Шиветсийидә уйғурлар тоғрисида рәсим көргәзмиси

Шиветсийидә бир қанчә йилдин бири уйғурларниң сияси тәқдири, иҗитимаи һаяти һәққидә издиниватқан вә уйғур елиниң йеза - қишлақлиридин тартип кәлгән рәсимлири билән рәсим көргәзмиси ечип уйғурларниң һазирқи риаллиқини шивет хәлқиғә һармай чүшәндүрүп киливатқан пер еңистүрөм әпәнди шиветсийиниң җәнубидики чоң шәһәр болған малмө шәһиридә өзиниң йәнә бир қетимлиқ бир айға сузулған рәсим көргәзмисини башлиған.
Мухбиримиз йалқун
2009-02-10
Елхәт
Пикир
Share
Принт
7 - Феврал күни, пер еңистүрөм әпәнди малмө шәһәрлик мәдәнийәт сарийи билән һәмкарлишип уйуштурған уйғурларға даир учур бериш муһакимә йиғин залидин бир көрүнүш.
7 - Феврал күни, пер еңистүрөм әпәнди малмө шәһәрлик мәдәнийәт сарийи билән һәмкарлишип уйуштурған уйғурларға даир учур бериш муһакимә йиғин залидин бир көрүнүш.
RFA Photo / Yalqun

Пер еңистүрөм әпәнди көргәзмигә айиқи үзүлмәй киливатқан кишиләрниң уйғурларға даир сориған соаллириға қанаәтлинәрлик җаваб бириш вә уйғурларни техиму кәң тәшвиқ қилиш үчүн малмө шәһәрлик мәдәнийәт сарийи билән һәмкарлишип, 7 - феврал күни көргәзмә залиниң өзидә уйғурларға даир учур бериш муһакимә йиғини уюштурди.

Көргәзмә вә муһакимә йиғининиң мәқсиди һәққидә учур бәргән пер әпәндим мундақ дәйду":малмө шәһири шиветсийиниң иккинчи чоң шәһири болуш сүпити билән шиветсийиниң сияси вә билим мәркәзлириниң бири. Мән көргәзмә ачқан тунҗи күни4 саәтниң өзидә 400 - 500 киши көргәзмини зиярәт қилди, буни шиветсийидә елип бериливатқан көргәзмиләргә ниспәтән ейтқанда бир рекорт дейишкә болиду, әмма улар асасән уйғурлар һәққидә һечқандақ учур аңлап бақмиған, шуңа мән бүгүн бу муһакимә йиғинини уюштуруш арқилиқ уйғурларниң кимлики һәққидә техиму тәпсилий учур бәрмәкчи.

Муһакимә йиғинида дуня уйғур қурултийиниң баш катиби долқун әйса әпәндим уйғурларниң сияси вәзийити вә инсан һәқлири әһвали һәққидә тәпсли доклат бәрди, долқун әйса әпәндим нәқ мәйданда зияритимизни қобул қилип туйғулирини ипадилиди.

Муһакимә йиғинида йәнә, шиветсийә уйғур комитетиниң рәиси маһинур ханим уйғур мәдәнийти вә шиветсийә уйғур комитетиниң шиветсийидә елип бериватқан хизмәтлири һәққидә доклат бәрди. Адил һеким өзиниң гүәнтанамо түрмисигә қамилип қелишиниң җәряни вә тартқан күлпәтлири һәққидә мәлумат бәрди, шиветсийә парламинтидин отокон арнал әпәнди шиветсийә парламинтида елип бериливатқан уйғурларға даир хизмәтләрдин учурлар бәрди вә муһакимә йиғининиң дәм елиш арилиқида уйғур сәнитиниң җәвһәрлиридин өрнәкләр көрситилди.

Көргәзмини уюштурватқан пер әпәнди 2004 - йилдин бири шиветсийә уйғур комитети билән һәмкарлишип ишләватқан шиветларниң бири болуп, униң бу қетимқи көргәзмисини уюштурушта шиветсийә уйғур комитети уни мадди вә мәниви асаслар билән көп қоллиған иди.

Зияритимизни қобул қилған дуня уйғур қурултийиниң баянатчиси дилшат әпәнди бу хизмәтләрни муәййәнләштүрүп қарашлирини ипадилиди.

Пер әпәндиниң билдүрүшчә, униң бу көргәзмиси шиветсийә ахбаратлири тәрипидин бәс ‏ - бәс билән хәвәр қилинған болуп,"хитайниң ғәрбидики унтулған милләт - уйғурлар " намидики бу көргәзмә шивет хәлқи арисида зор алқишқа сазавәр болған.


Пикирләр (0)
Share
Толуқ бәт