Канада сақчи даирлири хитайларниң сахта пластинка содисиға зәрбә бәрди

2006-12-29
Елхәт
Пикир
Share
Принт

Роздество байриминиң алди кәйни вә йеңи йилниң һарпилирида канададики хитайларниң қанунсиз йол билән көчүрилидиған пластинка содиси техиму аватлишип кетиду. Башқа дөләтләрдики хитайларға охшаш канададики хитайларму бу хил тиз үнүмини көргили вә тиз бейиғили болидиған сода билән шуғуллинишқа хуштар. Амма канада сақчи даирлири нуқтилиқ елип берилған бир қанчә қетимлиқ тәкшүрүш вә зәрбә бериш һәрикәтлири арқилиқ, қанунсиз пластинка содиси билән шуғулланған хитайларни қолға алди вә уларниң дуканлири печәтлиди. Наһайити көп миқдардики қанунсиз пластинка буюмлирини қолға чүшүрди.

Мутәхәссисләр сахта мал ишләпчиқириш вә бу хил сода билән шуғуллиниш хитайларниң мәдәнийәт әнәнисидин кәлгән, дәп қаримақта.

Әҗәллик зәрбә

Кананаданиң торонто шәһиридики хитайлар мәркәзлик олтурақлашқан хитай базарлири сахта маллар вә қанунсиз буюмлар пулға айландурулидиған дунядики асаслиқ мәркәзләрниң бири. Амма роздество байриминиң алди-кәйни вә йеңи йилниң һарписида канада сақчи даирлири бир қанчә қетим нуқтилиқ зәрбә бериш һәркити елип берип, хитайларниң бу қанунсиз содисиға әҗәллик зәрбә бәрди.

Мәхсус қанунсиз пластинка содиси билән шуғуллинидиған наһайити чоң гуруһларни паш қилди, уларниң пластинка көпәйтидиған үгилирини вә үскүнилирини пачақлап ташлиди, дуканлирини печәтлиди.

Сақчи тәрәпниң әскәртишичә, һәтта бәзи хитайлар дуканлирини қанунсиз көчүргән CD, VCD DVD ларға охшаш буюмларни ашкара сатидиған мәркәзгә айландурған болса, улар йәнә дуканлириниң иккинчи қәвитлириниму киралап, бу йәргә мәхсус көчүрүш үскүнилирини орнатқан вә пластинка көпәйтиш билән мәшғул болған бу қанунсиз унсурларни қолға алди.

Бу һәркәт ахирлашқандин кейин сақчи әмәлдари John Kelley канада җамаитигә мәлумат берип: биз пластинка санаити җәмийити тәминлигән толуқ материялларға асасән бу тәкшүрүш һәриктини елип берип, көп миқдардики қанунсиз мадди буюмни қолға чүшүрдуқ. Бир қисим кишиләрни қолға алдуқ, деди.

Сақчи тәрәпниң билдүрүшичә, роздество байриминиң алди кәйни вә йеңи йилниң һарпилирида хитай базарлирида қанунсиз пластинка содиси даим чап-чап болидикән.

Хитайлар қанунсиз тиҗарәтни тиз бейишниң йоли қиливалған

Сақчи тәрәп аял баянатчисиниң әскәртишичә улар йеқинда техиму кәң –көләмдики тәкшүрүш вә зәрбә бериш һәрикәтлирини елип баридикән. У мундақ дәйду: "биз бу райондики аһалилар тәминлигән учурлар арқилиқ, техиму көп йип учиға игә болдуқ. Биз қанунсиз йол арқилиқ көчүрүлгән пластинка вә сахта мал ишләпчиқириш, сетиш һәрикәтлиригә һәргизму юмшақ қоллуқ қилмаймиз". Униң тонуштуришичә, алдинқи йили, улар йеңи йилниң һарписида хитайларниң сода раюнида туюқсиз тәкшүрүш елип барғанда 400 миң данидин артуқ қанунсиз көчүрүлгән пластинкини қолға чүшүргән вә бу һәрикәттә 15 нәпәр хитайни қолға алғаникән. Қолға чүшүрүлгән пластинка вә үскиниләрниң қиммити нәчә он милйон долларға йетидикән.

Бу баянатчиниң мисалға елишиға қариғанда, бу базарда пластинка содиси билән шуғуллинидиған лю чав исимлик бир нәпәр хитай, алдинқи йили қанунсиз пластинка содиси җинайити билән қолға елинған вә кейин униңға җәриманә берип, қуюп бәргән болсиму амма у, бу йил қанунсиз пластинка тиҗаритиниң даирисини нәчә он һәссә кеңәйткән. У бу қетим нәчә он милйон долларлиқ көпәйтиш үскиниси вә қанунсиз пластинка буюмлири билән қолға чүшкән.

Сахта мал хитай мәдәнийитидин кәлгән

Сақчи даирлириниң билдүришичә, қолға чүшүрүлгән бу пластинкиларниң бир қисмини дукан игилири өзлири көпәйткән болса, йәнә бир қисми хитайдин кәлгәникән. Канада даирлири бу нуқтиға алаһидә диққәт қилмақта.

Қанунсиз пластинка содиси ғәрб дөләтлириниң бешини ағритиватқан мәсилә болмақта, улар бу мәсилидә хитай һөкүмитигә бесим ишлитип кәлмәктә.

Канадада хитай вә вйетнамдин кәлгән көчмәнләр бу қанунсиз пластинка содиси билән шуғуллиниду.

Канада гезитлириниң ашкарилишичә канада һөкүмити көчмән қобул қилиш шәртлирини асанлаштурғандин кейин, хитайдин бир қисим қанунсиз унсурлар канадаға сиңип киргән.

Мутәхәссисләр, нөвәттә хитай сақта малниң асаслиқ мәнбәси, сахта мал содиси хитай мәдәнийитин кәлгән, дәп қаримақта.

Пикирләр (0)
Share
Толуқ бәт