Ақсудики оқуғучиларниң қистаңчилиқтин дәссилиш вәқәсиниң һәқиқий сәвәби ашкариланди

Ақсу шәһәрлик 5 ‏-башланғуч мәктәп оқуғучилириниң қистаңчилиқтин дәссилип ярилиниш вәқәси ахбаратқа ашкариланғандин буян; хитай һөкүмити вәқәниң һәқиқий сәвәбини тилға алмай йошуруп кәлгән иди. Мухбиримизниң бүгүн игилишичә, вәқәниң һәқиқий сәвәби ашкариланди.
Мухбиримиз шөһрәт һошур
2010-12-02
Елхәт
Пикир
Share
Принт

Мәзкур мәктәптә пәқәт бирла һаҗәтхана бар болуп, мәктәптики 1923 нәпәр оқуғучи вә оқутқучи 15 йилдин бери мушу бир һаҗәтханини ишлитип кәлгән. Буниң билән һәр қетимлиқ дәм елиш вақтида оқуғучилар һаҗәтханида өчирәт игиләш үчүн синиптин йүгүрүп чиқиш вә пәләмпәйдә қистилишип қелиш һадисиси күндилик әһвалға айланған. Ахирқи қетимлиқ қистилишта пәләмпәйниң тутқучи сунуп кетип 48 оқуғучиниң ярилиниш вәқәси келип чиққан.

Ақсудики оқуғучиларниң қистаңчилиқтин дәссилиш вәқәси хәвәр қилинғандин кейин, өсмүр чағлирида мәзкур мәктәптә оқуған, нөвәттә чәтәлдә яшаватқан бир уйғур қиз, радиомизға телефон қилип, мәктәпниң қурулуш бихәтәрлик әһвали һәққидә бир қисим мәлуматларни йәткүзди.

Биз бу йип учиға асасән, ақсу шәһәрлик маарип идарисиниң башлиқи ли дин мәлумат игилидуқ. У оқуғучиларниң нөвәттики әһвали һәққидә мундақ деди: һазир чоң чатақ йоқ, 41 нәпәр яридарниң 12 нәпири дохтурханидин чиқти. Еғир яридарларниңму әһвали барғансири яхшилиниватиду. Бүгүн дохтурлар һушсиз оқуғучиларниң миңисини тәкшүрди, тәкшүрүштә миңигә қан чүшүш болмиғанлиқи байқалди; улар пәқәт қистаңчилиқта оксигин йетишмигәнликтин һошидин кәткән. Ли ниң билдүрүшичә, вәқәдә икки нәпәр оқуғучиниң сөңикигә дәз кәткән, 4 нәпәр оқуғучиниң тенидә гөши аҗраш йүз бәргән.

Биз идарә башлиқи ли дин мәктәпниң һаҗәтхана қурулуши һәққидә мәлумат соридуқ. У мәктәп бинасиниң һәр бир қәвитидә бирдин һаҗәтхана барлиқини, әмма булардин пәқәт бирсиниң нормал ишләйдиғанлиқини, қалғанлириниң су йоли нормал болмиғачқа тақиветилгәнликини етирап қилди. Биз униңдин мәктәп қурулушидики бу түр мәсилилиридин өзлириниң хәвири бар-йоқлуқини сориғинимизда, у, маарип мупәттиш орунлириниң бу һәқтә тәкшүрүш елип бериватқанлиқини, мәсулийәтсизлик қилғучиларниң җазалинидиғанлиқини билдүрди. Ли ниң сөзлиридин қариғанда, даириләрниң вәқәниң мәсулийитини мәктәп мудирлириға артидиғанлиқи байқалмақта.

Әмма, мәктәп рәһбәрлири вәқәниң йүз бериш еһтималини алдини байқиғанлиқини вә һөкүмәткә мәлум қилғанлиқини билдүрмәктә. Ақсудики мәлум бир һөкүмәт хизмәтчисиниң ашкарилишичә, мәктәп рәһбәрлири вәқәниң йүз бериш еһтималини алдин байқиған вә һөкүмәт рәһбәрлиригә мәктәпни толуқсиз вә башланғучтин ибарәт иккигә айриш вә яки ремонт қилип бериш һәққидә тәләп сунған. Йәнә мәктәпниң әһвалидин хәвәрдар кишиләрдин бириниң билдүрүшичә, алдинқи йили мәктәптә бир қур ремонт ишлири елип берилған болсиму, иқтисад йетишмәслик сәвәбидин пәләмпәй ремонтсиз қалған.

Һөрмәтлик радио аңлиғучилар, бүгүн дуня уйғур қурултийиниң баянатчиси дилшат ришит бу һәқтә пикир баян қилип мундақ деди: " өткән йили 20 нәпәр уйғурни, камбоджадин қайтуруп әкилип җазалаш үчүн камбоджаға бир милярд доллар ярдәм қилған хитай һөкүмитиниң 2000 ға йеқин уйғур оқуғучи оқуйдиған бир мәктәпкә бир һаҗәтхана қурулуши үчүн пул аҗритишқа қарни ағриши, хитай дөлитиниң уйғурларға тутуватқан позитсийисиниң маһийитини ашкарилайду."

Толуқ бәт