Шветсийә парламентида 'шветсийә парламенти уйғур достлуқ җәмийити' қурулди

28 - Апрел күни шветсийә парламентида "шветсийә парламенти уйғур достлуқ җәмийити" қурулди. Қурулуш мурасимиға бу җәмийәтни қурушни тәшәббус қилип киливатқан бир қисим парламент әзалиридин сирт шветсийидә паалийәт елип бериватқан шветсийә уйғур комитети вә шветсийә маарип уюшмисиниң вәкиллириму тәклип билән қатнашти.
Мухбиримиз йалқун
2010-04-29
Елхәт
Пикир
Share
Принт
Сүрәттә, 28 - апрел күни шветсийә парламентида қурулған "шветсийә парламенти уйғур достлуқ җәмийити" ниң қурғучи әзалиридин мәмәт қаплан әпәнди, отто ван арнолд әпәнди, аалийә енаксон ханим вә улерика карилсон ханим  қатарлиқлар.
Сүрәттә, 28 - апрел күни шветсийә парламентида қурулған "шветсийә парламенти уйғур достлуқ җәмийити" ниң қурғучи әзалиридин мәмәт қаплан әпәнди, отто ван арнолд әпәнди, аалийә енаксон ханим вә улерика карилсон ханим қатарлиқлар.
RFA Photo / Yalqun

Қурулуш мурасиминиң риясәтчиликини христиан демократлар партийисидин болған парламент әзаси отто ван арнолд әпәнди қилди. У йиғинда қилған сөзидә, уйғурлар билән тонушуш җәрянини қисқичә сөзләп өткәндин сирт, шветсийә парламентида мушундақ бир җәмийәтниң қурулушиниң уйғур мәсилисиниң шветсийә парламентида күн тәртипкә келишидә муһим роли барлиқини әскәртти.

Йиғинниң күн тәртипи буйичә шветсийә уйғур комитетиниң рәиси маһинур ханим уйғурларниң һазирқи сияси вәзийити вә шветсийидики уйғурларниң әһвали һәққидә қисқичә мәлумат бәрди. Андин маарип уюшмисидин ниҗат әпәнди шиветлар билән уйғурларниң тарихтики мунасивити вә бир қисим шиветсийилик тәтқиқатчи, екиспидийичи вә шивет мисюнерлириниң уйғур елидики паалийәтлири һәққидә қисқичә әсләтмә бәрди.

Йиғинда сөз алған аалийә енаксон ханим уйғурлар мәсилини тонуш җәрянини әсләп мундақ дәйду: "мениң уйғур мәсилиси билән тонушқинимға 10 йилларчә болди, бурун шветсийә парламентида уйғур мәсилисини билидиғанлар вә көтүрүп чиқидиғанлар йоқ дийәрлик иди, йилларниң өтүши билән уйғур мәсилисиниң тонулишиму тиз болуватиду, болупму өткән йили үрүмчидә йүз бәргән "5 ‏- июл вәқәси"дин кийин шветсийә парламентида уйғур мәсилисини билмәйдиған адәм қалмиди. Мән рабийә қадир ханимни билгәндин бери уни һәр йили дегүдәк нобел тинчлиқ мукапатиға намзат қилип көрситип келиватимән. Дәсләптә өзәм ялғуз көрсәткән болсам, әмди намзат көрситидиғанларниң сани көпийиватиду, мәсилән, бу йиллиқ намзат көрситиш қәғизигә шветсийә паламентидин 20 нәччә парламент әзаси қол қойди. Рабийә қадир нобел тинчлиқ мукапатиға еришкичә уни намзатлиққа көрситишни өзәмниң вәзиписи дәп қараймән."

Шветсийидә һазир һакимийәт бешида туруватқан мудератлар партийисидин болған парламент әзаси улерика карилсон ханим сөз нөвитидә мундақ дәйду: "уйғур мәсилиси маңа нисбәтән наһайити натонуш бир мәсилә иди, бундин икки йил бурун шветсийә уйғур комитетидикиләр билән учрашқандин кийин, уйғурлар һәққидә дәсләпки тонушқа игә болған идим, мана әмди "шветсийә парламенти уйғур достлуқ җәмийити"ни қурушни тәшәббус қилғучи вә уни қурғучиларниң бири болуп олтуруптимән, мән буниңдин наһайити хушалмән. Мениң билишимчә, бу, пүтүн дуня миқясидики парламентларда тунҗи 'уйғур достлуқ җәмийити'ниң қурулуши болуп һесаблиниду. Биз бу җәмийәтниң уйғур мәсилисиниң вә уйғурларниң инсан һәқлири әһвалиниң шветсийә парламентида муназиригә қоюлушиға вә уйғурларға даир қарарларниң елинишиға түрткә болушини истәймиз. Ишинимәнки, бу достлуқ җәмийитигә әза болидиған парламент әзалириниң сани пат йеқинда техиму көпийиду.

Йиғин ахирида, йиғинниң күн тәртипи буйичә җәмийәтниң рәһбәрлик аппарати сайлап чиқилди. Җәмийәт рәисликини христиан демократлар партийисидин болған парламент әзаси отто ван арнолд әпәнди, кассирлиқини йешиллар партийисидин болған парламент әзаси мәмәт қаплан әпәнди үстигә алди. Қалған рәһбәрлик аппаратлири кейинки йиғинда толуқлинидиған болди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)
Share
Толуқ бәт