийә сөзләш җәрянида, шаңхәйдин кәлгән муавин министир дәриҗилик бир әмәлдарниң " дөләт бихәтәрлик идариси юқири дәриҗилик әмәлдарларниңму телифон алақилирини аңламду?" дегән соалиға җаваб бәргән чеғида дегән икән.

Хитай дөләт бихәтәрлик министирлиқиниң муавин министири,мәркизи һөкүмәтниң, өткән әсирниң 80- йиллиридила бихәтәрлик идарилириниң пуқраларниң телифон алақилирини аңлаш даирисини бикитип қаттиқ түзүм вә бәлгилимиләр чиқарғанлиқини, дөләт бихәтәрликигә четилидиған мәзмунлар билән мунасивәтлик телифон мәзмунлирини аңлайдиғанлиқини, буниңда, өлкә дәриҗилик әмәлдарларниң телифон алақилирини аңлаш еһтияҗи туғулғанда, чоқум мәркизи һөкүмәт сияси-қанун министирлиқиниң бивастә тәстиқидин өтидиғанлиқини тәкитлигән.

Бу әмәлдар курсантларниң, дөләт бихәтәрлик идарисиниң қандақ әһвал астида пуқраларниң телифон алақисини аңлайдиғанлиқи һәққидики соалиға җаваб берип мундақ дегән: "дөләт бихәтәрлик идарисиниң пуқраларниң телефон алақилирини аңлаш даириси адәттә дөләт мәхпийәтликигә ятидиған учурлар даирисидә болиду, йәнә бирси мәркизи һөкүмәт сиясий бюруси диққәт қилидиған чоң вәқәләр йүз бәргинидә, әдлийә-қанун тармақлириниң тәстиқисиз омумйүзлүк һалда пуқраларниң телефон алақилирини аңлайду. Мәсилән, бу йил июлда йүз бәргән үрүмчи вәқәсидин кейинки, чәтәлләрдә уруқ-туғқанлири барларниң телефон алақилирини омумийүзлүк аңлаш мана мушу хил алаһидә әһваллар даирисигә ятиду."

Бу әмәлдар нөвәттә дөләт бихәтәрлик идариси қоллиниватқан омумйүзлүк аңлашта бәзи сәзгүр сөз ‏- ибариләргә қарита аптоматик һалда сүзүвелип аңлаш йолға қоюлғанлиқини баян қилди. Униң дейишичә, үрүмчи вәқәсидин кейин, шинҗаңға қаритилған омумйүзлүк аңлашта үрүмчи қатарлиқ чоң шәһәрләрдики телефон точкилириға аптоматик аңлаш қурулмиси орнитилипту, әмма кичик наһийиләр вә йезиларға бу хил қурулма техи орнитилип болмапту. Дөләт бихәтәрлик министирлиқиниң бу әмәлдари, курсантларниң, бихәтәрлик идарисиниң пуқраларниң телефон алақисини аңлаш даирисиниң қанчиликлики һәққидики соалиға җаваб берип, һазир аңлаш даирисиниң кеңийиватқанлиқини, дөләт бихәтәрлик идарисидин башқа җамаәт хәвпсизлик идарилириниңму делоға мунасивәтлик кишиләрниң телефон алақилирини аңлайдиғанлиқини билдүргән.

У курсантларниң шәхси мәхпийәтликидин әнсирәп сориған соаллириға җаваб берип мундақ дегән: "көпчиликниң унчивала әндишә қилип кетишиниң һаҗити болмиса керәк, дөләт бихәтәрлик идарилириниң дөләт мәхпийәтликигә мунасивәтлик телефонларни аңлиши йоллуқ. Лекин мән көпчиликни шуниңға агаһландуримәнки, өзүңларниң йүрүш-турушуңларға һәр һалда диққәт қилғиниңлар яхши. Дөләтниң бихәтәрликигә биз мәсул, әмма өзүңларниң бихәтәрликигә қарита һәр бириңларниң көңлидә ениқ бир сан болуши керәк."

