" Президент путин ғәрбкә қарши турушта ялғуз қилиши мумкин "

2007-08-02
Елхәт
Пикир
Share
Принт

Русийидә чиқидиған комиерсант гезитиниң 25‏- июл күни хәвәр қилишичә, русийә президенти владимиз путин,өткән һәптә, русийә һөкүмитини қоллаватқан рус яшлар һәрикитиниң паалийәтчилири вә рәһбәрлири билән өткүзгән сөһбитидә, ғәрб дөләтлиригә қарши наһайити қаттиқ тәләппузда сөз қилған. У, ғәрб дөләт мәсуллириниң демократийә тоғрисида русийигә қаратқан тәнқидлирини рәт қилип, болупму рус сиясий өктичилиригә сиясий панаһлиқ бәргән әнглийини, русийидә җинайәт ишлигән кишиләргә панаһлиқ бериватиду дәп әйиблигән.

Русийиниң ғәрб дөләтлири билән мунасивәтлири барғансери җиддийлишиватиду

Ғәрб дөләтлири билән мунасивәтлири барғансери җиддийлишиватқан русийә президенти путинниң, келәр һәптә шаңхәй һәмкарлиқ тәшкилати тәрипидин өткүзүлмәкчи болған һәрбий маневириниң һарписида ғәрб дөләтлиригә қаратқан позитисйисини қаттиқлаштурғанлиқи, мулаһизичиләрниң диққитини тартмақта.

Павәл фелгән һойәрниң мәркизи вашингтондики җимиз тавн тәтқиқат фонди җәмийити тәрипидин нәшр қилиниватқан явру-асия күндилик көзитиш журнилида елан қилған мақалисидә билдүрүшичә, русийә президенти путиниң шаңхәй һәмкарлиқ тәшкилатиға әза дөләтләрниң қатнишиши билән елип берилидиған һәрбий маневир һарписида ғәрбкә қаратқан позитисйисини техиму қаттиқлаштурғанлиқи, ғәрб билән мунасивәтлири күнсиери йириклишиватқан руисйә һөкүмитиниң, шаңхәй һәмкарлиқ тәшкилатидин йеңи иттипақлар қуруш үчүн пайдилиниш вә шималий атлантик окян әһди тәшкилатиға тақабил туруш үчүн шаңхәй һәмкарлиқ тәшкилатини күчләндүрүшни мәқсәт қилғанлиқини көрситидикән.

Шаңхәй һәмкарлиқ тәшкилатиниң бу қетимқи һәрбий маневири

Шаңхәй һәмкарлиқ тәшкилатиниң бу қетимқи һәрбий маневири бу тәшкилат тәрипидин һазирғичә елип берилған әң чоң һәрбий маневир болуп, маневирға хитай, русийә, қазақистан, қирғизистан, таҗикистан вә өзбекистандин 6500 әскәр вә 80 урушчи айропилан қатнишидикән.

Буниңдин сирт русийә президент владимир путин, хитай дөләт рәиси ху җинтав қатарлиқ шаңхәй һәмкарлиқ тәшкилатиға әза дөләтләрниң дөләт башлиқлири, бешкәктә өткүзүлидиған дөләт башлиқлири йеғинидин кейин, маневирниң үрүмчи районида елип берилидиған иккинчи қисмини назарәт қилишни пиланлимақта.

Мутәхәсссләрниң ейтишичә, 9‏- авғуст күнидин 17‏- авғуст күнигичә русийиниң чилябниск райони билән уйғур елиниң үрүмчи районида елип берилидиған бу қетимқи маневирға хитайниң 1600 кишилик һәрбий қисим урушчи айропиланлири вә йеник ‏- еғир типтики қорал-ярақлар билән қатнашқанлиқи, болупму маневирниң иккинчи қисминиң урүмчи районида елип берилиши үчүн җиддий тиришчанлиқ көрсәткәнлики, хитайниң бу һәрбий маневир арқилиқ уйғурларға бир сигнал беришни ойлашқанлиқини көрситидикән.

Русийә вә хитайниң ш һ т дин алдиған пайдиси

Демәк, хитай һөкүмити шаңхәй һәмкарлиқ тәшкилатидин, уйғур паалийәтчилирини бастуруш, уйғур миллий һәрикитиниң оттура асия районида кеңийишиниң алдини елиш үчүн пайдилиниватқан болса, русийә һөкүмити йеңи иттипақлар қуруш вә ғәрб дөләтлиригә тақабил туруш үчүн пайдилинишқа урунмақта.

Лекин павәл фелгән һойәрниң мақалисидә әскәртишичә, гәрчә владимир путин шаңхәй һәмкарлиқ тәшкилатини, шималий атлантик окян әһди тәшкилатиға қарши бир һәрбий тәшкилатқа айландурушни ойлишиватқан болсиму, лекин шаңхәй һәмкарлиқ тәшкилатиниң башқа әзалири ғәрб билән дөшмәнлишини халимайдикән.

Мақалисидә, шаңхәй һәмкарлиқ тәшкилатиниң әң муһим әзалириниң бери болған хитайниң асаслиқ мәқситиниң уйғур миллий мустәқиллиқ һәрикитиниң кеңийишиниң вә оттура асияда исламий һәрикәтләрниң күчийишиниң алдини елиш икәнликини тәкитлигән павәл фелгән һойәр, президент путин ғәрбкә қарши турушта шаңхәй һәмкарлиқ тәшкилатидики башқа дөләтләрниң һимайисигә еришәлмәй ялғур қилиши мумкин, дәп көрсәткән . (Өмәр қанат)

Пикирләр (0)
Share
Толуқ бәт