Dungju yézisida yene ikki neper namayishchi étip öltürüldi

2005-12-20
Élxet
Pikir
Share
Print
shanwei-clash-200.jpg
Dongju kentidiki déhqanlar saqchilarning aldida yükünüp, qérindashlirining jesitini élip kétishige yol qoyushini tilimekte. Dajiyuan.com resimi

Gu'angjudiki hökümet metbu'atliridin biri bolghan nenfang géziti yekshenbe küni shenwéy sheherlik hökümitining buyruqi bilen élip bérilghan namayishchilarni oqqa tutush weqesi toghriliq xewer élan qildi. Mezkur gézit shenwéy hökümet bayanatchisining sözini neqil keltürüp, weqening kélip chiqishigha seweb bolghan, yeni dungju kentide élip bérilghan namayishni qozghighan 3 kishining alliqachan edliye organlirigha tapshurup bérilgenlikini shuningdek eslide yéza ahalisining qanun ijra qiliwatqan qoralliq eskerlerge aldin hujum qozghap zorawanliq élip barghanliqini tekitlidi.

"Yézidiki amma özlirining oqqa tutulishidin qorqmaydu"

Istansimiz muxbirining yekshenbe küni, yéza ahaliliri bilen élip barghan téléfun ziyaritidin ashkarilinishiche, namayishni basturush jeryanida xéli köp ademge oq tégip yarilinip, doxturxanigha élip bérilghan, yéza ahalisi yene muxbirgha özlirining oqqa tutulush éhtimalliqning barliqini shunga teyyarliq ichide turuwatqanliqini bildürgen.

Muxbirimiz téléfun ziyariti élip bérish jeryanida neq meydandin pilimot awazlirini anglighan.

Muxbirning "yézidiki amma özlirining oqqa tutulishidin qorqmamdu?" dégen so'aligha jawap bergen bu kishi, "yaq, qorqmaydu hazir biz ulargha ölüm bilen jawap bérimiz, ölüm arqiliq ular bilen élishimiz" dep jawap bergen.

Muxbirimiz yene neq meydan'gha téléfun urghanda, bir déhqan ikki ademning yene étip öltürülgenlikini, qoralliq eskerlerning hujumi toxtimighanliqini bildürgen, u weqe jeryanini sözlewatqanda arqidin oq awazi kélip turghan. U mundaq dégen:

"Hazir ikki adem öldi, ularni qutquzush ünüm bermidi, 3 adem jiddiy qutquzush üstide, shenwéy shehirining sékrétari long téwin, lyu jingshéng qatarliqlar buyruq chüshürüp, eskerlerning namayishchilarni basturushini telep qildi"

Muxbirimiz yene, "saqchilardin yarilan'ghanlar barmu " dep sorighanda yéza ahalisi " yaq, ularni yarilandurush mumkin emes, chünki ularda qoral bar, puqralarning hujumi ular üchün héchnerse emes, uning üstige ular nahayiti yiraqta, emma ular 300 métir yiraqliqta turup oq atsa bu terepke yétip kéleleydu" dep jawap bergen.

Asiya heptilik jurnili, shenwéy shehiridiki hökümet xadimlirining sözini neqil keltürüp, namayishchilar oqqa tutulghan küni kechte sheherlik hökümetning bash sékrétari long téwinning neq meydanda ikenlikini bildürgen, yene bir hökümet xadimining éytishiche, xitay qanunida qanun boyiche, eger jiddiy bir mesile yüz bergende, neq meydandiki qomandanning oq chiqirish buyruqini bérish hoquqi yoq, oq chiqirish buyruqini peqet birinchi qol rehber béreleydiken.

Kent ahalisining telepliri

Nenfang gézitining xewiride yene, namayishchilarning wekili xung shijün qatarliqlar, yéza ahalisige 4 milyard yü'en tölem bérilishini, buningdin sirt dungjudiki her bir kishige her ay 500 yü'en bérishni hemde éléktir istansisining a'ililikler binasini dungju kentige sélishni telep qilghan dégen mezmunlar élan qilin'ghan bolup, bu weqedin toluq xewiri bar bir kishi nenfang gézitining bu xewirini körüp, istansimizgha téléfun urup, hökümetning yalghan sözlewatqanliqini bildürdi. U bu heqte mundaq deydu:

"Yéza ahalisi eslide éléktir istansisidin, birinchi yili 8 milyon yü'en tölem bérishni, ikkinchi yili 6 milyon yü'en bérishni telep qilghan bolup, éléktir qurulushigha mes'ul xadimlar bu pikirge qoshuldighanliqini bildürgen, yéza ahalisi ularning wedisidin yéniwélishidin qorqup, bu telepning resmiy yazma höjjet süpitide békitilishini telep qilghan, biraq bu telep emelge ashmighan bolup, mezkur telep namayishchilar oqqa tutulghandin üch kün burun otturigha qoyulghan idi.

Istansimizning igilishiche, kent ahalisining, éléktir istansisining a'ililikler binasini dungju kenti ichige sélishni telep qilishidiki meqsiti, éléktir istansisi tüpeyli kélip chiqidighan bulghinishning aldini élishqa kapaletlik qilish yüzisidin bolghan.

Xewerlerge qarighanda, dungju kentide yüz bergen bu weqe, xitay qoralliq qisimlirining 1989 ‏- yili tyen'enmén meydanida élip barghan basturush herikitidin kéyin, xitay ichide élip barghan eng qanliq basturush herikiti hésablinidiken. (Eqide)

Pikirler (0)
Share
Toluq bet