У хитайниң өлкә дәриҗилик әмәлдарлиридин тәркип тапқан бу курсантларни агаһландуруп мундақ дегән: "биз телефон алақисигә қаратқан аңлашлиримиз җәрянида, гәрчә дөләт бихәтәрликигә четилидиған мәзмунлар ипадиләнгән бәзи учурларға еришкән болсақму, лекин еришкән учурлиримизниң зор көпчилики йәнила бир қисим әмәлдарлиримизниң турмуштики чирикликигә тақилидиған аваз хатирилиридин ибарәт болуп қеливатиду, йәни мал - мүлкини чәтәлләргә йөткәш, телефонда ашнилири билән параңлишиш дегәндәк мәзмунлар, шундақла бир қисим юқири дәриҗилик әмәлдарларниң өз ‏- ара һоқуқ күришигә даир мәзмунларму бар. Буниң ичидә һәтта сиясий бюруниң әмәлдарлириниң сөһбәт хатирилириму бар. Мән шуниңға һәйранмәнки, бу хил сөһбәтләрни биз аңлимиған һаләттиму чәтәл ахбарат органлириниң аңлиши мумкинғу? әҗәба, бизниң әмәлдарлиримиз һамақәтликтә шу дәриҗигә йәткән болса - һә!"

У дөләт бихәтәрлик идарисиниң әмәлдарларниң мәхпийәтликигә капаләтлик қилалмайдиғанлиқини билдүрүп мундақ дегән: "адәттә бу хил мәзмундики аваз хатирилири буйруқ билән йоқ қиливетилиду. Әмма шу нәрсә сәмиңларда болсунки, дөләт бихәтәрлик идарисидә телефон аңлаш хизмитигә қоюлғанларниң көпчилики алий мәктәпни әмдила түгәткән яшлар, гәрчә бу хадимлар хизмәт мәзгилидә уларниң қол телефон қатарлиқ һәр қандақ аваз көчүрүш қурулмисини иш орниға әкириши мәни қилинған, иш орнидин айрилғинида һәтта бир парчә қәғәзниму елип чиқип кетиши чәкләнгән болсиму, лекин уларниң меңисигә орнап кәткән мәзмунларни йоқ қиливетиш имканийити биздә йоқ. Шуңа һөкүмәтниң юқири дәриҗилик әмәлдари болуш сүпитиңлар билән силәр өзүңлар диққәт қилишиңлар керәк, чүнки силәрниң һәр бир ишиңларни кишиләр билип туруши мумкин, гәрчә бу хадимлар һазирчә бизниң хизмәтчилиримиз болсиму, әмма бундин кейин улар қандақ җайларда ишлиши мумкин буни бир немә демәк тәс."

Бу әмәлдар сөзиниң ахирида йәнә, хитайда дөләт бихәтәрлик идарисиниң дәриҗисиниң толиму төвән орунда туридиғанлиқини, шуңа адәттә бу әмәлдарларни агаһландуруш пурситиниң йоқлуқини билдүргән.

Бошүн тор бекитиниң мухбири бу курсқа қатнашқан өлкә дәриҗилик әмәлдардин иккийләнни зиярәт қилиш җәрянида юқириқи учурларни игилигән болуп, намда чәтәлләрдин келидиған бөлгүнчи күчләр һәм чәтәлгә ахбарат йәткүзгүчиләрни тутуш, дөләт бихәтәрликини қоғдаш мәқситидә елип берилидиған бу хил телефон аңлашта, хитай бихәтәрлик идарилириниң әң көп игилигән учури өзиниң юқири дәриҗилик әмәлдарлириниң чириклик вә парихорлуқи, әмәлдарлар арисида өз-ара һоқуқ талишиш күрүши қатарлиқларға четилидиған мәхпийәтликләр болған.

Көзәткүчиләрниң қаришичә, хитай һөкүмитиниң бу сәтчиликләрни авам хәлққә җакарлашқа җүрәт қилалмаслиқи, көрүлгән мәсилиләрни һәл қилишниң орниға, бу пакитларни буйруқ билән йоқ қиливетилиши хитай коммунист һөкүмитиниң чирик әмәлдарларни өз қанат астиға иливатқанлиқиниң ипадиси болуп, гәрчә һөкүмәт әмәлдарларниң чирикликигә даир пакитларни йоқитиватқан болсиму, лекин бу реал әмәлийәтни йошурушқа амалсиз икән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (1)
Share

Исимсиз оқурмән

Шуңа, вәтәнгә телфун қилғанда, " маву гәпни һәммә ﯪдәм ﯪңлап туриду җуму, ошуқ гәп қилмайли" дийишимиз..
Һәҗәп қамлашмиған..Йаки ﯪдәмниң шәхсийитиму болмиса һә?! мушу хитайда болса ﯪдәмниң каллисидики ой-пикирләрни тәкшурүш әсваби барлиққа кәлсә, һәтта, ой-пикирлиримизниму контирул қилсам дәйду бу әхлақсизлар!

Dec 29, 2009 03:25 AM

Толуқ бәт