Қирғизистанда асасий қанунға аваз беришкә тәйярлиқлар башланди

Қирғизистанниң җәнубидики 208 адәмниң өлүмигә, 2100 дин адәмниң ярилинишиға сәвәбчи болған қанлиқ тоқунушларниң аста - аста пәсийишигә әгишип, ош, җалалабад қатарлиқ областларда нормал турмуш әслигә келишкә башлиди.
Мухбиримиз азат
2010-06-21
Елхәт
Пикир
Share
Принт
Сүрәт, 20 - ийун, қирғиз әскәрлири ош шәһириниң өзбек районида чарлаш елип бериватқан көрүнүш.
Сүрәт, 20 - ийун, қирғиз әскәрлири ош шәһириниң өзбек районида чарлаш елип бериватқан көрүнүш.
AFP Photo

Шуниң билән биргә җай - җайларда 27 - июн өткүзүлидиған асасий қанунниң йеңи лайиһисигә аваз беришниң тәйярлиқ хизмәтлири башланди. Мәркизи сайлам комитетиниң билдүрүшичә, аваз бериш беләтлири һәр қайси сайлам понкитлириға тарқитип берилгән.

Гәрчә ош, җалалабад қатарлиқ областларда йүргүзүливатқан һәрбий һаләт 25 - июнғичә узартилған, хәлқ аммисиниң қәлбидики қанлиқ тоқунуштин пәйда болған җараһәт излири тәлтөкүс йоқалмиған, мәмликәтниң һәр қайси җайлиридин вә чәт әлләрдин тоқунуш болған районларға бериливатқан инсанпәрвәрлик ярдәмлири давамлишиватқан болсиму, вақитлиқ һөкүмәт вәзийәтни муқимлаштуруш һәмдә дөләттә тинчлиқини тезрәк әслигә кәлтүрүш шундақла һакимийәтни қануний асасқа игә қилиш мәқситидә 27 - июнға бәлгиләнгән асаси қанунниң йеңи лайиһисигә аваз беришни өз қәрәлидә өткүзүш үчүн зөрүр болған барлиқ тәдбирләрни қолланмақта.

Аваз бериш паалийитиниң бихәтәрликигә капаләтлик қилиш үчүн һәрбий қисимлар, аманлиқни қоғдаш сақчилири вә ихтиярлиқ билән түзүлгән хәлқ қошунлири аммиға қарита җәмийәттә еқип йүргән өсәк сөзләргә алданмаслиқ тәрбийиси елип берип, милләтләр ара иттипақлиққа бузғунчилиқ қилғанларни қаттиқ җазалаш тәдбирлирини йолға қойди.

Вақитлиқ һөкүмәт башчиси роза отунбайева 18 - июндин 21 - июнғичә ош, җалалабад областлирида болған мәзгилидә амма вәкиллири билән учрушушларни өткүзүп, тәхиттин қоғланған сабиқ президент қурманбек бақийеф аилисидикиләрниң чәт әлләрдики террорчи күчләр билән тил бириктүрүп бу қетимқи қанлиқ тоқунушни пиланлиғанлиқини қаттиқ әйиблиди вә хәлққә 27 - июн өткүзүлидиған асасий қанунға аваз беришниң мәмликәтни қанун арқилиқ идарә қилиш, тинчлиқини әмәлгә ашуруш, иқтисадни гүлләндүрүш шундақла хәлқниң турмуш сәвийисини яхшилаштики роли һәққидә чүшәнчә бәрди. У йәнә дохтурханиларға берип тоқунушта яриланғанлардин һал сориди.

Қирғизистан уйғурлириниң "иттипақ" җәмийити вақитлиқ һөкүмәтниң орунлаштурушлириға йеқиндин аваз қошуп, бешкәк шәһиридики уйғур җамаәтчилики топлишип олтурақлашқан мәһәллиләрдә асасий қанунға аваз бериш паалийитигә актиплиқ билән қатнишиш һәққидә тәшвиқат елип бериш билән биргә, ош, җалалабад областлиридики хәлққә инсанпәрвәрлик ярдими бериш ишиниму давамлаштурмақта.

20 - Июн бешкәк шәһириниң пакировка мәһәллисидики уйғур җамаити 275 миң сомлуқ йемәк - ичмәкни бир данә "камаз" маркилиқ машиниға йүкләп ош областиға йолға салди. 21 - Июн лебидинофка мәһәллисидики үч йезиниң уйғур җамаити 180 миң сомлуқ йемәк - ичмәк, кийим - кечәкләрни, "иттипақ" җәмийити қара қол шәһәрлик шөбисидики уйғур җамаити 80 миң сомлуқ йемәк - ичмәкләрни, "иттипақ" җәмийити қара балта шәһәрлик шөбисидики уйғур җамаити 75 миң сомлуқ иқтисади ярдәмни ош области қара су райониниң қәшқәр йезисидики қийинчилиқта қалған уйғур қериндашлириға әвәтти.

Нөвәттә ош шәһиридин кәлгән һәр милләттин болған 14 йетим бала билән 4 нәпәр балиларға қариғучи аялниң турмушини орунлаштуруш вәзиписини қирғизистан уйғурлири "иттипақ" җәмийити өз үстигә елип, уларниң ятақ - тамақ һәмдә давалиниш мәсилилирини мувапиқ һәл қилишта мунасивәтлик органларға һәмкарлашмақта.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)
Share
Толуқ бәт