Qazaqistandiki Uyghur yigit bashlirining pa'aliyetlirige ehmiyet bérilmekte

Yéqinda almata shehirining bash yigit bashliri jumhuriyetlik "Uyghur awazi" géziti arqiliq pütkül Uyghur jama'etchilikige muraji'et élan qilghan.
Muxbirimiz oyghan
2010-08-09
Élxet
Pikir
Share
Print

Almuta shehirining Uyghurlar zich jaylashqan dostluq, sultanqorghan we bashqa mehellilirining bash yigit bashliri yéqinda qurulghan begler kéngishi bilen birlikte yigit bashlirining xizmet da'irisini kéngeytish we ularning rolini jari qildurush mezmunidiki pikir - tekliplerni qollaydighanliqini ilgiri sürgen.

Ular yigit bashlirining pa'aliyetlirini téximu janlandurush arqiliq, milliy ma'arip, medeniyet, metbu'atning tereqqiyatigha hem shundaqla elning iqtisadiy we medeniy güllinishini teminleydighan razimenlik we turaqliqni mustehkemleshke, xelqler dostluqini kücheytishke pütkül bilimini we küchini seperwer qilidighanliqini bildürgen.

Uchurlardin melum bolushiche, muraji'etname aptorliri yigit bashliri künini tesis qilish teklipini bergen hem shu jeryanda ularning xelq aldidiki jawabkarliqining téximu ösidighanliqini, abroyining ashidighanliqini otturigha qoyghan.
 
Metbu'at sehipiliridin igilishimizche, ötken yili Uyghur élide yüz bergen qanliq weqeler munasiwiti bilen naraziliq namayishlirini uyushturush, shéhit bolghanlar xatirisige nezir pa'aliyetlirini teshkillesh, milliy mekteplerge bala toplash we shuninggha oxshash bashqa ishlardimu yigit bashliri alahide közge körünerlik rol oynighan.

Uyghur yurtliridiki yigit bashlirining roli heqqide buningdin bir nechche kün ilgiri "qazaqistan - zaman" géziti hozurida bolup ötken aq saqallar mesilisige béghishlan'ghan yumilaq üstel muhakime yighinidimu pikirler éytilghan idi.

Uninggha ishtirak qilghan meshhur qazaq siyasiyonliri, hoquqshunasliri, metbu'atchiliri jay - jaylarda yerlikning özini özi bashqurush uyushmilirini we aq saqallar halqisini qurush hem ularning ishini janlandurush, bu pa'aliyetlerning jama'etchilik ichidiki ehmiyiti heqqide öz qarashlirini otturigha qoyghan idi.

Söhbet yighini dawamida uninggha teklip qilin'ghan almata shehiri bostanliq nahiyisi Uyghur medeniyet merkizining re'isi karlin mexpirow we tilshunas alim ruslan arziyéwlar Uyghurlardiki yigit béshi tüzülmisining ötmüsh tarixi hem bügünki kündiki ehwali heqqide qisqiche melumat bergen.
 
Yighin qatnashquchiliri bu mesilide Uyghurlarning yigit béshi, meshrep dégen'ge oxshash pa'aliyetliridin ülge alidighan köp nersilerning barliqinimu ilgiri sürgen.

Xewerlerdin melum bolushiche, Uyghur yurtlirida hazir milletler ara razimenlik, bolupmu qazaq - Uyghur dostluqini mustehkemlesh hemde milliy ma'arip mesilisige köprek ehmiyet bérishning intayin muhimliqi qayta - qayta tekitlenmekte. Buni, ziyaritimizni qobul qilghan karlin mexpirow ependi yene bir qétim eskertip ötti.

Yuqiridiki awaz ulinishidin, bu heqtiki melumatimizning tepsilatini anglaysiler.

 
Toluq bet