Qashtéshi yurtida buningdin kéyin qashtéshi tépilarmu?

2006-08-30
Élxet
Pikir
Share
Print

3 - Nöwetlik qashtéshi medeniyet sayahet bayrimi xotende ajayip daghdugha bilen bashlandi. Bu güzel qedimi qashtéshi yurti nurghun sayahetchi méhmanlarni özige jelp qildi. Bayram murasimida xotenning tereqqiyati, bayliqliri, medeniyet sen'iti teshwiq qilindi. Xoten hökümet we partiye kadirliri bu bayliq makanining yenimu köp achquchilargha meblegh salghuchilargha mohtaj bolup turuwatqanliqini qayta jakarlidi.

Qashtéshi qézish muhitni éghir buzghunchiliqqa uchratqan

Emma cheklik bayliq menbelirini shu xil bayliq échish heriketlirining nabut qiliwatqanliqi tilgha élinmidi. Emma bezi mutexessisler hemde közetküchiler, qashtéshining heddidin ziyade qalaymiqan échilishi we buning bilen kélip chiqiwatqan ékologiyilik buzulush haletlirige diqqet qilmaqta.

Ilgirki programmizda igiliginimizdek, nöwette qashtéshi bir qeder köp chiqidighan yorungqash derya wadisida qashtéshi qazghuchilarning nechche ming kiran mashinilar arqiliq kéche kündüz qashtéshi kolishi bilen deryaning ikki sahilida chongqur azgallar peyda bolup su hem tupraqning éqishini keltürüp chiqirip eslidiki tebiy muhit éghir buzghunchiliqqa uchrighan.

Xoten saqchi da'irilirining bildürüshiche yorungqash derya wadisida yer kolash kiranliri bilen qashtéshi kolawatqanlar asasen yerlik xelq iken. Emma bezi yerlik ademlerdin igilishimizge qarighanda gerche qashtéshi térish meshghulati qiliwatqanlar jiye yézisi we lopning déhqanliri bolsimu emma ular, qashtéshi qézish üchün meblegh sélip derya qénini kötürige alghan xitay achquchilargha yallinip ishlewatqan waqitliq ishchilar iken:

Munasiwetlik da'irilerning oxshash bolmighan jawabliri

Biz xotende qashtéshi qézish ishlirini qeyerning bashquridighanliqi, bu heqte qanun hem nizamlarning bar yoqliqini igilesh üchün lop nahiyilik hökümetke téléfon qilduq. Ziyaritimizni qobul qilghan hökümet xadimidin yorungqash derya wadilirining qashtéshi qazghuchilar teripidin buzghunchiliqqa uchrighanliqidin xewiri bar yoqliqini sorighinimizda u "qashtéshi yurtimizning dangliq mehsulati, uni qézish ishlirini élip bériwatidu biraq kéche kündüz qazmidi. Biz bu ishqa nahayiti köngül böliwatimiz mexsus bu heqte belgilimilermu bar, undaq qalaymiqan qézish, ékologiyini éghir buzush yüz bermidi dep inkar qildi.

Biraq xoten sheherlik saqchi idarisi tünügün ziyaritimizni qobul qilghanda qanunsiz qézish bilen derya ékologiyisining buzghunchiliqqa uchrighandin sirt ikkinchi nomurluq tash yolningmu buzghunchiliqqa uchrighanliqini éytqan idi.

Hökümetning qashtéshi qézishtiki belgilimiliri

Bu hökümet xadimi yene qandaq resmiyetler arqiliq qashtéshi térishqa ruxset qilinidighanliqi heqqide sorighan so'alimizgha jawab bérip "u belgilimiler boyiche tupraq bashqurush idarisigha téshi chiqidighan derya wadilirini kötüre alghuchilargha sétip bergendin kéyin, ular qashtéshi qézish ishlirini élip barsa bolidu adette qazghuchilarning qashtéshi qézip bolghandin kéyin qazghan orunni eslige keltürüshi shert qilin'ghan. Meblegh salghuchilar yerni sétiwélip qédirish kiranlirini sétiwélip déhqanlarni ishlitidu. Adette yerlik déhqanlar qashtéshini pishshiq bilidighan bolghachqa shular qilidu. Hazir xitay ölkiliridin kélip qashtéshi qézishqa meblegh salghuchilar ikki üch mingge baridu" dédi.

Biz cheklik bolghan qashtéshi bayliqini bundaq qéziwérishning qashtéshining yoqap kétishini keltürüp chiqiridighanliqini oylimidinglarmu? cheklik bayliqni qoghdashqa birer tedbir almaqchi emesmu siler dep soriduq ?

U bu so'alimizgha jawaben "hazir xotende qashtéshi bayrimi ötküziliwatidu, qashtéshi xotenning üch chong göhirining biri, échilghan qéziwélin'ghan qashtéshi asasen bazar éhtiyajini qalduruwatidu. Échilishqa bolidighan bayliqlarni hökümet échish we paydilinishni tewsiye qilidu. Qashtéshi bayliqining chekliklikini bilsimu hökümet uning bir küni tügep kétidighanliqini emdi hés qiliwatqan bolishi mumkin, bundin kéyin undaq keng ichishnimu anche tewsiye qilmaydu, lékin buni tonush sel kéyin bolup qaldi. Eger échishqa bolidighan qashtéshi bayliqi qalmighan teqdirdimu, bazarda yéterlik qashtéshi bar" dédi.

Hökümet we yaki munasiwetlik bashqa orunlar qashtéshi bayliqining heddidin ziyade échilishidin jiddi bir endishe tuymighan hemde qashtéshi yurtida dawam qiliwatqan qalaymiqan qashtéshi qézish herkitini tosushqa héchqandaq bir tedbir qollanmighan bir peytte bayliq we muhit mutexessisliri qashtéshi qazghuchilarning cheklik bayliqni cheksiz échishi bilen xoten qashtéshidin ibaret qayta shekillinishi mumkin bolmighan bu bayliqning besh yilda asasen yoqaydighanliqinimu otturgha qoydi. (Gülchéhre)

Pikirler (0)
Share
Toluq bet