Xitayda, saxta dorilar téximu köp ademlerni hayatidin ayrimaqta

2006-08-16
Élxet
Pikir
Share
Print

Xitayda keyni ‏- keynidin yüz bériwatqan saxta dora mesilisi kishilerning nepritini qozghash bilen bir waqitta, jem'iyette bir xil jiddiychilikni peyda qilmaqta. Bundin ilgiri xitay chichixar ikkinchi dora ishlepchiqirish shirkitining bir qisim saxta, jan alghu doriliri ashkarilan'ghan idi. Uzun ötmey, yéqinda yene enxuy dora zawutining "shingfu" yeni "bext" markiliq dorisimu köpligen bimarlarni hayatidin ayridi.

Emeliyet yoshurulghan

Seyshenbe küni xitay da'iriliri teripidin bérilgen xewerdin melum bolushiche, enxuy xu'ayü'en dora zawuti ishlepchiqarghan "shingfu" markiliq okul dorisi tüpeylidin ölgenler sani bir nechche kün ichidila eslidiki 4 neperdin 7 neperge köpeygen shundaqla 81 neper bimar mezkur okulni ishletkenliktin késel ehwali oxshimighan derijide birdinla éghirliship ketken.

En'giliye b b s xewiride bérilgen melumatta körsitilishiche, shingfu markiliq dora okuli ölüm weqesini keltürüp chiqarghandin kéyin, xitay dora buyumlirini nazaret qilish orgini derhal buyruq chüshürüp, mezkur dora okulini ishletmeslikni we bu heqte tekshürüsh élip bérish kéreklikini otturigha qoyghan. Lékin bu jeryanda, enxuy ölkisining dora buyumlarni nazaret qilish orgini heqiqetni yoshurushqa urun'ghan. Xitay yashlar gézitide bérilgen bu heqtiki xewerdimu, enxuy dora buyumlarni nazaret qilish orginining mezkur weqedin xéli burunla xewiri bar ikenlikini ashkarilap, " néme üchün ehwalni bilip turup, waqtida chare -tedbir qollanmaydu" dep mezkur dora nazaret qilish orginini qattiq tenqidligen.

En'giliye b b s radi'o ‏- téléwiziye xewiride bérilgen melumatta bildürülüshiche, enxuy xu'a yü'en dora ishlepchiqirish zawutining "shingfu " markiliq bo dora okulini ishletkenliktin weqe yüz bergen ölkiler, hazirning özidila 10 din ashqan bolup, Uyghur élimu bularning arisida iken.

Uyghur élidimu saqta dora yamrimaqta

Biz enxuy dora zawutining "shingfu " markiliq bu dorisining Uyghur élidiki xelqning salametlikige élip kelgen ziyini heqqide mezkur jaydiki dora nazaret qilish orgini we her qaysi doxturxanilargha téléfon qilduq. Ziyaritimizni qobul qilghan ürümchi shehiri dostluq doxturxanisining dora bölümi xadimi yéqindin buyan, mezkur jayda bu heqtiki tekshürüshning küchiyiwatqanliqini tekitlep" téléwizorlardimu bu heqte uqturush qilghan, shunga hazir bizning doxturxanida bu xil dora okuli peqet ishlitilmeydu. Lékin bashqa doxturxanilarda qandaqkin ? buninggha éniq bir nerse dégili bolmaydu"dep jawab berdi.

Gerche biz téléfon qilip sürüshte qilghan köp sandiki doxturxanilar "shingfu " markiliq bu xil dora okulini ishletmeydighanliqini hemde saxta dorilarningmu mewjut emeslikini tekitlewatqan bolsimu, ziyaritimizni qobul qilghan bir qisim puqralar jem'iyette yamrap kétiwatqan saxta dorilardin intayin endishe qilidighanliqini bildürdi. Ular özlirining saxta dorilargha yoluqup qélishidin saqlinish üchün, adette ushshaq -chüshshek dora ponkitliridin hergiz dora almaydighanliqini, hetta zukam we bash aghriq dorilirinimu mexsus doxturxanilargha bérip doxturgha körünüsh arqiliq andin yüreklik alidighanliqini bildürdi.

"Shingfu " markiliq saxta dorigha oxshash kishilerning salametlikige shipaliq emes belki zor ziyan élip kéliwatqan dora türliri bimarlar üchün heqiqeten zor tehdit bolup, ularning rohiy keypiyatighimu zor tesir körsetmekte. (Méhriban)

Pikirler (0)
Share
Toluq bet