Amérika kéngesh palatasida xitay tawarlirini tekshürüshni kücheytish telep qilindi

2007-09-13
Élxet
Pikir
Share
Print

Amérikigha éksport qilinidighan xitay tawarlirining süpiti we bixeterliki xitay - amérika aliy derijilikler söhbitide muzakire qilinidighan mesile bolup qaldi. Prézidént bush yéqinda xitay dölet re'isi xu jintaw bilen awstraliyide körüshkende süpet mesilisini otturigha qoyghan, xu jintaw bolsa süpet mesilige jiddiy qaraydighanliqini bildürgen idi. Amérika kéngesh palatasida charshenbe küni chaqirilghan bir ispat bérish yighinida, kéngesh palata ezaliri tawarlardiki "xitayda ishlendi " dégen belge agahlandurush signali bolup qalghanliqini we xitay tawarlirini tekshürüshni kücheytidighan qanun chiqirishni telep qildi.

"Xitayda ishlendi" dégen belge agahlandurush signali bolup qaldi

Xitay dölet re'isi xu jintaw ötken hepte awstraliyide prézidént bush bilen körüshkende, xitay éksport tawarlirida bayqalghan süpet we bixeterlik mesilisige jiddiy mu'amile qilidighanliqini bildürgen shundaqla xitay hökümiti, seyshenbe küni washin'gtonda ötküzülgen éksport tawarlirining süpet we bixeterlik yighinida mehsulatlarning bixeterliki we oyunchuqlargha qoghushun ishletmeslikke wede bergen bolsimu, lékin amérika kéngesh palata ezaliri yenila xitay tawarlirini tekshürüshni kücheytidighan qanun chiqirishni telep qilmaqta .

Amérika kéngesh palatasining xitay éksport qilghan oyunchuqlardiki bixeterlik mesilisi téma qilin'ghan charshenbe künki ispat bérish yighinida, bezi kéngesh palata ezaliri xitay tawarlirining süpiti we bixeterlik ölchimige qoyulidighan telepni kücheytidighan qanun belgilime chiqirishni otturigha qoydi. Yighinda jumhuriyetchi kéngesh palata ezasi sam browénbek, tawarlardiki" 'xitayda ishlendi ' dégen belge agahlandurush signalining rolini oynaydighan belge bolup qaldi " deydu. U yene, xitay tawarlirigha tedbir qollinish waqti kélip qalghanliqini eskertip, bu mesile balilar, istimalchilar we emek haywanlirining salametlikige munasiwetlik mesile. Buningda sewir taqitimiz qalmidi. Buninggha tedbir qollinidighan waqtimiz keldi" dep körsetti.

Karxanilar bizning salametlik we bixeterlik ölchimimizge yétishi kérek

Kéngesh palatasi xitay tawarlirining süpet we bixeterlik mesilisi üstide ispat bérish yighini chaqirghan mezgil, amérika istimalchilar bixeterlikini qoghdash komitétining re'isi nensi nord bilen xitay döletlik süpet tekshürüsh idarisining bashliqi wéy chüenjung, washin'gtonda xitay éksport tawarlirining bixeterlikige kapaletlik qilish kélishimi imzalap, xitay balilar oyunchuqlirigha qoghushun maddisi ishletmeslikke wede bergen mezgilge toghra keldi.

Kéngesh palatasining charshenbe künki ispat bérish yighinida démokratik kéngesh palata ezasi dik durbin xitay karxanilirini agahlandurup, amérikiliqlar mehsulatlarning bixeterlik mesiliside hergiz yol qoymaydighanliqini eskertti. U, "biz éksport sodisi bilen shughullinidighan xitay karxanilirigha shuni eskertip qoyush lazim, dep qaraymizki, amérika bizning istimalchilirimiz we a'ilimizning salametlik we bixeterlik mesiliside hergiz yol qoymaydu. Karxanilar bizning salametlik we bixeterlik ölchimimizge yétishi kérek " deydu. Dik durbin yene, oyunchuqlarning bixeterlik séstimisini kücheytish kérek, dep qaraydighanliqini bildürdi.

Xitay mehsulatlirining bixeterlik mesilisi yawropa istimalchilirini endishige séliwatqan mesile

Xitay mehsulatlirining salametlik we bixeterlik mesilisi amérikiningla emes, bu yene yawropaning diqqitini qozghawatqan we yawropa istimalchilirini endishige séliwatqan mesilidur.

Yawropa ittipaqining sehiye komissari markos kopiri'ano, eger xitay mehsulatliri yawropa puqralirining salametlikige tehdit yetküzse, ittipaqning xitay mallirini tosaydighanliqini chetke qaqmidi. U béyjingdiki bir qétimliq sözide, "xitay mallirini cheklesh bizning axirqi tedbirimiz. Lékin bu bizning kishilerning salametliki tehditke uchrighanda alidighan axirqi charimiz " dep tekitligen.

Wéy chüenjung bezi mehsulatlarda mesile bayqalghanliqini étirap qilghan

Amérikining Mettal shirkiti xitaydin balilar oyunchuqi import qilidighan karxanilarning biri bolup, mezkur shirket yéqinqi bir qanche heptidin béri bir qanche qétim amérika baziridiki bezi xitay oyunchuqlirini bixeterlik sewebidin yighiwalghan idi.

Amérika kéngesh palatasining charshenbe künki ispat bérish yighinida Mettal shirkitining ijra'iye mudiri robért ékért, istimalchilarning epu qilishini soridi we xitayda yasalghan oyunchuqlarning bixeterlik tekshürüshi chingitilghanliqini bildürdi. U, " bizning mehsulatlirimizni ishlepchiqiridighan karxanilar Mettal shirkitining mehsulat bixeterlik ölchimige boy sunushi kérek. Bu mehsulatlarni boyashni öz ichige alidu" dep körsetti.

Mettal Shirkiti bezi oyunchuqlarning sir terkiwide nahayiti köp miqdarda qoghushun bayqalghanliqini we bu balilarning salametlikige ziyan yetküzidighanliqini élan qilip, bu oyunchuqlarni yighiwaldi. Xitay döletlik süpet tekshürüsh idarisining bashliqi wéy chüenjung, washin'gtondiki ziyaritide bezi mehsulatlarda mesile bayqalghanliqini étirap qilghan bolsimu, lékin u buninggha ikki döletning süpet ölchimidiki perqler , layihilesh jeryanidiki sewenlikler we metbu'atlarning mesilini köptürüwitishi qatarliqlar sewebchi bolghanliqini bildürdi. (Erkin)

Pikirler (0)
Share
Toluq bet