Америка муавин призидент намзатлири ирақ вә иқтисади мәсилиләр бойичә муназирә елип барди

2004-10-06
Елхәт
Пикир
Share
Принт

Америка җумһурийәтчиләр партийәси муавин призидент намзати дик чений билән димукратлар партийиси муавин призидент намзати җон едвартс оттурисидики ақ сарайниң хоҗайинлиқ һоқуқини талишиш йолида елип берилған сәйшәнбә күнки тунҗи вә ахирқи қетимлиқ муназирә, ирақ вәзийити вә иқтисади мәсилиләргә четилди. 90 Минут давамлашқан муназирә җәриянида дик чений, призидент бушни махтиди вә униң сияситини ақлиди. Җон едвартс, өзи вә димукратлар призидент намзати җон кәррийниң америка хәлқини тоғра йолға башлайдиғанлиқини илгири сүрди.

Муавин призидент дик чений ирақ урушини ақлап, сабиқ ирақ диктатури саддам һүсәйин билән ал- қайдә тәшкилатиниң тәшкили мунасивети барлиқини, ираққа һәрбий һәркәт елип беришниң америкини қоғдаш нуқтисидин зөрүрликини әскәртти. У мундақ дәйду : "бизниң ирақтики һәркитимизниң асаслиқ конкирит нишани терорчилар билән кәң көләмдики қирғинчилиқ харәктирлик қораллар оттурисида мунасивәт болуш иһтималлиқиға қаритилған. Бүгүн биз дуч келиватқан әң чоң тәһдит, терорчиларниң ядро қорали яки биолугийәлик қораларни бирәр шәһәримизгә оғурлуқчә елип кирип, йүзлигән яки миңлиған америкилиқниң һаятиға тәһдит селиш иһтималлиқидур".

Дик чений, буш һөкүмитиниң ирақтики һәркитини мундақ дәп ақлиди : " биз ирақ мәсилисидә қандақ қилған болсақ тоғра қилған болаттуқ. Әгәр буларниң һәммисини мениң қайта қилишимға тоғра кәлсә, мән йәнила охшаш һәркәт қилишни тәклип қилған болаттим. Кәңәшпалата әазаси, димукратлар муавин призидент намзати җон едвартс, муавин призидент дик ченийни ирақ тәһдити, ирақ урушиниң вашингтон вә ню- йорклардики 11 - синтәбир тәрурлуқ һуҗуми билән болған мунасивети мәсилисидә америка хәлқиғә растчил болмиди" дәп әйиплиди.

У йәнә мундақ деди: "бу йәрдә 11 - синтәбир вәқәси билән саддам һусәйинниң һичқандақ мунасивети йоқ, буни 11 - синтәбир вәқәсини тәкшүрүш кометитиму ейтти, сизниң ташқи ишлар министирңизму сөзлиди, бирақ сиз путун мәмликәткә бу иккисиниң мунасивети бар дәватисиз. Бу йәрдә бундақ бир мунасивәт йоқ ".

Җон едвартс, афғанистанда қоршав ичидики усама бин ладенниң рәһбәрликтики хата сиясәтләр түпәйлидин қечип кәткәнлигини илгири сүрди. Едвартс, дик чений билән холлибертон ширкитиниң мунасиветини тәнқит қилди. Америка дөләт мудапиә министирлики билән ирақтики америка қисимлириға арқа сәп мулазимити қилиш келишими түзгән холлибертон ширкити, қанунсиз пайда елиш билән әйипләнгән. Дик чений 4 йилниң алдида мәзкур ширкәтниң баш мудири иди. У, җумһурийәтчиләрниң муавин призидент намзатлиқини қобул қилғанда холлибертонниң баш мудирлиқидин истипа бәргән. Дик чений димукратларниң муавин призидент намзатини, холлибертон билән болған мунасиветимни оттуриға чиқирип, сайлиғучиларни қаймуқтурмақта дәп әйиплиди.

Икки партийә муавин призидент намзатлири оттурисидики муназирә, охаю штатиниң кливеланд шәһридики кәйс вестерн ризерве университитида елип берилди. Икки партийә муавин призидент намзатлириниң муназириси иқтисади мәсилиләргиму четилди. Җон едвартсниң билдүрүшичә, америкилиқлар җидди иқтисади мәсилиләргә дуч кәлмәктә. У мундақ дәйду : ирақтики қалаймиқанчилиқ сәвәбидин милйонлиған хәлқ хизмитидин айрилди. Милйонлиған киши намратлар қатариға чүшүп қалди. Һәммә нәрсиниң баһаси өрлигән болсиму кишиләрниң аилә кирими төвәнлиди. Давалаш һәққиниң юқурилиқи ахирқи төт йил ичидә мисли көрүлмигән рикорт яратти.

Җон едвартс дик ченийға мундақ дәп хитап қилиди : "муавин призидент әпәнди, бу дөләт сизниң һакимийитиңизни йәнә төт йил көтүрәләйду дәп қаримаймән". Бирақ, дик чений җон едвартсниң иқтисади мәсилиләрдики тәнқитини рәт қилди. У, америка иқтисадиниң җанлиниватқанлиғини, буш һөкүмитиниң баҗ қисқартиш сияситидин америкилиқларниң мәнпәәтдар боливатқанлиқини илгири сүрди. Җон кәррий билән җон едвартсниң иқтисади мәсилиләрдики сияситини тәнқитлигән дик чений мундақ дәйду : мениңчә кәррий билән едвартс асаслиқи баҗни өстүрмәкчи боливатиду, шундақла һөкүмәтниң гразданлар шәхси турмушиға болған контроллиқини күчәйтишкә уруниватиду. Бу қетимқи муназирә икки партийә муавин призидент намзатлириниң тунҗи қетим, шундақла ахирқи қетим муназирә қилиши болуп қалиду. Көзәткүчиләрниң билдөрүшичә, муназиридә һәр икки тәрәп бир- бирини йеңәлмигән.(Әркин)

Пикирләр (0)
Share
Толуқ бәт