Norwégiye we shiwétsiyide xitay olimpikige qarshi namayish élip bérildi

2007-10-15
Élxet
Pikir
Share
Print

Olimpik-Norw-200.jpg
Olimpik musabiqisini bayqut qilishni meqset qilghan insan heqliri mesh'ilini yetküzüsh pa'aliyiti13 ‏- öktebir shenbe küni norwégiyining oslo shehirige yitip kélip öz pa'aliyiti bashlighan. Pa'aliyetke, norwégiyidiki Uyghurmu ishtirak qilghan. RFA Photo / Yalqun

Xitayda ötküzülmekchi bolghan olimpik musabiqisini bayqut qilishni meqset qilghan insan heqliri mesh'ilini yetküzüsh pa'aliyiti girétsiyidin bashlinip, ötken hepte shwétsiyige yitip kelgen idi. U shiwétsiyining jenubidiki chong sheherler bolghan malmö, yötéboriy sheherlirini bésip ötüp 13 ‏- öktebir shenbe küni norwégiyining oslo shehirige yitip kélip öz pa'aliyiti bashlighan.

Oslo shehiride ötküzülgen bu pa'aliyetke norwigiyide pa'aliyet élip bériwatqan birqisim insan heqliri teshkilatliri, Uyghur, tibet jem'iyetliri we bir qisim qoshna döletlerdin kelgen wekiller qatnashqan. Pa'aliyetke qatnashqan ömer hajim bu pa'aliyet heqqide qisqiche melumat bérip ötti.

Etisi yekshenbe küni yeni 14 ‏- öktebir küni chüshـtin kéyin sa'et 2:30 da insan heqliri mesh'ili shiwétsiyining stokholim shehirige yitip kélip öz pa'aliyitini bashlidi. Pa'aliyet 2:30 sa'et etrapida dawamlashti.

Pa'aliyet, "xitaydiki insan heqliri "jem'iyitining riyasetchilikide élip bérildi. Pa'aliyetke shiwétsiyide yashawatqan Uyghurlar, mongghullar, tibetler xitayning insan heqliri teshkilatliri qatnashqandin sirt xitaydiki insan heqliri ehwaligha qiziqquchi shiwétler, shiwétsiye parlaminét ezaliri we kanadadin alahide teklip qilin'ghan bir qisim insan heqliri pa'aliyetchiliri qatnashti.

Pa'aliyet dawamida birqisim insan heqliri mutexessisliri sözge chiqip diktator kommunist xitay hakimiyitining xitay xelqini we xitay térritoriyiside yashawatqan Uyghur, tibet, mongghul qatarliq bashqa itnik milletlerni qirghin qiliwatqanliqini, insan heqliri depsende qiliniwatqan bundaq diktator döletlerde olimpik musabiqisini ötküzüsh olimpikning rohigha uyghun kelmeydighanliqini, xelqara jem'iyetning xitayda ötküzülmekchi bolghan olimpik musabiqisini bayqut qilip, xitayda yashawatqan xelqlerge yardemde bolushqa chaqirdi.

Pa'aliyet ehwali shiwétsiye axbaratlirining qizghin xewer qilish obiktigha aylandi. Düshenbe küni stokholimda chiqidighan nurghun gézitlerde bu heqte xewerler bérilgen we xewerlerde Uyghurlarning resimlirimu alahide orun alghan. Pa'aliyet axirida insan heqliri mesh'ili finlandiye dölitige ötküzülüp bérildi.

Xewerlerdin melum bolushiche, xitayda ötküzülmekchi bolghan olimpik musabiqisini bayqut qilishni teshebbus qilghan bu insan heqliri mesh'ili yawropani merkez qilghan 39 döletke yetküzilidiken. (Yalqun)

Pikirler (0)
Share
Toluq bet