Yawrupa ittipaqi xitay mehsulatlirining süpitini yaxshilashni , saxta mallarni qattiq chekleshni telep qildi

2007-07-23
Élxet
Pikir
Share
Print

Yawrupa ittipaqi istémalchilarning menpe'etini qoghdash komitétining mexsus xadimi mégléna kunéwa xanim, 22 ‏- iyul küni béyjingda, xitay da'iriliri mehsulatlirigha qaratqan tekshürüsh xizmitini kücheytishi , bolupmu saxta mallargha qet'i cheklime qoyushi kérek dep jakarlidi.

Istémalchilarning bixeterliki bilen salametliki birinchi orun'gha qoyulushi tekitlendi

Kunéwa xanim, xitayda élip baridighan 5 künlük ziyaritini bashlighan bolup, u béyjingda yuqiriqi sözlerni tekitligen. Kunéwaning éytishiche, xitay hökümiti yawropaning munasiwetlik telepliri buyiche ish élip barmighan , bolupmu éléktironluq eswaplar, balilar oyunchuqliri, aptomobil üsküniliri we bashqa istimal buyumliri üstide etrapliq tekshürüsh élip barmighan.

Kunéwa xanim, xitayning sodida basidighan her bir qedimini yaxshi bésishini, eng muhimi ishlepchiqirishqa ehmiyet bérip, istémalchilarning bixeterliki bilen salametlikini qoghdashni birinchi orun'gha qoyushini tekitlidi.

U sözide yene": biz gerche xitayning ölchemge yetmigen bir qisim mallirining yawrupa bazirigha kirishini chekliyelisekmu, emma xitay baziri hemde mehsulatlirining süpitini omumyüzlük yuqiri kötürüsh bizning esli meqsidimiz bolghanliqi üchün, biz yenila yaxshi bir netijini körüshni xalaymiz " dédi.

Bundin ilgiri, amérika xitayning ölchemsiz mehsulatlirini qattiq tenqid qilghan idi. Yawrupa döletlirimu buningdin endishe qilip, xitayda ishlepchiqirilghan süpetsiz mehsulatlarning yawrupagha kirishini tosash üchün heriket qilip keldi.

Yawrupa ittipaqi istémalchilarning menpe'etini qoghdash komitétining xadimi kunéwa, yawrupa ittipaqining xitaygha süpet bashqurush xadimlirini yétishtürüsh jehette yardem béridighanliqini hemde xitay bilen bu jehette uchur alaqini kücheytidighanliqini bildürdi.

Yawrupa ittipaqi yimektin bashqa mehsulatlarning süpet ölchimini tekshürüsh organlirining tekitlishiche, 2006 ‏- yili xitaydin ékisport qilin'ghan mehsulatlarning %48 ide mesile körülüp , xitay süpet jehette mesile éghir döletler qatarida birinchi orun'gha qoyulghan, halbuki ikkinchi orunda turidighan gérmaniye mehsulatlirining aran %2 ide mesile bayqalghan.

Kunéwa xanim, xitayning ékisport mehsulatlirida 100 de %2 lik yaxshilinish meydan'gha kelgenlikini bildürüsh bilen birge , yawrupa ittipaqining nöwette téximu téz we téximu köp yaxshilinishlarning meydan'gha kélishini ümid qilidighanliqini tekitlidi.

Panamada 100 kishi zeherlinip ölgen

Bu yil 7 ‏- ay amérikida, xitayda ishlen'gen yötel suyuqluqi we bir qanche dorilardin meydan'gha kelgen zor kölemlik zeherlinish weqeliri we yéqindila panamada yüz bergen 100 kishining zeherlinip ölüsh weqesi ashkarilan'ghandin sirt yene, xitay shirketliridin amérikigha ékisport qilin'ghan bughday we guruchtiki zeherlik maddilar tüpeyli az bolmighan haywanlarning ölgenliki otturigha chiqqan idi.

Yawrupa ittipaqi istémalchilarning menpe'etini qoghdash komitéti, xitayning ékisport mehsulatlirigha qaratqan tekshürüsh xizmitige alahide köngül bölgenliki üchün, kunéwa xanim xitayda élip baridighan ziyariti dawamida , xitayning munasiwetlik xadimliri bilen mexsus söhbet élip bérishtin sirt, xitayning jyangsu ölkisidiki süpet tekshürüsh xadimliri bilen uchriship xitay mehsulatlirining bixeterlik mesilisini muzakire qilidiken. (Eqide)

Pikirler (0)
Share
Toluq bet