Roza otanbayéwa, xitayning qirghizistanda herbiy baza achidighanliqini inkar qildi

2005-06-15
Élxet
Pikir
Share
Print

Roza otanbayéwa amérikidiki ziyaret küntertipi boyiche, seyshenbe küni "amérika awazi" radi'osini ziyaret qilip, bu yerde ötküzgen muxbirlarni kütüwélish yighinida, xitay metbu'atliridiki qirghizistanning muwaqqet prézidénti qurmanbeg baqiyéw, xitayning qirghizistanda qoshun turghuzushini telep qildi, dégen xewerning toghriliqini inkar qildi.

Qirghizistan amérika herbiy bazisini dawamliq saqlap qalidu

Otanbayéwaning tekitlishiche, qirghizistan nöwettiki weziyet astida 3 - bir döletning qirghizistanda herbiy baza qurushini oylashmaydiken. Shuning bilen birge otanbayéwa, " qirghizistan mezkur dölettiki amérika herbiy bazisini dawamliq saqlap qalidu shundaqla amérika bilen dostane munasiwitini dawamlashturidu," dep körsetti.

Qirghizistan weziyitidiki muqimsiz amillar, aqayéw hökümiti bu yil 24 - marttiki béshkek limun inqilabida aghdurulup, hakimiyet öktichilerning qoligha ötkendin béri hazirgha qeder dawam qilmaqta.

Qirghizistan yéngi herbiy baza qurushni oylashmaydu

Roza otnabayéwa, muxbirlarni kütüwélish yighinida qirghizistanning yéqinqi weziyiti shundaqla xitay - qirghizistan we amérika - qirghizistan munasiwetliri heqqide toxtaldi. Xitay metbu'atliri yéqinda muwaqqet prézidént qurmanbeg baqiyéwning xitaygha jenubiy qirghizistanda herbiy baza qurush toghrisida teklip sun'ghanliqini xewer qilghan. Xitay tashqi ishlar ministirliqining bayanatchisi lyu jyenchaw, xitayning herbiy baza qurush toghrisida teklip tapshuruwalsa oyliship köridighanliqini tekitligen idi.

Emma otanbayéwa, bu xewerning rastliqini ret qildi. Otanbayéwa mundaq deydu: "méningche yéngi herbiy baza qurush toghrisidiki xewerlerning héchqandaq asasi yoq perezler. Men qirghizistanning muwaqqet tashqi ishlar ministiri bolush süpitim bilen shuni diyeleymenki, biz zéminimizda her qandaq bir yéngi herbiy baza qurushqa yol qoymaymiz. Méningche qirghizistandiki ikki herbiy baza yiterlik. Biz yéngi herbiy baza qurushqa éhtiyaj emes."

Xitay metbu'atliri, amérikining qirghizistanda yüz bergen siyasi özgirish bilen alaqisi barliqini bildürmekte. Amma amérika hökümiti bu heqtiki gumanlarni ret qilghan.

Qirghizistanning musapirlar mesilidi'iki meydani amérikini ümidsizlendürgen

Otanbayéwa, seyshenbe küni amérika tashqi ishlar ministiri kondiliza rayis bilen uchrasqanda qirghizistan weziyiti we qirghizistandiki özbék musapirlar mesilisini muzakire qildi. Amérika tashqi ishlar ministirliqining bayanatchisi mikkormakning ashkarilishiche, qirghizistan da'irilirining yéqinda 4 neper musapirni özbékistan'gha qayturuwétish weqesi kondiliza rayisni pewquladde ümidsizlendürgen.

Mikkormak mundaq deydu: " qirghizistan hökümitining ötken jüme küni 4 neper özbék musapirni dölitige qayturuwétish weqesi bizni ümidsizlendürdi. Ular siyasi panahliq tiligen kishiler idi. Da'iriler b d t musapirlar komitétining wekilige meslihet salmighan shundaqla bu kishiler özbékistan'gha qaytip barsa jazagha tartilish ihtimali barliqini oylashmighan."

Mikkormakning tekilishiche, rayis bilen otanbayéwa musapirlar mesilisi, kishilik hoquqni qoghdash, axbarat we söz erkinliki , xiyanetchilikke qarshi turush qatarliq mesililerni muzakire qilghan. Otanbayéwa, musapirlar mesiliside b d t bilen hemkarlishidighanliqini bildürgen.

Qirghizistan da'irilirining musapirlarni qayturuwétish weqesi, b d t musapirlar komitéti we kishilik hoquq organlirining tenqidige uchrighan idi. Kishilik hoquqni közütüsh teshkilati, qirghizstan da'irilirini xelq'ara musapirlar ehdinamisigha buzghunchiliq qilish bilen eyibligen idi. (Erkin)

Pikirler (0)
Share
Toluq bet