Hijrettiki Uyghurlardin ana yurtqa héytliq salam

2006-01-09
Élxet
Pikir
Share
Print
hej-arafat.jpg
9-Yanwar küni musulmanlar mekkining gherbiy jenubidiki arafat téghigha yamashmaqta. AFP

Qurban héytinglargha mubarek bolsun! qurban héyt xasiyiti judun künlirige illiqliq ata qilip, qelbliringlarni illitqay! qurban héyt el yurt jem bolup uruq‏ - tughqanlar héytliship ömlükte, ittipaqliqta ötküzidighan qutluq künlerdur.

Chet'ellerde yashawatqan Uyghurlarmu gerche özliri yashawatqan démokratik ellerde musulmanlar bilen bille héyt bayramlarni tebriklewatqan bolsimu, emma mushundaq bayram künliride ularning, musapirliq hayatidiki weten, xelqige séghinishi téximu yalqunjap lawa atidu.

Chet'ellerde hijrette yashawatqan Uyghurlarning ana diyari hem qérindashlirigha bergen héytliq salamlirigha hem yaxshi tileklirige elchi bolushni toghra körduq. Amérika Uyghur birleshmisining re'isi nuri türkel ependi, amérikida yashawatqan Uyghurlargha wakaliten radi'omiz arqiliq Uyghur diyaridiki hemde barliq jaylarda yashawatqan Uyghurlargha qurban héytliq tileklirini ipadilidi hemde" bu qurban héytni Uyghurlarning meniwi anisi, kishilik hoquq pa'aliyetchisi rabiye xanim bilen birge ötküzgechke, amérikidiki Uyghurlar üchün téximu xasiyetlik bolghanliqini bildürdi.

Dunya Uyghur qurultiyining re'isi erkin aliptékin ependi, "gerche hijrettiki Uyghurlar jümlidin biz yawrupa elliride yashawatqan Uyghurlar qurban héyt bayramlirini wetendin , qérindashlardin yiraq jayda ötküzüwatqan bolsaqmu emma bizning qelbimiz ana weten hem xelqimiz bilen bir tutash" dep bildürdi.

Ottura asiya shundaqla qazaqistan Uyghurlar muhajirliri hemmidin köp olturaqlashqan jay hésablinidu. Dunya Uyghur qurultiyining qazaqistanda turushluq wekili qehriman ghojamberdi ependi, qazaqistandiki Uyghurlarning héytliq salimini yollash bilen birge, qazaqistan Uyghurlirining bashqa musulmanlar bilen ortaq bu bayramni tebriklishiwatqanliqi hemde qazaqistanda musulmanlargha keng imkanlarning yaritilghanliqini bildürdi.

Türkiye héyt‏- bayramlar alahide tentene qilinidighan türük éli, shundaqla türkler bilen Uyghurlar qandash bolghachqa ularning örüp adetlirimu oxshash, shundaqtimu türkiyide yashawatqan Uyghurlar bayram künliride yenila musapirliq hés qilidu. Türkiyidiki Uyghur mötiwerliridin seley hajim köz yashliri bilen wetinini séghinip, chet'ellerdiki qérindashlarning qelbide peqet bir otluq arzu, u bolsimu öz erk wetinide jem bolush, dédi.

Weten söygüsi hemra bolghan Uyghurlar birdek biz wetende bolmighan bilen weten bizning qelbimizde déyishidu. (Gülchéhre)

Pikirler (0)
Share
Toluq bet