Дуңҗу йезисида йәнә икки нәпәр намайишчи етип өлтүрүлди

2005-12-20
Елхәт
Пикир
Share
Принт
shanwei-clash-200.jpg
Доңҗу кәнтидики деһқанлар сақчиларниң алдида йүкүнүп, қериндашлириниң җәситини елип кетишигә йол қоюшини тилимәктә. Dajiyuan.com resimi

Гуаңҗудики һөкүмәт мәтбуатлиридин бири болған нәнфаң гезити йәкшәнбә күни шәнвей шәһәрлик һөкүмитиниң буйруқи билән елип берилған намайишчиларни оққа тутуш вәқәси тоғрилиқ хәвәр елан қилди. Мәзкур гезит шәнвей һөкүмәт баянатчисиниң сөзини нәқил кәлтүрүп, вәқәниң келип чиқишиға сәвәб болған, йәни дуңҗу кәнтидә елип берилған намайишни қозғиған 3 кишиниң аллиқачан әдлийә органлириға тапшуруп берилгәнликини шуниңдәк әслидә йеза аһалисиниң қанун иҗра қиливатқан қораллиқ әскәрләргә алдин һуҗум қозғап зораванлиқ елип барғанлиқини тәкитлиди.

"Йезидики амма өзлириниң оққа тутулишидин қорқмайду"

Истансимиз мухбириниң йәкшәнбә күни, йеза аһалилири билән елип барған телефун зияритидин ашкарилинишичә, намайишни бастуруш җәрянида хели көп адәмгә оқ тегип ярилинип, дохтурханиға елип берилған, йеза аһалиси йәнә мухбирға өзлириниң оққа тутулуш еһтималлиқниң барлиқини шуңа тәйярлиқ ичидә туруватқанлиқини билдүргән.

Мухбиримиз телефун зиярити елип бериш җәрянида нәқ мәйдандин пилимот авазлирини аңлиған.

Мухбирниң "йезидики амма өзлириниң оққа тутулишидин қорқмамду?" дегән соалиға җавап бәргән бу киши, "яқ, қорқмайду һазир биз уларға өлүм билән җавап беримиз, өлүм арқилиқ улар билән елишимиз" дәп җавап бәргән.

Мухбиримиз йәнә нәқ мәйданға телефун урғанда, бир деһқан икки адәмниң йәнә етип өлтүрүлгәнликини, қораллиқ әскәрләрниң һуҗуми тохтимиғанлиқини билдүргән, у вәқә җәрянини сөзләватқанда арқидин оқ авази келип турған. У мундақ дегән:

"Һазир икки адәм өлди, уларни қутқузуш үнүм бәрмиди, 3 адәм җиддий қутқузуш үстидә, шәнвей шәһириниң секретари лоң тевин, лю җиңшең қатарлиқлар буйруқ чүшүрүп, әскәрләрниң намайишчиларни бастурушини тәләп қилди"

Мухбиримиз йәнә, "сақчилардин яриланғанлар барму " дәп сориғанда йеза аһалиси " яқ, уларни яриландуруш мумкин әмәс, чүнки уларда қорал бар, пуқраларниң һуҗуми улар үчүн һечнәрсә әмәс, униң үстигә улар наһайити йирақта, әмма улар 300 метир йирақлиқта туруп оқ атса бу тәрәпкә йетип келәләйду" дәп җавап бәргән.

Асия һәптилик җурнили, шәнвей шәһиридики һөкүмәт хадимлириниң сөзини нәқил кәлтүрүп, намайишчилар оққа тутулған күни кәчтә шәһәрлик һөкүмәтниң баш секретари лоң тевинниң нәқ мәйданда икәнликини билдүргән, йәнә бир һөкүмәт хадиминиң ейтишичә, хитай қанунида қанун бойичә, әгәр җиддий бир мәсилә йүз бәргәндә, нәқ мәйдандики қоманданниң оқ чиқириш буйруқини бериш һоқуқи йоқ, оқ чиқириш буйруқини пәқәт биринчи қол рәһбәр берәләйдикән.

Кәнт аһалисиниң тәләплири

Нәнфаң гезитиниң хәвиридә йәнә, намайишчиларниң вәкили хуң шиҗүн қатарлиқлар, йеза аһалисигә 4 милярд йүән төләм берилишини, буниңдин сирт дуңҗудики һәр бир кишигә һәр ай 500 йүән беришни һәмдә електир истансисиниң аилиликләр бинасини дуңҗу кәнтигә селишни тәләп қилған дегән мәзмунлар елан қилинған болуп, бу вәқәдин толуқ хәвири бар бир киши нәнфаң гезитиниң бу хәвирини көрүп, истансимизға телефун уруп, һөкүмәтниң ялған сөзләватқанлиқини билдүрди. У бу һәқтә мундақ дәйду:

"Йеза аһалиси әслидә електир истансисидин, биринчи йили 8 милйон йүән төләм беришни, иккинчи йили 6 милйон йүән беришни тәләп қилған болуп, електир қурулушиға мәсул хадимлар бу пикиргә қошулдиғанлиқини билдүргән, йеза аһалиси уларниң вәдисидин йенивелишидин қорқуп, бу тәләпниң рәсмий язма һөҗҗәт сүпитидә бекитилишини тәләп қилған, бирақ бу тәләп әмәлгә ашмиған болуп, мәзкур тәләп намайишчилар оққа тутулғандин үч күн бурун оттуриға қоюлған иди.

Истансимизниң игилишичә, кәнт аһалисиниң, електир истансисиниң аилиликләр бинасини дуңҗу кәнти ичигә селишни тәләп қилишидики мәқсити, електир истансиси түпәйли келип чиқидиған булғинишниң алдини елишқа капаләтлик қилиш йүзисидин болған.

Хәвәрләргә қариғанда, дуңҗу кәнтидә йүз бәргән бу вәқә, хитай қораллиқ қисимлириниң 1989 ‏- йили тйәнәнмен мәйданида елип барған бастуруш һәрикитидин кейин, хитай ичидә елип барған әң қанлиқ бастуруш һәрикити һесаблинидикән. (Әқидә)

Пикирләр (0)
Share
Толуқ бәт