Aqsudiki oqughuchilarning qistangchiliqtin dessilish weqesining heqiqiy sewebi ashkarilandi

Aqsu sheherlik 5 ‏-bashlan'ghuch mektep oqughuchilirining qistangchiliqtin dessilip yarilinish weqesi axbaratqa ashkarilan'ghandin buyan؛ xitay hökümiti weqening heqiqiy sewebini tilgha almay yoshurup kelgen idi. Muxbirimizning bügün igilishiche, weqening heqiqiy sewebi ashkarilandi.
Muxbirimiz shöhret hoshur
2010-12-02
Élxet
Pikir
Share
Print

Mezkur mektepte peqet birla hajetxana bar bolup, mekteptiki 1923 neper oqughuchi we oqutquchi 15 yildin béri mushu bir hajetxanini ishlitip kelgen. Buning bilen her qétimliq dem élish waqtida oqughuchilar hajetxanida öchiret igilesh üchün siniptin yügürüp chiqish we pelempeyde qistiliship qélish hadisisi kündilik ehwalgha aylan'ghan. Axirqi qétimliq qistilishta pelempeyning tutquchi sunup kétip 48 oqughuchining yarilinish weqesi kélip chiqqan.

Aqsudiki oqughuchilarning qistangchiliqtin dessilish weqesi xewer qilin'ghandin kéyin, ösmür chaghlirida mezkur mektepte oqughan, nöwette chet'elde yashawatqan bir Uyghur qiz, radi'omizgha téléfon qilip, mektepning qurulush bixeterlik ehwali heqqide bir qisim melumatlarni yetküzdi.

Biz bu yip uchigha asasen, aqsu sheherlik ma'arip idarisining bashliqi li din melumat igiliduq. U oqughuchilarning nöwettiki ehwali heqqide mundaq dédi: hazir chong chataq yoq, 41 neper yaridarning 12 nepiri doxturxanidin chiqti. Éghir yaridarlarningmu ehwali barghansiri yaxshiliniwatidu. Bügün doxturlar hushsiz oqughuchilarning mingisini tekshürdi, tekshürüshte mingige qan chüshüsh bolmighanliqi bayqaldi؛ ular peqet qistangchiliqta oksigin yétishmigenliktin hoshidin ketken. Li ning bildürüshiche, weqede ikki neper oqughuchining söngikige dez ketken, 4 neper oqughuchining ténide göshi ajrash yüz bergen.

Biz idare bashliqi li din mektepning hajetxana qurulushi heqqide melumat soriduq. U mektep binasining her bir qewitide birdin hajetxana barliqini, emma bulardin peqet birsining normal ishleydighanliqini, qalghanlirining su yoli normal bolmighachqa taqiwétilgenlikini étirap qildi. Biz uningdin mektep qurulushidiki bu tür mesililiridin özlirining xewiri bar-yoqluqini sorighinimizda, u, ma'arip mupettish orunlirining bu heqte tekshürüsh élip bériwatqanliqini, mes'uliyetsizlik qilghuchilarning jazalinidighanliqini bildürdi. Li ning sözliridin qarighanda, da'irilerning weqening mes'uliyitini mektep mudirlirigha artidighanliqi bayqalmaqta.

Emma, mektep rehberliri weqening yüz bérish éhtimalini aldini bayqighanliqini we hökümetke melum qilghanliqini bildürmekte. Aqsudiki melum bir hökümet xizmetchisining ashkarilishiche, mektep rehberliri weqening yüz bérish éhtimalini aldin bayqighan we hökümet rehberlirige mektepni toluqsiz we bashlan'ghuchtin ibaret ikkige ayrish we yaki rémont qilip bérish heqqide telep sun'ghan. Yene mektepning ehwalidin xewerdar kishilerdin birining bildürüshiche, aldinqi yili mektepte bir qur rémont ishliri élip bérilghan bolsimu, iqtisad yétishmeslik sewebidin pelempey rémontsiz qalghan.

Hörmetlik radi'o anglighuchilar, bügün dunya Uyghur qurultiyining bayanatchisi dilshat rishit bu heqte pikir bayan qilip mundaq dédi: " ötken yili 20 neper Uyghurni, kambodzhadin qayturup ekilip jazalash üchün kambodzhagha bir milyard dollar yardem qilghan xitay hökümitining 2000 gha yéqin Uyghur oqughuchi oquydighan bir mektepke bir hajetxana qurulushi üchün pul ajritishqa qarni aghrishi, xitay dölitining Uyghurlargha tutuwatqan pozitsiyisining mahiyitini ashkarilaydu."

Toluq bet