Özbekistan nato we yawropa ittipaqi bilen muzakire élip bardi

Dunya ammiwi axbarat wasitiliride özbekistan jumhuriyitining prézidénti islam kerimofning 24-yanwar küni bélgiye paytexti bryussélgha qilghan sepiri heqqide her xil uchurlar peyda bolmaqta.
Ixtiyariy muxbirimiz oyghan
2011-01-28
Élxet
Pikir
Share
Print
Özbekistan jumhuriyitining prézidénti islam kerimof.
Özbekistan jumhuriyitining prézidénti islam kerimof.
en.wikipedia.org

Rusiyining "musteqil géziti " de élan qilin'ghan "islam kerimofning utalmighan oyuni" namliq maqalining aptori wiktoriye panfilowa mezkur seperning özbekistan bilen nato otturisidiki hemkarliqni kéngeytish toghriliq kélishim hem shundaqla yawropa ittipaqi bilen énérgiye saheside höjjetke qol qoyghanliqi bilen ayaghlashqanliqini ilgiri sürgen.

Uning tekitlishiche, kerimofning bryussélgha kélishini özbék hoquq qoghdighuchiliri namayish bilen qarshi élip, özlirining bu seperge naraziliqini bildürgen.

Ular yawropa ittipaqidin özbekistan rehbirini qobul qilmasliqini yaki özbékistandiki kishilik hoquqni yaxshilash mesiliside uninggha bésim körsitishni telep qilghan. Emma, kerimofning yawropa komissiyisi rehbiri jozié manu'él barrozu we nato bash katipi andérs rasmussén bilen bolghan muzakiriliri dawamida kishilik hoquq mesilisining otturigha qoyulmighanliqi tüpeyli namayishning diqqettin sirt qalghanliqi perez qilin'ghan.

Panfilowa buning sewebining yawropada démokratiye mesililirige ehmiyet bérilmeywatqanliqi emeslikini körsitip, merkiziy asiya we kawkaz boyiche mutexessis sanobar shérmatowaning mezkur gézit muxbiri bilen bolghan söhbitidin neqil keltürgen. Shérmatowa mundaq dégen: "gherb merkiziy asiya memliketliri bilen bolghan munasiwetliride kishilik hoquq mesilisidiki öz mewqesini qayta qarap chiqti.

Merkiziy asiyaning démokratiyini rawajlandurushtiki gherb idiyilirini ilgiri sürüsh zörür bolghan rayon emesliki heqqide pikir qéliplashqan. Yawropaning iqtisadiy we herbiy menpe'etliri birinchi orun'gha chiqmaqta. Kerimofning sepiri yawropa siyasitidiki mushu burulushni namayish qildi."

Maqale aptori kerimof we nato bash katipi otturisida afghanistan mesilisining muhakime qilin'ghanliqini, ularning bu elde tinchliq we muqimliqni qolgha keltürüshte bir kélishimge kélishning zörürlükini chüshen'genlikini perez qilmaqta.

Panfilowaning éytishiche, kerimof birleshken döletler teshkilatining himayiside afghanistan bilen chégridash memliketlerning wekilliri, shundaqla a q sh, nato we rusiye terkibidiki "6+3" alaqe guruppisini qurushni yene bir qétim teklip qilghan bolup, bu guruppa afghanistanning ichki ehwalini hel qilishta ijabiy rol oynighan bolattiken. Emma, bu teklipni rusiyiningmu, gherbningmu qollimaywatqanliqi éytilghan.

Panfilowa shundaqla özbekistan we a q sh otturisida peyda bolghan soghuqchiliqning mezkur uchrishishtin kéyin bir qeder yénikleshkenlikini, amérikiliqlar we yawropaliqlarning özbékistan'gha qarita öz siyasitini meblegh sélish we yéngi téxnologiyiler arqiliq tüzüshning zörürlükini chüshen'genlikini otturigha qoyghan. Öz nöwitide a q sh özbékistan'gha qoshna afghanistanda tömür yol sélish, énérgiye bilen teminlesh oxshash layihilerge qatnishishni teklip qilghan.

Melumatlargha qarighanda, kerimofni bryussélgha kimning teklip qilghanliqi mesiliside her xil qarashlarning barliqi ilgiri sürülmekte. Shundaqla "xelq'araliq kechürüm teshkilati", "kishilik hoquqni közitish teshkilati", "muxbirlarni qoghdash komitéti", "xelq'araliq krizis guruppisi", yawropa parlaméntning kishilik hoquq komitétigha oxshash hoquq qoghdash teshkilatliri kerimofning bryussélda qarshi élinishigha naraziliqini bildürgen.

Toluq bet