Rabiye qadir xanim yawropa parlaméntida

2006-11-29
Élxet
Pikir
Share
Print

D u q re'isi, Uyghur milliy herikitining rehbiri rabiye qadir xanim 11 – ayning 27 – küni gérmaniyidiki pa'aliyetlirini axirlashturup, d u q ning mu'awin re'isi esqerjan, d u q ijra'iye komitétining re'isi alim séyit ependilerning hemrahliqida shu küni kech bélgiye paytexti bryussélgha bérip, 11 – ayning 28 – küni we 29 – künliri yawropa parlaméntining yuqiri derijilik rehberliri bilen söhbetler élip barghan.

Yawropa parlaméntining rehberliri we yawropa parlaménti insan heqliri komitétining mes'ulliri, rabiye qadir xanimning sherqiy türkistandiki xitay zulumi we xitay dölet térrorining emeliy ehwalliri heqqide bergen melumatlirini estayidil anglap, özlirining Uyghurlar mesilige téximu jiddi mu'amile qilish mejburiyetlirini barghansiri chongqur tonup yétiwatqanliqini ipade qilghan.

D u q ijra'iye komitétining re'isi alim séyit ependining bergen melumatigha qarighanda, d u q re'isi rabiye qadir xanim bashchiliqidiki Uyghur wekillirining yawropa parlaméntidiki ziyaretliri nahayiti mol mezmun'gha ige bolghan.

Uyghur wetinide xitay mustebitliri teripidin yürgüzüliwatqan milliy qirghinchiliq, diniy basturush siyasiti, pilanliq tughut we eydis késelliri arqiliq élip bériliwatqan nesil qurutush pilani, Uyghur tili we medeniyitige qarita shepqetsizlik bilen yürgüzüliwatqan assimilyatsiye siyasiti, Uyghur diyarining tebi'i bayliqlirining talan – taraj qilinishi we ékilogiyilik muhitning éghir derijide weyranchiliqqa uchrawatqanliqi qatarliq bir qatar jiddiy témilar bu qétimqi söhbetning asasi mezmunini teshkil qilghan.

D u q re'isi, Uyghur milliy herikitining rehbiri rabiye qadir xanim yawropa parlaménti rehberliri bilen élip barghan bu qétimqi söhbet jeryanida yene, Uyghur siyasiy qachqunlirining nöwettiki ehwali, ularning siyasiy panahliq ishlirining xitay hökümitining türlük yollar bilen tosqunluq qilishi netijiside ziyan'gha uchrawatqanliqi, yawropa birlikining Uyghurlar mesilisige alahide mu'amilide bolushi zörürlikini tekitlep, ulardin ijabiy jawaplargha érishken. Rabiye qadir xanim, mezkur téma heqqide aldinqi hepte gérmaniye yuquri derijilik hökümet xadimliri we bawariye shtatining mes'ulliri bilen élip barghan söhbetliri jeryanidimu mexsus toxtalghan idi.

D u q re'isi, Uyghur milliy herikitining rehbiri rabiye qadir xanim bu qétimqi yawropa ziyariti jeryanida yawropa parlaméntida ötküzülgen "dunyadiki diniy erkinlik mesilisi" namliq yighin'gha we "xitaydiki diniy erkinlikke ispat bérish yighini" qatarliq yighinlargha qatniship, Uyghur wetinidiki zulumlarni anglatqan.

Rabiye qadir xanim bulardin bashqa, 29 – noyabir chüshtin burun yene "yawropa parlaméntining kishilik hoquq yighini" qatniship, sherqiy türkistandiki köngül bölüshke tégishlik bolghan jiddiy témilar heqqide doklat bergen.

D u q ning mu'awin re'isi esqerjan ependi bu yighinda xitaydiki siyasiy mehbuslarni, bolupmu Uyghur siyasiy mehbuslarni ölüm jazasigha mehkum qilish mesilisi heqqide doklat bergen. D u q ijra'iye komitétining re'isi alim séyit ependi bolsa, bu yighinda 1989 – yilidin buyan yawropa parlaméntining xitaygha qarita yolgha qoyup kéliwatqan qoral – yaraq imbargosini dawamliq saqlap qélishini, bu imbargo bikar qilinsa, xitayning bu qorallarni Uyghurlarni basturushqa ishlitidighanliqini delillep, muhim doklat bergen.

D u q re'isi, Uyghur milliy herikitining rehbiri rabiye qadir xanim bashchiliqidiki Uyghur wekillirining yawropa parlaméntida élip barghan ikki künlük pa'aliyetliri heqqidiki xewerning tepsilatini gérmaniyidiki ixtiyariy muxpirimiz ekremdin anglang.

Pikirler (0)
Share
Toluq bet