Qirghizistanda asasiy qanun'gha awaz bérishke teyyarliqlar bashlandi

Qirghizistanning jenubidiki 208 ademning ölümige, 2100 din ademning yarilinishigha sewebchi bolghan qanliq toqunushlarning asta - asta pesiyishige egiship, osh, jalal'abad qatarliq oblastlarda normal turmush eslige kélishke bashlidi.
Muxbirimiz azat
2010-06-21
Élxet
Pikir
Share
Print
Süret, 20 - iyun, qirghiz eskerliri osh shehirining özbék rayonida charlash élip bériwatqan körünüsh.
Süret, 20 - iyun, qirghiz eskerliri osh shehirining özbék rayonida charlash élip bériwatqan körünüsh.
AFP Photo

Shuning bilen birge jay - jaylarda 27 - iyun ötküzülidighan asasiy qanunning yéngi layihisige awaz bérishning teyyarliq xizmetliri bashlandi. Merkizi saylam komitétining bildürüshiche, awaz bérish béletliri her qaysi saylam ponkitlirigha tarqitip bérilgen.

Gerche osh, jalal'abad qatarliq oblastlarda yürgüzüliwatqan herbiy halet 25 - iyun'ghiche uzartilghan, xelq ammisining qelbidiki qanliq toqunushtin peyda bolghan jarahet izliri teltöküs yoqalmighan, memliketning her qaysi jayliridin we chet ellerdin toqunush bolghan rayonlargha bériliwatqan insanperwerlik yardemliri dawamlishiwatqan bolsimu, waqitliq hökümet weziyetni muqimlashturush hemde dölette tinchliqini tézrek eslige keltürüsh shundaqla hakimiyetni qanuniy asasqa ige qilish meqsitide 27 - iyun'gha belgilen'gen asasi qanunning yéngi layihisige awaz bérishni öz qerelide ötküzüsh üchün zörür bolghan barliq tedbirlerni qollanmaqta.

Awaz bérish pa'aliyitining bixeterlikige kapaletlik qilish üchün herbiy qisimlar, amanliqni qoghdash saqchiliri we ixtiyarliq bilen tüzülgen xelq qoshunliri ammigha qarita jem'iyette éqip yürgen ösek sözlerge aldanmasliq terbiyisi élip bérip, milletler ara ittipaqliqqa buzghunchiliq qilghanlarni qattiq jazalash tedbirlirini yolgha qoydi.

Waqitliq hökümet bashchisi roza otunbayéwa 18 - iyundin 21 - iyun'ghiche osh, jalal'abad oblastlirida bolghan mezgilide amma wekilliri bilen uchrushushlarni ötküzüp, texittin qoghlan'ghan sabiq prézidént qurmanbék baqiyéf a'ilisidikilerning chet ellerdiki térrorchi küchler bilen til biriktürüp bu qétimqi qanliq toqunushni pilanlighanliqini qattiq eyiblidi we xelqqe 27 - iyun ötküzülidighan asasiy qanun'gha awaz bérishning memliketni qanun arqiliq idare qilish, tinchliqini emelge ashurush, iqtisadni güllendürüsh shundaqla xelqning turmush sewiyisini yaxshilashtiki roli heqqide chüshenche berdi. U yene doxturxanilargha bérip toqunushta yarilan'ghanlardin hal soridi.

Qirghizistan Uyghurlirining "ittipaq" jem'iyiti waqitliq hökümetning orunlashturushlirigha yéqindin awaz qoshup, béshkek shehiridiki Uyghur jama'etchiliki topliship olturaqlashqan mehellilerde asasiy qanun'gha awaz bérish pa'aliyitige aktipliq bilen qatnishish heqqide teshwiqat élip bérish bilen birge, osh, jalal'abad oblastliridiki xelqqe insanperwerlik yardimi bérish ishinimu dawamlashturmaqta.

20 - Iyun béshkek shehirining pakirowka mehellisidiki Uyghur jama'iti 275 ming somluq yémek - ichmekni bir dane "kamaz" markiliq mashinigha yüklep osh oblastigha yolgha saldi. 21 - Iyun lébidinofka mehellisidiki üch yézining Uyghur jama'iti 180 ming somluq yémek - ichmek, kiyim - kécheklerni, "ittipaq" jem'iyiti qara qol sheherlik shöbisidiki Uyghur jama'iti 80 ming somluq yémek - ichmeklerni, "ittipaq" jem'iyiti qara balta sheherlik shöbisidiki Uyghur jama'iti 75 ming somluq iqtisadi yardemni osh oblasti qara su rayonining qeshqer yézisidiki qiyinchiliqta qalghan Uyghur qérindashlirigha ewetti.

Nöwette osh shehiridin kelgen her millettin bolghan 14 yétim bala bilen 4 neper balilargha qarighuchi ayalning turmushini orunlashturush wezipisini qirghizistan Uyghurliri "ittipaq" jem'iyiti öz üstige élip, ularning yataq - tamaq hemde dawalinish mesililirini muwapiq hel qilishta munasiwetlik organlargha hemkarlashmaqta.

Yuqiridiki awaz ulinishidin, bu heqtiki melumatimizning tepsilatini anglaysiler.

Toluq bet